GALPI THUMNA KIPAN TA HI - JOHN PILGER

GALPI THUMNA KIPAN TA HI - JOHN PILGER

March 24, 2016: Australian journalist John Pilger in "World War 3 Has Begun" cih a atna a manna khat om sa ing. John Pilger in hih bangin na at hi.

Kidopi Thumpi pen a kipan hita hi, media ten a tel loh man bek hi a, tu lianin zuau thu, phuahtawm thu tangko a kidona (war of propaganda) leh i ngaihsut loh dingpi hong kingaihsutsak a, i thudon loh (distraction) hun hita hi. A beisa kha 18 sungin Obama administration in gal van bawlna ding leh galdona dingin a sum zat pen Kidopi Masana leh Nihna sangin tam bei zaw a, Russia nitumna lamah galkap tampi koih hi. Ukraine pen nidangin Soviet Union (USSR) hi a, tu in USte CIA ten park dingin zang uh hi. A zat nop manun nung kum in Ukraine mipi deihna tawh kumpi kiteel laih uh a, tu-in Russia kigolh hi ci'n phinna dingin pansan in nei uh hi. Ukraine mi ten Nazi ten Germany a uk lai in Hitler na phat mahmah uh a, Russia gam-a minam tawmte bawlsiatna leh not khiatna ding na ngen uh hi. Tu-in Ukraine makaite pen Nazi lungsim paai vive OUN leh UPA fascists vive hi ta hi. Hih thu pen nitumna lamah news bangin kisim lel a, thuman taktak pen kinelhsiah in kiseel hi.

Russia gam kianga om Latvia, Lithuania leh Estonia gamte ah US in galkap, tanks, leh thau golpipite (heavy weapons) tampi koih a, tua bangin Kidopi Nihna hun lai in zong Germany in galvan leh galkap Russia a sim dingin koih lo hi. Kidopi Thumna pen a kipan khin hita hi.

US ten Nuclear galvan zanga kidona (nuclear war) a pian' theihna dingin Chinate va phin niloh uh hi. China pen nidangin a lauhuai in kigen ngei lo hi. US Pacific commander, Admiral Harry Harris in "China in South China Sea ah sehnel tawh kulh baang bawl hi," ci'n gen hi. A gen nopna pen China in Philippines tawh a kituhna tuikulh Spratly Islands ah vanleng a phual a bawl vai ahi hi. US in Philippines sum tawh golh gu in hih tuikulh kiim pen a ut peuhpeuh in teembaw a taisak theihna ding (“freedom of navigation campaign) na tangkopih hi. USte ngimna pen Chinate tuipi pang dongah suakta takin teembaw a taisak nop man hi lel hi. USte gamtatna bangin China in thuk kik hi leh California a tuipi kiim ah zong China in suakta takin a teembaw taisak thei ding cihna tawh kibang hi.

‘The War You Don’t See,’ kici film ka bawl a, tua-ah journalist minthang mahmah tampi US leh UK ah ka interview hi. Tuate lakah Dan Rather (CBS), Rageh Omar (BBC) leh David Rose (Observer) kihel hi. Amau a genna ah journalists leh broadcasters ten a nasep ding bangin sem le uh George W. Bush (US president lui) leh Tony Blair (UK PM lui) in zuau thu tawh Iraq president Saddam Hussein in 'weapons of mass destruction' nei hi ci'n 2003 in Iraq sim thei lo ding uh hi ci'n gen tek uh a, mawhna nei lo numei leh naupang tul tampi si lo ding uh hi. Tu-in zong US makaih in phuahtawm thu tawh Iraq a sim mah bangin US in Russiate a do nop manin Ukraine a kigolh ci in, China in Spratly Islands ah vanleng phual bawl hi cih phuah tawm zangin Russia leh China sim ding geel uh hi. A man takin US in China a ngawhna pen China a sim nop man hi a, tu-in China kimkotah US in galkap phual (military bases) bawlin ballistic missiles, battle groups, nuclear-armed bombers vanleng koih khin ta a, tua a koih nop manin a zuau a phuah tawm ahi hi. US in China kimkot a galvan koih a, Australia, Pacific tuikulhte, Marianas, Marshalls, Guam, Philippines, Thailand, Okinawa, Korea, Afghanistan ah zong galkap koih in, tua galvan ten Eurasia leh India gam dong kap pha hi. Hih thu pen media ten imcip uh hi.

2015 in US leh Australia gam kipawlin in a sim in huih leh tuipi (air-sea military exercise) ah galdo ding dan kisinna military exercise a neih lakah a nasia pen nei uh a, a ngimna uh pen Air-Sea Battle Plan hi zaw a, China in gas leh datsi/namgimtui a ngahna leh Middle East leh Africa gamte ah a kitangsap uh vante (vital raw materials) puakna dinga kizang Straits of Malacca leh Lombok Straits kici tuipite a khak nop man hi zaw hi.

American presidential campaign ah Donald Trump in Mexicote lut ding dalna in gamgi a dai kaih ding leh Muslimte lutsak loh ding cih a tangkona hangin gensiatna tampi thuak lawh hi. Trump in galtaite a deih lohna bek gen ding hilo a, UK PM David Cameron in galtaite a deih lohna zong nasia zaw lai hi. Trump pen US panin mi hawlkhia (Great Deporter) hi lo zaw in Nobel Peace Prize ngah Barack Obama hi zaw hi. Suahta tak-a kampau ding a deih
liberal commentator khatin Trump in US ah kihuatna leh ngongtatna khangsak hi na ci ngei hi. Ahih hangin US gam pen ngongtatna tawh kidim khin zo a, naungek bok vak lai nangawn in a nute uh thau tawh kaplum in, mivomte tungah policete ngongtat takin a gamtatna gam hi zaw hi. US in leitung mun tuamtuam, a tam zaw pen democracy tawh ki-ukna gam 50 val ah kumpi laih ding hanciam a, Asia leh Middle East gam tuamtuamah bomb a khiatna hangin mi tul lom tampi si in, million tampi in inn leh lo neih loh lawh khin zo ta hi. USte ngongtatna kiciamtehna (record of violence) pen gam kuamah in a pha ding leh dem zo ding om lo hi. US president len ngei party peuhmah - Republican presidents leh liberal Democrats president hi leh (Truman, Kennedy, Johnson, Carter, Clinton, Obama cihte) gal piangsak lo kuamah om lo uh hi.

1947 National Security Council directives tampi ah American foreign policy ngimna pen leitung bup US liim (image) banga bawl ding, US a bang lote/ngaihsutna bang a nei lote (heretics) pen a upna uh laih ding, a ki-ukna uh laih ding, sum tawh golh guk ding, suk siat ding ci'n "Americanism - We were all Americans" cih ngim leh hanciam in nei hi cih kimu hi. Donald Trump in zong hi bang ngaihsutna na paipih a, ahih hang mah pen tuam pian in mi deihna bangin gamta loin suakta takin (maverick) om se hi. Trump in Russia leh China tawh kido ding ut lo hi'ng, Iraq sim pen mawhna lianpi hi na ci hi. Russia leh China tawh kido leng ei adingin zong lauhuai lua hi na ci hi. Trump sangin a lauhuai zaw pen Hillary Clinton hi zaw a, liberal lungsim a neih hangin maverick (a tuam pian, suakta tak a gamta) hi lo hi. Ngongtatna paipih in, party khat bek hat ding leh party langpang om loh ding deih (totalitarian) hi. US presidential election hong naih tektek bangin a sawt loin Clinton pen a beisa in a khialna leh zuau (crimes and lies) phuah a tam hangin US numei president masa pen in hong kipulak ding hi.

2008 presidential campaign (a cin loh kum) in Hillary Clinton in Iran gam pen nuclear galvan tawh nuai tum dingin na vau hi. Obama' Secretary of State a let lai in mipi deihna tawh kumpi kiteel Honduras kumpi na laih hi. Libya ah US ulian (US ambassador khat kihel) 5 security hoih takin pe lo ahih manin kithat uh hi. Libya kumpi Colonel Gaddafi ukna na laih kik a, Gaddafi pen a that ten tem tawh ngimin a taw a lut sakna uh Clinton in na thukimpih mahmah a, “We came, we saw, he died.” ci'n na gen hi. 

Hillary Clinton gum US Secretary of State len ngei Madeleine Albright in Hillary Clinton gum lo nungaknote na tai gawp mawk hi. Madeleine Albright in Iraq US in a sim lai in Iraq naupang million khat bang kithahna TV ah na lawm hi. Hihte gel pen a kilam danna om lo hi. Clinton president dinga deihte lakah Israel gum leh thau bawl (arms companies) tam mahmah a, tuate pen Middle East gamte a buaina bawlte mah hi a, amah leh a pasal in Wall Street panin sum tampi na lai khia uh hi. US presidential candidate Bernie Sanders in Clinton in nomination a ngah leh ka gum ding hi ci'n kamciamna nei ta hi. Sander zong mi lamdang hi tuan lo a, man hi a cih peuhah US ten thagum zang thei hi cih na thukimpih a, Obama' nasep hoih mahmah hi ci'n na phat hi.

Australia politics zong misi koihna tawh kibang (kind of mortuary) pian a, parliament pen media ten kimawlna in zangin galtaite leh tualsuak mite (Indigenous people) bawl siatna leh kideidanna khang mahmah hi. Australia Malcolm Turnbull in galdo ding lamsang na pi bawl a, defence budget dingin $195 billion na pulak hi. Kinialna om loin dai dide lel hi.

Art, film, theatre, literature ah kumpi hoih lohna gensia (dissidents) ngam ding kimu nawn lo hi. Leitungah ki-itna kiam tektek a, phuah tawm thu tawh kumpi khat in kumpi dang khat sim thei hi. Kumpi hoih lohna gen khia ngam dingte kam humsakte koi ah om ta uh hiam? Gam khat in leitung beina dingin nuclear missile tawh gam khat a kap ding a ngak bek i hi hiam? Kidopi Thumna pen a kipan khin ta hi zaw a, leitung vut leh vai suak ding kal bek a ngak i hita hi.

-Your News Wire