Zomi Innkuan Dialkhai Thu ~Pu Go Sawm Khup

A meel  a sa:
Leitungbup Zomi Innkuan Kipawlna Dialkhai a golna pen: a vai (3.0’), a dung (5.0’) pha a, a zaina (1.0’) a pha cial thum kipheikhun in, a tungnung pen ah a Dum (Blue), a lai ah a San (Red) leh a nuainung pen ah a Eng (Green) meelte adung lamin kikhung hi. Dialkhai a laizang ah a bemna (14” Diameter) a pha a kual khat a San (Aaksi san/Red) tawh kigelh a, a kual sung lam teng pen a Kang (White) meel ahi hi. A kual sung a, a Kang tung ah Vaphual Nupa nihte’ lutang a kimaingat in kisuang hi. A tungnung pen, a Dum (Blue) meel cial tung a, abullam kiu ah kiu (6) anei, a san’na (7”) a pha, Aksipi a Kaang khat tuang hi.

A Dum, a San, a Eng meelpua Cial Thum:
Dialkhai Cial Thum teng a khiatna in; (1) Ki-ukna leh Thuneihna, (2) Taangpi Taangta, leh (3) Gam leh Lei cih dinmun thum ahi hi. A tungnung pen a, a Dum (Blue) meel pua a cial a khiatna in thumaanna leh diktatna tawh ki-ukna leh mipi thuneihna kilangsak hi. A laizang ah a San (Red) meel pua a cial a khiatna in picinna, hangsanna, thutakna tawh kidim a kipkho tawntung minam kilangsak hi. A nuainung pen ah a Eng (Green) meel pua a cial a khiatna in kilemna leh daihna tawh kidim, a nim dildial gam leh leitang kilangsak hi.

A sung lam teng a Kang (White) meel, a San (Aaksi san/Red) meelpua a Kual:
A San Kual a khiatna in pum khat, si khat sa khat lahna hi a, sanggam unau laizom khat hihna tawh kipawlkhopna kilangsak hi. Laizom khat, unau sanggam khat, innkuan khat sung ah kithutuak takin vai hawmkhawm in lungsim siangtho takin kipawlkhopna kilangsak hi.

A Kual sung a Vaphual Nupa nihte:
Vaphual lim pen Zomi kici minamte lahna lim ahi hi. Vaphual Nupa a khiatna in Zomi-te khat leh khat Vaphual Nupa bangin ki-itna, kikhualna kilangsak a, Vaphual Nupa bangin ciam apeello, a thuman’ minam khat hihna dinmun pua hi.

A Dum (Blue) cial tung a, a Kaang (White) Aksipi:
Aksipi akhiatna in leitung minam tuamtuamte lak ah minam kician khat hihna apulak ban-ah, tua minamte pen van leh lei a bawl pa, anungta Pasian in makaih in lamlak hi cihna ahi hi. Aksipi pen David Star hi a, tanglai in van leh lei a bawl pa anungta Pasian in Israel kumpite khat khit khat a makaihna lahna ahih mahbang in Zomi-te zong tua anungta Pasian mahin amakaih ahihna, Israel mite bangin Zomi-te in anungta Pasian’ teltuam minam a hihna pulak hi.

GSKhup
Thuvaanpi, LZI
December 18, 2011.

Facebook ah Pu Go Sawm Khup comments piak kikna: Zomi buppi a'ding Minam Dialkhai pen aneih huaina thu leh koipen ahi hiam cih thu kongzing leh Social Media ah kikupna om zeuhzeuhmah ei. Mimal kimin ih Minam Dialkhai tawh kisai ngaihsutna leh deihna neih theih himah leh, zandiak a ih mit hong kihonsakpan ahitam, Minam Dialkhai cihkhawng, Gam Dialkhai cihkhawng Mimal khatpeuh, Kipawlna khatpeuh in a bawl theih, a kipsak theih kisa zanzan hi. Minam Dialkhai cihte, Gam Dialkhai cihte, a kipsak ding pen Minam a' ahih leh Minam buppi tang'in thu anei, ahihkei leh Minam buppi in ateel Makaite, Thuneite (Parliament/Lesgistlative Body) bekin kipsak thei ahihlam kimu naisamlo hi. Gam Dialkhai zong tuabangmah hi a, Gammi hi ing cih mawkmawktawh Kipawlna khatpeuh in Gam Dialkhai kipsak theih hisamkei. Gam buppi ah Thu Khuntheihna (Legistlative Power) anei Parliament/Assembly bek in a kipsak theih hi. Tuabang THukhun bawl thei Makaite/Thuneite Parliament kician khat ih neih mateng Zomi-te Minam Dialkhai, Zogam Dialkhai cihpen a om nailo ding hiphot hi. Tua masiah Kipawlna Dialkhai, Party Dialkhai, Pawlpi Dialkhai atuamtuam a kineitheimah ahi hi. Gamdang ah Company pawl khatin a Company Dialkhai nangawn aneizo om hi. Zomi-te khuadak in pilvang takin kalsuan ding hihang.