Topa Zeisu' luang tuamna puan pen tuni ciang dong Turin khua ah muh theih in om lai hi. Tua luang tuamna puan tungah Topa Zeisu lim leh mel kimu thei hi. Tua tungtawn in a pumpi tunga liamma om khempeuh mipil Scientist te'n hong lak khia uh hi. Hih luang tuamna puan pen kum 10 ah khatvei ta mipi muh dingin kilak khia den hi.
Tua banah Topa Zeisu in singlamteh a puak laitakin Veronica in a maitanga khua-ul luang pen a dialpi tawh va nul sak hi. Tua dial tungah Topa Zeisu in a maitang lim suak sak hi. Tua dialpi zong tudongin om lai hi.
Um lo phial na hiam? A lamdang nate pen up huai lo phial mah hi. Egypt kumpi si khinte kivuina han pen Pyramid kici hi. Tua Pyramid sungah kum tulnga (5000) aval khin kumpi Faro-te siluang pen sia het lo in kimumu lai hi. Zeisu' luang tuamna puan pen kum tulnih (2000) val deuh pan bek hi !
Tuma kum zanga (500) laia Malaysia ah hong si Misiangtho Francis Xavier' siluang zong tuni dong muat nai lo hi. A luang pen Melaca (Malaysia) ah kiphum masa in, tua khit ciangin India gam Goa ah kipua in, tun zong na muh nop leh kimu thei lai hi. A lamdang mahmah khat ah, hih Pasian' misiangthopa luang hawm pen kum zali (400) a phak dongin a cin leh a sam khangkhang ahihmanin kimet sak den hi.
Ih gennop bulpi in, Zeisu' lim leh mel ih neihte pen lim suaih siamte in a upmawh suaih uh hi lo hi a ci nuam ih hihi. Tua limte bel lim hilel ahihmanin thupi lua lo takpi hi. Ahizongin nangma lim, lawmte tawh kizaihna foto, innkuan foto, nulehpa foto cihte zong amau taktak ahih nawn loh uh hangin thupisak namel thei sam hivecin, ei hong gumpa leh honpa lim leh mel zong zahtaak in thupi bawl zo lehang hoih leh kilawmsa lo na hi uh hiam?
Francis Lam Thang
Zomi Quavadis
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.