Amah pen Oprah Winfrey hi-in, American media proprietor, talk show host, actress, producer, philanthropist leh billionaire khat hi.
Anu le apa pen akiteng hilo-in, Oprah asuahzawh asawtlo-in a pa in amau nuta taisan hi. A nu in agen kikna ah,‘khat vei bekbek lupkhopna tawh nau, anei hi’ng,’ ci hi. A pa in taisan ahih manin a nu in a Pi kiang ah koih hi. A Pi gitloh dan bel genzawh ding hituak lo hi. Sawl cihtak mah in sawl in nasem sak hi. A sepnop kei leh ciangtawh sat in, thu aman kei leh zong dawmvet lo hi. Zawnglua ahih manin nik hoih, puan hoih leisak zolo hi. Tuaman in a Pi in aaluu (potato) ip pen puan in khui-in silk sak a, khuasung avak ciangin mi-in nuihsan uh hi. Ciamnuih bawlna in nei uh hi.
Kum (3) aphak ma-in a Pi pattahna tawh laisim thei-in, kikhawm apai ciangin a Pi in tonpih zel hi. Biakinn ah zong ei dan mah in Lai Siangtho tang te lotngah in simzel in tua hangin ‘The Preacher’ cih minneu khat bang ngahlawh liang hi.
A nungakno tuung akipan in nulepa mawhna lam ah a innlak sanggamte-in buan in mawhpih uh hi. Tagah ahih manin a nunung lam ah a pute leh a pu lawmte khut sungah adeih bangbang, akisap hunhun in sawkphei ziauhziauh dinmun dong ah hong tung hi. 1986 kum, TV show khatpan Oprah in agenna ah, ‘kum (9) ka phak in hong kibuan ta hi,’ ci hi.
Kum (13) aphak ciangin thuakzo nawn mahmah lo ahih manin innpan in paikhia hi. Kum (14) aphak ciangin naupaai-a, asuah zawh asawllo-in anau si hi. Kum (20) aphak ciangin guihtheih, khamtheih tawh kidiah hi.
Kum (17) aphak ciangin,‘Miss Black Tennessee Beauty Pageant’ cih pahtawina ngah in, tua pan kipan in damdam in hong lawhcing toto-a tuin hiciang atung hita hi.
Ama nunzia en kik leng, tagah khat hi-in, paudang khat in gen leng zawlta kici thei ding hi. Kum (9) aphak in kibuan a, kum (13) aphak ciangin innpan in paikhia in, kum (14) aphak ciangin nau nei hi. Kum (17) aphak ciangin Model lam ah lut in, kum (20) aphak ciangin guihtheih khamtheih zangh hi. Kum (32) aphak ciangin TV Show khat tawh hong minthang in hong lawhcing toto in, billionaire numei khat dong hong suakto hi. June, 2016 in Forbes te estimated sakna ah a hauhna, aneih sa pen $ 3.2 billion pha hi, ci-in ciapteh uh hi.
Ih gennop ah bel gam minthang, gamnuam ah teeng, i cih zenzen hangin mi khempeuh in nuam asa hilo hi. Ol-no takin lawhcing in a gualzo ziauziau hilo hi. Khuadam mahmah phalbi do na dingin puanlum hoih takpi zong anei zolo, alei zolo zong na tam mahmah hi.
Nisim in haksatna tuak in ahi zongin tua atuah haksatna panin lungkia lo-in amai nawt teitei te bek anunung ah a gualzo hipan hi.
Tu laitak in na teenna gam leh no innkuan, leh nang mahmah i nuntak zia pen Oprah nuntak zah liangin genthei samlo kha ding leh tuazah liang haksatna tuakkha lo ding hiteh! Ahi kei leh tuazah sangin zong nasia zawkha lian ding hi.
Ahi zongin thupi penpen in, i lungsim leh i lungsim puakzia hi.
Khangluite’n,‘gual bawl in, kisia lo, ei leh ei bawl bek in kisia,’ ci hi.
Oprah zong tuadan lian mah hi. Mi bawlsiatna hangin akisia ding hileh theikha hetlo ding hi hang.
Suang palkha-in i tuk pen apoi hi kei. Apoi taktak in i tukna panin thoto kik nuamlo-a i tutsuak hi.
Hong ki nawlkhin, hong kipampaim pen apoi hi kei. Apoi taktak in hong kinawlkhin na panin i kalsuan kikloh hi.
Ih gualleh pen apoi hi kei. Apoi taktak in i guallelh na panin thasan in i kipat kik loh hi.
By,
Dimno’ Pa
February 22, 2017
Ref : Wikipedia
Pau Khan Kap
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.