Amah pen aneu tung akipan lasak nuam a sa ngiat hi in, Zomi lasiam lakah Zomi bup theih a hong minthang khia baih pawl zong ahihi. Ama minthan dan pen damdam a minthang toto cih dan hi lo in, tha khat thu a Zomi bup sisan sungah a kizeel giap zo pah ek cih ding nam ahihi. Ama mimal thanemna tuamtuam om phial mah taleh a piangthak pente nangawn in zong a pampaih theih loh zah donga lasak siam khat hi in, khangno sunga lasak siam leh la uuk thak ten zong ama awkaih leh a lasak dan a copy mahmah uh khat hi sese lai hi. Kawlgamah Zomi lasak khopna Stage Show a kibawl sim in mipite lungsim sung pan dotna a phuul khia masa pen in "Kapno a kihel diam?" cih thu ahihi. Kihel kei leh mipi lawpna tampi kiam suk pah dak zo hel hi. Mipi in amah pen lunggulh mahmah den lel uh hi. Stage tungah lasa dinga hong din khit naak leh mipi in zunsuah eksuah a mangngilh zo uh hi zawzen hi!
Bang hangin hizah takin Kapno lasak mipi in za nuam hiam? Kapno in la asak ciangin melsiat phamawh sa lo hi. Kamka pah bibia lel a, Stage tungah diang leklek in taai phangphang se takeileh lunglut takin a lungsim khempeuh leh a aw neih khempeuh sit lo in la sa hi. Kineih tawm cih bang zangh se lo hi. Itna la ahihnaak leh sa suk lel a, Pasian la leh zawlla cih bangin deih tuam paih tuam nei se lo hi.
Ama aituam in lakhui 3 bawl khin hi. Khui dangah zong la dawng tampi sa khin hi. Cidam a Australia a va pai theih leh asawt lo in USA Zomi ten zong sap ding 80% kithukim khin uh hi. Malaysia zong lasa in Mary Lun leh lasiam pawlkhat tawh na pha khin uh hi. Amah pen Zomi lasiam minthang mahmah khat ahihangin pahtawina a tam ngah lo pawl hi kha ding hi. Ahizongin Pasian in hun asak ciangin a lapsang nopte lamto veve hi. Lasiam Kapno ading in mualdawn pan in a tumsa zingni hong suak kik ciciai ta hi. Khangno tampi takin " Kapno aw, Stage tung hong luahkik in, na innteekna mun hi" ci ziahziah ta uh hi.
Francis Lam Thang
Zomi Quavadis
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.