Lasiam Interview Jenny Zenthiansiang

~ By : Kam Khenpau Tonsing

LP: Lamka Post  |  Jenny: Jenny Zenthiansiang

Bio-data:

Min: Jenny Zenthiansiang

Pa Min: T. Zamlunmung

Nu Min: Parmawi

Date of Birth: 24th February, 1996

Present Address: New Lamka, Vengnuam

Education Qlfn: BA 3rd Sem.

LP: Eimite lak a lasiam minthangtak na hi a, bangchik a pan lasak na na pan a ?

Jenny: Ka neu a pat a lasak lunglut ing a, hileleng lasak a ka career hong kipat na taktak chu Hornbill's Little Star, 2008 a kisainung a pat ahi.

LP: La siam mawngmawng na hi hia ahihkeileh kizil a siam na hi hia ?

Jenny: Pathian in lasak theihna hon piak ahi a, a siam mawngmawng chih le hilou lah kizil a siam chih di le hituanlou..haha

LP: Album bangzah na bawlta a ? Maban ah bawl zom zel na sawm hia ?

Jenny: Album tua ka honkhiak thak sitset “Ka Hatna Toupa" pen a thumna (3)  ahita. Maban ah leng Pathian honpi dandan ahiding.

LP: Na lasakte lak ah nang phuah bangzah a om a ?

Jenny: Uhoh! Ken la phuah neilou...

LP: Album piching hilou la record bangzah na bawl kha ding ?

Jenny: Kei album a tellou la, a video om toh omlou in 30 vel a pha di.

LP: Na lasakte lak ah bang la hoih nasa pen a ? Kua phuah a ?

Jenny: Ka lasakte a vek in hoih ka sa vek a, hileleng U, V. Hangpu in a phuah “Kiik thei ka hi nawnlou" chih la pen a thu hoih ka sa petmah.

LP: Music lam a i gam a khantouh theih taktaklouhna ziak bang hi'n na thei a ?

Jenny: Mipite' leh lasate' kikar ah kinungthuapna muh ding a vangluat ziak hi'n ka thei.

LP: Pathian la leh gam ngaih la banah zawl la toh kisai bang ngaihdan na nei a ?

Jenny: Pathian la, gam ngaih la leh zawl la kei ngaihdan in a hoih vek. Hilele kei mimal sak di'n Pathian la a Pathian pahtawi ka teel.

LP: La lam toh kisai in i gam leh i minam bang dinmun a om hi'n na thei ?

Jenny: La lam ah kikhang hiaihiai hi in ka thei. A lasa ding leh a phuak ding chu kitasam khollou eive.

LP: Khangthak lasatu dingte kiang ah bang 'thuchah' na khak nuam a ?

Jenny: Eilam lasak bangmah tan tunglou kichi gige in chin huai a dikvek hituanlou ahi. La i lunglut taktak a i hunteng i piak theih ding nak a leh kipat ding. Bangmah dang in hong sukbuai kei ding nak a leh kipat ding.

LP: Chin-Kuki-Mizo-Zomi-te lak a Gospel singer-te lak ah kua na ngaisangpen a ?

Jenny: Nu Lianlunching ka ngaisangpen ahi mai.

LP: Chin-Kuki-Mizo-Zomi-te lak a 'love song' leh gamngaih la singer-te lak ah kua na ngaisangpen a?

Jenny: Nu S. Chingnu' aw hoih ka sa a, ngaihsanhuai ka sa.

LP: Nungaklai, la siam leh melhoih zawmahlai na hihchiang in, tangval tampite lungsim luahtu na hi a, tua ziak in LAM-ETNA a omlai diam chih bangle kithei nuam dan hive aw.

Jenny: Hon hilh leng ‘surprise’ huailou law di hi veh aw, haha. Lam-etna omlou chih om ngeilou pi a, hilou maw ?

LP: I gam a lasiamte'n a phutawk uh pahtawina ngah uh hi'n na thei hia ?

Jenny: La sa kichi in pahtawina deihziak a la kisa hi mawk khollou inchin, hileleng deihhuai ka sak chu i kipahtawi ding tan in kipahtawi zoukei lehangle kigensiat chiing keile, huai kha pahtawina chikhat hi'n ka thei.

LP: Lasak toh kisai in pahtawina bangbang na na ngahta a ?

Jenny: Lasak kidemna ah pahtawina tam hun tawk, School, College leh Biakinn chihte ah ka tang a, huailou in Hornbill's Little Star 2008 title; ZOLMA User's Choice Top Singer Award (Female Category) 2012; Vengnuam Weekly News Gospel Music Award, 2013; ZOCUVOS a pat leh Memento a dangdang tamkhop ka sangta.

LP: I gam a social media - facebook leh whatapps zatdan hoih huntawk hi'n na thei hia ?

Jenny: Mahni in hoih i sakdan chiat a zang tuh i hi a, hilehleng zat dan pilvan poimoh ka sa.

LP: I gam in a taksap lianpen bang hi'n na thei a ?

Jenny: I gam a taksap lianpen tuh “Diktatna” hi’n ka thei.

LP: La tungtawn a i gam a minthang na hihziak in, hiai toh kisai a haksatna na tuah bangbang a om a?

Jenny: Hon ngainate'n hon chialnate uh a vek in ka suk buchingsak theikei a, lehkha simlai ka hih ziak in. Ban ah i market uh neu lua a lah a lei di le haksa kisa ahihna ah, ki-support zoulou deuh i hi dua aw ka chisim.

LP: La lam a hon hanthawntu (inspire) bang/kua ahia ?

Jenny: Ka pa leh ka nu'n la ka sak ding himhim a hon sakpih ua, hon hanthawn gigetu ahi uh.

LP: La siam na hihman in, la sa in mundang/gam dang koi munmun ah na paikhata a ?

Jenny: Churachandpur district sung ah khua tamzaw ah ka sa kha phialta dia, Imphal, Mizoram, Guwahati, Delhi, Myanmar chih teng khawng ahi di.

LP: La siam i neihsunte mipi'n hichih zaw deuh lehang khangtou zaw ding i hi uh chih khong ngaihdan na nei hia ?

Jenny: I mi-le-sate’n la a hong sak uh leh i gam kekletna ding, i gam khantouhna di, i biak Pa Pathian deihna bang a kalsuan a i na ngaihtuah diing, i na kithuahpih ding, i na hanthawn ding, huai hileh kikhangtou thou di hi veh aw.

LP: Lamka Post na na simkha zel hia ? Lamka Post in i gam a artist-te hanthawnna a hihtheihkhawm a hiai bang a houpihna a kineih zel pen bangchi na sa a ?

Jenny: Sim kha zel lua. I daily newspaper ahih bang. Hoih ka sa mahmah. Lasate hanthawnna hoihtak ahi a, i culture leh tradition uh leng tawisanna ahi kawm in ka thei. Sutzoptouh ding in ka deih mahmah. The Lamka Post, Toupa'n hon vualzawl hen.