Interaction with B. Muan Ngaihte and The Lamka Post

Zi neih ding chu Mang a leng ka mat bat nailouh ahi: B. Muan

BIODATA

Min: Thanglungmuan Ngaihte @ B. Muan Ngaihte

Pa min: Tualkhanpau

Nu Min: Manzangai

Pianna khua: Bungpilon

DoB: 10^th October 1993

Siamsinna lampi: Class A – CL- VI,  Bungpilon khua ah, Class VII – VIII, Convention English high school Sinzawl. Class IX - XII Rayburn High leh College leh tulel in BA 2^nd year CC Pur College ah simlel hi.

Lunglutna: Gamngaihla leh Pathian lasak.

Mr N. Tualkhanpau leh Mrs Manzangai-te goutan 5te lak a, a upapen B. Muan Ngaihte in kum bangzahhiam paisa sung lasak leh music lam lunglutna liantak toh hun ana zattouh sung in la bangzahhiam phuakkhia a, tuate lak ah bangzahhiam recording ana bawl in khopi sung ah khahkhiak in omta hi. Huaite banah, tulel in leng amah a kipan Album piching masapen ding in Pianna zogam (Zogam Government) kichi bawllel a, tukum sung a khahkhiak ngeingei lamen a hihdn gen hi. Album thak a la 14te toh simtel in tuchiangin la 28 khumkheta a, tuate lak ah 9te Video motion picture toh thuah in om hi.

Hun Mualliamsa suut kikthakna

The Lamka Post palaite a kipan dotna a dawnna ah, Lasak kichi pianken a, a siamna hichiah kei mahleh lunglutna liantak toh lasak kithalawp in neuchik a hih lai a kipan Local saptuam sung a solo competition chihte ah ana kiheltou hi. Hun hong paizel in 2008 kum in single masapen Pupa Satsa kichi gamngaihla hoihtak hon khahkhia a, tua zomtu ding in Nancy Biaklun album ah “Zotate Gibang Khenzong’ chih leh Nancy toh collaboration in ‘Khuam Bang Kipni’ kichi ana sa uhi.

Huchibang hun lai mah in Donbosco huangsung ah FALCON band in concert hongnei ua, amaute performance in B. Muan lungsim tokthou zou mahmah in lasak lam ah lunglutna leh thanopna liansem guan hi. Hiai tungtang a genna ah, FALCON band in Donbosco compound a concert hong neih ding chih ka theih in nitaklam an nelou zen in amun ka delh a, himahleh ana kipat deklouh ziak in sawtpi mahmah kangak hi. Bangtanhiam nung in performance hon pan ua, stage mai ah dinsa in a bul a kipan a tawptan lunglut tak in ka ngaikhia hi. Hiai band tuh nakpitak a kei hon inspire-tu masapen ahi uh chi hi.

Tua banah, 2010 kum in Pastor Thangzamang in a phuah, “Khamuang in Toldam Hieuhiau taning’ kichi hon sakhe nawn a, ZOAN biakinn leh Tuailai 2010 Music Fest chihte ah hiai la a sakkhiak a kipan in a minthanna taktak hong kipan hi. Himaleh hiai single motion picture bel tukum in bawlkhe pan hi.

Tuanung in mun tuamtuam a Moukhakna, Moulopna leh social vai, nam vai a ZYA Unit honna, 2011 Zominamni (Suangdoh), 2011 Paihte Nam Khawmpi (Sinzawl), 2014 Global Zomi Alines Khawmpi lian chihte ah tatsat lou in ana kiheltou a, 2013 kum in YPA-GHQ a kipan pahtakna lai, Memento ana sang hi.

A career in awlawl a ma sawntou zel in Shillong, Mizoram Champhai, Songtal Camp Muvanlai leh Burma(Myanmar) ah Tedim, Tuithang chihte ah video motion shooting leh lasa in ana kuankheta hi. Burma a om Zomi nam tuamtuamte tungtang a genna ah, amau bel eilamte bangloutak in a siamthei petmah ua, beh leh phung banah tribe min a kikhentuamna himhim omlou in Unau sanggam Zomi-te chin siamtak in mi vaidawn thei uhi. Huai mah bang in eilam in leng, Unau Tedim, Chiin-te chia tuambawl sese lou in Unau Zomi-te chithei leng deihhuai ahi chi hi.

B Muan in 2008 kum a zawlla masapen ‘Khuambang Kipni’ kichi a puah khit nung tuni tan in zawlla dang phuahbeh nawnlou a, huchibang late amah phuah dia vou lua a sak ziak in maban ah leng phuah leh sakbeh sawmlou a hihdan gen hi. A lehlam ah Pathianla leh Gamngaihla a lunglutna lianpi a neih ziak in huaite mah pibawl ding in kisa lel hi.

Gamngaihla a lunglutna lianpen a neih tungtang a genna ah, Neuchik ka hih lai a kipan Zogam haichilh khat kahi a, bang ziak tak a ana haichilh kahia chih leng ka kithei tuankei, himahleh lungsim ah bel veina kanei a, zawlla sak sang in Gamngaihla sak ka telzaw tham chi hi.

Tua a bawl lel, “Pianna zogam (Zogam Government)” kichi bawlkhiak ding a lunggulhna sawt kuamtak hita mahleh sum leh pai a haksatna a tuah ziak in lamzang tak in ana paipih theilou hi. Himahleh tu in bel tawsawntu ding deihsaktu khenkhat ziak in Album bawlna in ma sawnzel a, la 14 teng recording zouta a, tun video editing pailel hi. La 14-te lak a 4te amah phuah hi a, a dangte bel Gamngaih lalui hoih pipi, Muanngaihte leh V. Paukhansiam late bangzahhiam telkha ding hi.

B. Muan in tuni chiang a, a la sakkhiakte lak ah Zotate gibing khen zong kichi deih tungtuan hi. A ziak bel, Zomite Kawlgam Vaigam ah kikhen zongleng unau khat i hihna uh bei tuanlou ahi chi hi.

Album thak ah music lam khoihtu ding in Game village a om Go-Hau, Ch Kyawkhine, Khupnang leh Muanla Tunglut leh Robert Hmar chihte hi ua, Recording bel Mualal Home studio leh Faith Tune Recording ah bawl hi.

Zawlla sak tungtang B. Muan in a genna ah, Mi tampite’n ana genzel bang un Pathiai in Numei lah pasal kal a iitna kichi ana bawl inchin zawlla i chih chiang in a sia hikhin pahlou hi. Etsakna din Pastor khat in nungak ngai taleh, kon ngailua chin a ngaihna thu gen kha thei, huaipen a kaih bawl a I sakthoh chiang in zawlla hongsuakmai hi. Huaiziak in zawlla narante bel a diklouhna ding thupilua omlou hi. Himahleh ken bel ka phuah masak leh ka sak masak ‘Khuam bang Kipni’ kichi lel leng hun kasa mahmah chi hi.

Tamtakte’n ana mekmat tak ziak ua nu leh pate’n a huphulh mahmah uh, Music leh Drugs tung a genna ah, Music leh Khamtheih kichi paikhawm theilou himhim ahi. I lasiam lui bangzahhiam khamtheih kol a, ana tangte i et leh Music lam ana khoihkhalou hileu leng Khamtheih bel khoih veve ding uhi. Music a lutma ua ana zongsang khinta a hih ziak un a hinkhua uh normal a, a zat theihna ding ua lasak kawm a khamtheih a hih uh amah a dia a loutheihlou ana suak kha ahi. A ziak bel normal lou a, a om chiang un la leh tumging a deihbang un khoi in satheilou uhi. Huaiziak in khamtheih toh Music ana tonkhawmsakte peuhmah a tupna tan uh tungzou omlou uhi.

Ana masa deuhte lak ah V Paukhansiam, Lengtong Paunou leh LL Muana chihte laphuah siam kasa, amaute’n vision neitak a, a phuah uh a hih manin a laute uh leng tul theilou hi. Gospel artist lam ah H. Biakson, Jenny Zentiansiang, TS Khai (Agape) chihte ngai thupi mahmah hi.

Ngaihdan kikupna leh Hasotna

La kichi chu a lunglut peuhmah in saksak ding himai, a ziak bel gam changkangte bang in ei lak ah a kizilna ding kineilou hi. A bik in naupangte biakinn leh a dangdang ah saktheihna peuh a sak di himai ahi.

Huaibanah, kipahtawi siamna a poimawh hi. Etsakna din, zum pi a kuahiam khat in la hon sak sunsun chiang in na siamlua va chih maipen haksa hetlou hinapi a satu a dia hasotna manpha mahmah himahleh eimite’n kiching siamlou hi. Tua naksang in, a siamlawna a hilele chih kinei sese hi.

Market toh kisai in bel hunpaisa ah i market a lian hetkei a, kingakna tham leng a chingkei hi. Himahleh tuchiang in bel khantouhna leh masawnna ziak in khovel neu petmahta a, link I bawlsiam nak leh market lian in nekching suak theita hi.

Bangchileh Burma a I unaute toh music lam a i kizopna uh a hoih thei dia chih dotna a dawnna ah, ‘hunpaisa a kizopna ginalou pen Communication gape ziak ahi. Rangoon ah Gloria Niangboi cassett puaklut a hih lai in amaute’n a la mumal theisiamlou uh. Tu in bel ZAA leh ZOMUS in kizopna hoihtak nei a, amaute’n Album approval a bawl peuhmah uh amau panlakna nuai ah zuakkhiak hiding hi.

Tuni chiang a khovel gamchih in a buaipih mahmah Gay marriage toh kisai ngaihdan kikupna ah B.Muan in bel pomthei lou hithet hi.  Pathian in Adam a balw in a lawm din Eve (numei) a balsak sese hi. Huaiziak in gay marriage bel dik satheilou himai.  Huchibang kawmkal ah aman bel koppih neih ding mang a leng man ban nailou a hihdan gen hi.