Tuathu Boyoke Aung San akici Rangoon University pan aa sang man khin sa Kawl lulee,Muutpu,Miteisan khat in atheih tak ciang in England gam ah vapai in British Emperior Prime Minister Mr. Atlee tawh vakimu in Kawlgam suahtakna ngahna ding in ngetna vanei hi.Tualai ah PM Atlee in Boyoke Aung San tungah bang na gen hiam cih leh (suahtakna pen nong ngen kei zongin piak dingin gelna akinei khin sa a hihi.Ahizong in Mualmite ahih vua leh amau ii lungsim khensat na dan tawh kisai ding a hihi.
Mualmite in Kawlmite tawh kipawl in Suahtakna lakhawm nung acih vua leh kingah aa,ahih kei leh amau bek in atuam vilvel in la nung acih vua leh zong kingah hi.Ahizongin noih Kawlmite in Mualmite tawh kipawl in Suahtakna nalak khopnop vua leh Mualmite ii lungsim khensatna te nadot masak phot uh kul ding aa Mualmite in noih Kawlmite tawh Suahtakna lakhawm nung acih vua leh Suahtakna la khawm nung acihna thukimna aneihna uh Agreement Laidal pi nong lah kul ding a hihi na ci hi.
Tua ahih man in Boyoke Aung San zong Kawlgam ah hong ciah kik vingveng pah in Mualmite tawh kipawl in Suahtakna lakhawm ding in Mualmite na zolbawl in na Siizong kawikawi hi.1946 Nov 28 ni in Myitkyina Khuapi na tung in 29 ni in Kachin makaipite tawh kimuhkhopna aneih na ah Boyoke Aung San in Kachin makaipite kiangah (Noih Kachinte in nakhantoh nop vua leh Koih Kawlmite tawh Suahtakna lakhawm ding hihang,Na Khantoh nop keivua leh Mikangte thugen na mang un.Suahtakna ngahkhitciang in Kachin gam pen noih Kachinte in nadeih bang in na uk ding uh aa koih Kawlte in hong ukding hilo hi ung.Biakna zong noih deih bangbang suaktatak in nabia thei ding uh aa,Galkap tawh kisai ahih leh Kachin galkap atuam vilvel in kong nei sak ding aa Sabak,Sa sehhawm na lam ah a hih leh Kawlmite in (1 Kyat ) Pek khat angah leh Kachinte in zong (1 Kyat ) Pek khat na ngah ding uh hi.
Noih Kachinte in koih Kawlmite ahoihlo dingin nong upmawh vua leh ataktak ah hong kipawl pih sin un.(Tuhun aa Kawlmite pen nidang hunlai aa Kawlmite tawh kibang nawmlo hi cih thu kong gen nuam hi cih dan in Boyoke Aungsan in Kachin makaipite na Siizong hi.Kachin Makaipite zong ataktak ah bangteng piang ding cih dan hong ngaihsun nawm lo in Boyoke Aung San thugen pen lunglut leh hoih hongsa tek uh hi.
Atatak ah Kachin te pawlkhat bel Boyoke Aungsan tawh kipawl ding utlo uh hi.Banghang utlo uh hiam cih leh 1946 Dec 2-3 ni in Mikang Mualtunggam Ukpi pa H.N.C Stevenson in Kachin makaipi te vakimuh pih in Kachin makai pite kiangah (Noih Kachin gam pen Gam khat in kong ciamteh ding uh aa,Suatakna zong atuam in la dingin gelna kong neihsak uh hi.Ahizongin noih Kachinte in Kawlmite tawh kipawl in Suahtakna na lakhawm nuam uh aa,Kawlmite tawh kakikhen kei ding uh hi ci-in lungkimlohna thu hong gen na hih man un Koih Mikangte in zong khensat dan ding hamsa kasa uh hi.
Tua ahih man in koih Mikangte lam pan in (ngaihsut piakna) Advice kong piak nop in Kachin gam pen Gam khat in ding nuam ung,Suahtakna zong kawlmite tawh kipawl lo in atuam in kala nuam uh hi ci-in na milip un kithutuak tak in ngetna nei khawm un.Noih Kachin te ii kisap Pilna,Siam na atuamtuam te leh Ki-ukna leh (Medical) Zatui lam tawh kisai pilna te zong hongsin sak in kong hilh ding uh hi.Kawlte peuh mah tawh Suahtakna akibang in lakhawm kei un,Kawlte pen noih Kachin te sang in mipil tam zaw leh (Population) mimal tamzaw uh a hih man in damdam in hong valtum lel ding uh a hihi ci-in ngaihsut piakna nanei hi.Hih Mikangte ngaihsut piakna pen tuhun tak ciang in Kachin mipi te in natelsiam ta uh aa, ahizong in naziakai ta uh hi.
Boyoke Aung San in Kachin te a Siizong dan mah in Zomite (Chin) leh Shan minam te zong na Siizong hi.Acil in kipawl khawm ding in Mualmite na ut paklo uh hi. Ahizong in 10.2.1947 Kum tak ciang in Shan gam Panlong Khuapi ah Boyoke Aung San leh Mualmi makai te ni 3 sung nasiatak in thukikupkhopna nei uh aa tua thukikupkhopna sungah Boyoke Aungsan in akibang in Suahtakna ii lakhawm ding aa,gam khat (Belpawl gam) ii phut ding hi.Belpawl gam ii phut khitciang in Belpawl gam pan in napaikhiatnop uh leh paikhia thei hi uh teh cihdan in na Siizong ahih man in atawp na ah Mualmite zong na thukim uh hi.Karenni (Kaya) te ahih vua leh lengla dan khat in kihel in Kum 10 acing khit ciang Belpawl gam pan in a ut nawm kei vua leh paikhia thei uh a hihi.
Tua ahih man in tulaitak aa Beelpawl gam Republic of Union of Myanmar akici pen Belpawl gam 5 kigawm aa akiphuan khia hi aa,Kawlte bek ii neihsa hilo ahih man in Ei pau in Kawlgam hilo aa,Belpawl gam i cih ding hi zaw hi.Kawlgam icih ciang in Kawlte ii neihsa dan khat tawh kibang hi.
Laigelh:Pau Mung.
S:Jinghpaw kasa
#Tukum pen hih letmat thuh te innkuan pihte 2ta sam uhaa panglong ngiat ah kibawl hi.
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.