Leitung mun tuamtuam a om Zomi akua mapeuh:
Tapidaw ta dingin athupi pen Lungdambawl hun hong tungkik ding hita hi. Ei Zomite i vekpi phial in Tapidaw Pasian thu um te ihih manin Lungdambawl pen Zomite pawi lian pen khat zong kici thei hi. Zomi u leh nau akua mapeuh in na omna tek uah na innkuanpihte uh tawh ahi zongin, na pawlpite uh tawh ahi zongin Lungdambawl nuam taka azang thei dingin kong lam-en uh hi.
Leitung mawhnei mite tankhia dinga Pasian taktak ahi i Topa Zeisu in leitungah a lu hong ngak ni pen leitung a ni thupipen ni ahi hi. Leitung mi khempeuh tankhia ding a hong pai ahih hangin leitung mi atamzaw in sang lo in nial uh hi. Ahi zongin, Pasian hehpihna tuam vilvel in ei Zomite in i ngahkha a tua Tanpa leh atatkhiatna sang thei, um thei ihih manin leitung minam khempeuh lakah thupha ngah minam taktak ihi hi. Anungta Pasian leh atatkhiatna thu sang thei bek zong hi loin, tatkhiatna lungdamna thu atangkokhia dingin Pasian in hong teel sawnsawn hi. Pasian zat minam ihi hi. Tukum Lungdambawl hunin Topa tungah lungdam ko ciat ni.
Topa Zeisu leitungah kilemna bawl dinga hong pai ahi hi. Mihingte leh Pasian hong kilemsakkik hi (Zm.5:10). Judah mite leh Gentile mite pumkhat hong suak sak hi (Eph.2:11-16). Zomi khempeuh kilem a pumkhat suah ding GZA i bulphuh lianpen ahi hi. Tua ahih manin tukum Lungdambawl hun a kipan mailam ah Zomite kithutuakin, kipumkhatin, khut kilen a i kalsuankhop ding i kihanthawn nuam hi. Tua banah, Topa Zeisu a bukim nuntakna pia dinga hong pai ahi hi (Zhg. 10:10). Zomite a bukim khantohna, a bukim nuntakna neih ding zong GZA i bulphuhpi khat mah ahi hi. Tua ahih manin tukum Lungdambawl hun a kipan mailam hunte ah Zomite a bukim nuntakna nei dingin Topan hong siam tahen cih i thungetna leh i ki-aapna hisak ciat ni. 2017 kum, Zomite abukim khantoh kipat kum hi tahen!
LEITUNGBUP A OM ZOMI KHEMPEUH TUNGAH A NUAM MAHMAH LUNGDAMBAWL LEH DAUPAINA TAWH KIDIM KUMTHAK HONG TUNG TAHEN.
GZA Central Executive Committee
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.