LST i et ciangin nipini kikhop pen biakpiakna kici ngeilo hi. Ahi zongin tuhun ciangin nipini kikhopna bek pen biakpiakna a sa kitam mahmah a, tua kikhop hun sungah ‘praise n worship’ icih pen bek biakpiakna a sa zong kitam zaw kan lai hi. Tua ahih manin khangno tampite pen ‘praise n worship’ khit ciangin pusuak mang uh a, Pasian thu peuhmah duh lo-in amau nopsakna bek zong uh hi. Pasian deihna tawh kituak-a biakpiak ding sawmlo-in amau deihna tawh kituak bek-in gamta zaw uh hi. Pasian a lungkim diam, cih sangin kei ka lung a kim hiam, nuam kasa hiam, cih bekbek kingaihsun zaw hi. Ka music, ka aw, ka la, ngaih a kisa hiam; ‘mood’ a lut hiam, cih bek kingaihsun a, Pasian san theih biakpiakna ahi diam, cih peuhmah kingaihsun lo hi. Pasian bang ka pia diam, cih sangin ken hih biakpiakna panin bang ka ngah diam, cih bekbek ki-ultungsak zaw hi. Hih pen Christian tangthu ah a dahhuai pen khat hi dingin ka um hi!
LST i et ciangin biakinn ah ahi-a, mun khatpeuh ah ahi zongin biakpiakna pia dingin kikaikhawm ngeilo uh a, nipi kaalkhat-a ni masani-a a kikaihkhopna uh zong biakpiakna pia dinga kikaikhawm uh hi masa lo hi. Nipini-in bel kikhawm mah uh hi. Ahi zongin LST sim ding, thungen ding, lasa ding leh thugen/thugenngai ding leh (1Cor 14:15; 1Thess 5:25, 77; 1Tim 2:8; 2Tim 4:2; Heb 2:12) nekkhawm ne dinga kikhawm uh ahi hi. Tua bangin a kikhop uh ciangin sumpi zong dong uh hi (Acts 20:1; 1Cor 16:2). Pasian biakna sungah hih bang tuamtuamte a kihel hi bek a, hihte bek pen biakpiakna kici ngeilo hi. (Lasakna tawh biakpiakna, thungetna LST simna, thugenna thungaihna, sumpi piakna tawh biakpiakna). Tua hi-a,mit tawh muh theih kikhopna, mipi kikaihkhopna, pawlpi mite khawlkhopna pen biakpiakna kici ngeilo a, mun khatpeuh le kipawlna khatpeuh ah biakpiakna pia dinga kikaikhawm, cih bang zong om ngeilo hi. A tomin gen leng, pawlpi mite kikaihkhopna pen ‘biakpiakna’ kici ngeilo a, biakpiakna pia dingin zong kikaikhawm ngeilo uh hi.
Tua ahih leh biakpiakna i cih in bang hiam?
‘Boksuk,’ ‘bia’ (Gk: proskuneo) cih kammal pen biakpiakna kammal lakah a kitamzat pen hi-a, LST Thak sungah 48 vei bang kizang hi. Hih kammal a kizat simin mimal (Pasian/Zeisu) mai ah kibok, kibia, kikun, cihna-in kizang hi. Lungdamna thubute sungah 26 vei kimu a, Kilaakna bu sungah 21 vei kimu thei hi. Paul in khatvei bek zanga tua nangawn thu-umlote in Pasian a biakna uah kizang hi. Hih kammal kizatnate i et ciangin mimal (kimu thei, kilawng thei) a kibiaknate ah kizang zaw a,Zeisu vankahma (Gospels) le Zeisu hong paikik khit- a (Revelation) biakpiaknate khawngah kizang hi. Mimal (Pasian/Zeisu) mahmah om ngiat-a, a mai-a boksukna, kunna, biaknate ah kizang zaw hi.
Pasian a bia peuh mah in lungsim le thumaan thutak tawh bia ding a, mual tung ahi-a, Jerusalem ah ahi zongin mun khatpeuh bulphuh-a biak ding hilo hi. “Mual tung le Jerusalem” ah biak ding hilo a, “lungsim le thumaan thutak” tawh biak ding ahi hi. Upmawh biak ding hilo-a i theihna tawh biak ding ahi hi (John 4:21-23). Ei ut banga bawltawm phuahtawm ding hilo-a, LST sunga Pasian hong kilaakna, Pasian thu thei-a tua i theihna tawh biak ding ahi hi. I theihloh Pa koici biak theih ding ihi hiam? A thu i sim noploh Pa koici it theihin koici up theih ding i hi hiam? Amah le amah hong kilaakna LST bulphuh lo-in Amah koici biak theih ding ihi hiam? Muk le kampi bek tawh biak ding zong hilo a, lungsim takpi tawh biak ding ahi hi. Banghang hiam cih leh lungsim taktak kihello, muk le kam bek tawh biakpiakna pen a mawkna ahi hi (Matt 15:8-9). Tua hi-a, ‘boksuk,’ ‘bia,’ ‘kun,’ (Gk: proskuneo) cih kammal pen mun khatpeuh leh hun khatpeuh-a Pasian biakna-in kizang lo a, vanglian khatpeuh ih mai-a boksukna, kunsukna-in kizang zaw hi.
Greek kam-a ‘latreuo’ cih zong biakpiakna kammal-a kilimzat mahmah khat ahi hi. Paul in hih kammal a zat ciangin nipini kikhopna biakpiaknate a gen hilo a, alungsim khempeuh tawh lungdamna thu a genna tawh Pasian a biaknate a genna ah zang zaw hi (Rom 1:9). Eite in Kha tawh Pasian a biate, ci le sa a suanglo – upna tawh Pasian a biate ihi hi, ci hi (Phil 3:3). Tua banah, “na pumpi uh a hing biakpiakna, a siangtho le Pasian san theih dingin pia un. Hih in note sep dingin a kilawm biakna nasep ahi hi,” ci lai hi (ZSV, Rom 12:1). Tua hi-a, Paul in hih ‘latreuo’ cih kammal a zat ciangin mun khatpeuh-a Pasian biakna-in zanglo a, lungsim le kha, i nisim nuntakna mahmah tawh Pasian i biakna-in zang zaw hi. I nisim nuntakna, i hinna limlim pen biakpiakna-a zat tawntung ding hi, a ci ahi hi.
LST Lui hun lai-in gangawh biakpiakna nei uh a, ahi zongin LST Thak hun teh Zeisu sihna hangin gangawh biakpiakna kisam nawnlo hi. Phatna le lungdamkohna biakpiakna piak ding hi-a, nisim nuntakna ah na hoih sepna tawh ahi zongin citpiakna tawh ahi zongin biakpiakna piak tawntung ding ahi hi (Heb 13:15, 16). Citpiakna tawh biakpiakna pen Pasian aa dingin a namtui leh a santak biakpiakna suak hi (Phil 4:18). Tua banah Paul in Zeisu aa dingin a nuntakna piakhia-a a sihna zong biakpiakna hi (dawn biakpiakna), ci hi (2Tim 4:6).
Tua hi-a, biakpiakna icih pen mun khatpeuh-a kikaihkhopna hi peuhmah lo ahihna kimu thei hi. Gangawhna leh biakinn sunga nasep tuamtuamte zong hilo- a, a puatham nasepna peuhmah hilo hi. Nipini kikhopna bek hi zenzen lo-a, nisim naisim-a i nuntakna mahmah a gen ahi hi. Puatham hi kei, a sungtham hi zaw; mun le mual hi kei, lungsim le kha hi zaw; biakinn sung hi kei, lungsim sung hi zaw …
“Tua ahih manin nekna dawnna a kipan na khat peuhpeuh na hih uh ciangin Pasian minthan na dingin na hih un” (1Cor 10:31). “Na kampau uh ahi a, na gamtatna uh ahi zongin nasep na bawl khempeuh uh Topa Zeisu minin sem un la, ama tungtawnin Pa Pasian tungah lungdam na ko un” (ZSV, Col 3:17). Hih in LST Thak biakpiakna ahi hi – ihih khempeuh Zeisu min tawh Pasian minthan na ding!
Biakpiakna taktak, ‘Praise n worship’ taktak i neih theih na ding leh ihih khempeuh Zeisu min tawh Pasian minthanna taktak a suah theih na dingin “ka si a ka hing zongin ka pumpi tawh Khazih minthansak ding lunggulh in ka lamen hi. Banghang hiam cihleh nungta hi leng Khazih aa ding hi a, si hi leng a met zaw ka hi hi” i cih theih ding kisam hi (ZSV, Phil 1:20-21). Pasian san biakpiakna a pia thei ciat dingin TOPA in thupha hong pia ta hen!
Note: Hih Article i sim leh “Nipi Kikhop Kul Sese Maw: Pawlpi ka Nuak lel diam?” cih article zong sim ding …
By: Lian Muan Kim, PhD
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.