Pastor te ih Sawltak maw?

Pasian hehpihna tawh Zomite in i tuntunna ah pawlpi i nei tek hi. Cial zo-in cial zo ta kei le hang pawlpi Sia/pastor zong a tamzaw in i nei hi. Pastor-te in zong Pasian a itna uh tawh pawlpi mite hong it-in ahih theihna khempeuh uh tawh hong huhnuam uh hi. Sum le paai, pilna siamna, hun, thatang leh ahih theihna bangbang uh tawh hong huh uh-a, thu le la khatpeuh hangin ei deih bangin hong huh zawhloh uh ciang i khasia ngam liang hi. Tua ahih leh pastor icih in bang/kua hi-a, a nasep ding uh bang hiam, cih tawm kikum ding hi hang.

LST in pawlpi makai panmunlen ding tawh kisai hih bangin hong gen hi: Pawlpi kem/cing/vaan pawl leh pawlpi sunga nasem pawl ahi hi. A masa pawlte pen pastor (poimen), bishop (episkopos), leh elder (presbyteros) kici kawikawi thei-a, pawlpi kem/makai/cing/vaan/siate cihna ahi hi. A pawl nihnate ahih uh leh upa(te) (diakonos) kici a, pawlpi nasemte, thu le la vaihawmte ahi uh hi. Pawlpi siate ahi uh zongin pawlpi upate ahi uh zongin LST in pawlpi ukte ci ngeilo hi – Zeisu Khazih bek in pawlpi uk ding hi (Eph 5:23).  

Kuate Pastor Suak thei:

LST sang kah ahih teh pawlpi sia semsak ni; ‘degree’ sangpi ngah ahih teh ‘senior pastor’ hisak ni, a dangte sang khasum tam sak zaw ni, cih bang om theilo hi. LST sang kah ngeilo ahih teh sia suak theilo ding hi, ci zong om thei tuanlo hi. LST in pastor-te laitan (education) ding hong gen ngeilo-a, a hihna uh leh a nuntakna zia ding uh (character/qualification) hong gen zaw hi.

Tua hi-a, LST in pawlpi sia a sem nuamte aa dingin hi bangin hong gen hi: Mi khatpeuh in pawlpi kem sia a ut leh nasep hoih a deih ahi hi cih thu in thuman thutak ahi hi. Pawlpi kem siapa in kawkban na ding a omlo mi, zi khat bek a nei mi, pumpi ki-uk zo mi, lungsim ciimna a nei mi, a zahtakhuai mi, zindo a siam mi, thu a hilh thei mi hi ding hi. Zu a dawnlo mi, lungtomlo mi, nunnem mi, kitot a hatlo mi, sum iplahlo mi, hazatna lungsim a neilo mi hi ding hi. A tate in zahtakna le kiniamkhiatna tawh a thu a man, a innkuan sung hoihtak-a a uk zo mi hi ding hi. Banghang hiam cihleh mi khat in a innkuan sung a ukzia ding a theih kei leh bangci bangin Pasian pawlpi kem thei ding ahi hiam? Thu-um thak mi zong hilo ding hi. Tua hi kei leh kiliansak in Dawimangpa bangin thukhenna a thuak kha ding hi. Tua thamlo in a kigensiat loh nading le Dawimangpa thangah a awk loh nadingin a pualam mite in a thupisim mi hi ding hi, ci hi (1 Tim 3:1-7).  Hih banga Pasian hong khunsak pawlpi pastor-te hihna (qualification) ding tawh kisai i et ciangin pawlpi pastor pen ‘numei’ ahih theih na ding thu omlo ahih lam zong i phawk ding thupi hi.

Pastor sem dingte in hih a tunga hihna teng ka nei hiam, ci-in i kisittel masak phot ding kisam-a, i neih nai kei khak leh thungetna tawh i hanciam ding kisam hi. Pastor sem khinsate in zong hih a tunga hihna teng ka nei hiam, ci-in kisit pha-a, i neih khit leh i kepcing suak zawh na ding hanciamin i neih nai kei khak leh zong thungetna mah tawh i hanciam mahmah ding kisam hi. A zenzenin i innkuan nuntakna ah ahi-a, i pawlpi nasepna ah ahi zongin hih a tunga hihnate i neih ngei kei-a, zong i neih sawm tuan kei lai leh pastor i sep nawnloh zawk ding thupi hi. Kua man bangmah hong ci ta kei leh ei le ei pilvang tak-a i kihepkhiat lel ding kisam hi. Zeisu pumpi ahi pawlpi susia-in maizumsak kei ni.

Pastor Bangzah Om Ding:

Pawlpi khat ah pastor bangzah om thei ding, cih lian pen LST in hong genloh hangin nungzuipite phuhsa pawlpite ah pastor khat sangin tamzaw hamtang den ahih lam i mu thei hi (Acts 11:30; 14:23; 15:2; 20:17; Phil 1:1; 1 Tim 5:17; Tit 1:5; Jam 5:14; 1 Pet 5:1-2). Hih 1 Pet 5:1-2 ah bangci hiam cih leh “Note mah bangin makai khat ka hih banah Khazih thuak gimnate teci a pangpa khat ka hihna le a hong kilang ding vangliatna a ngahpa khat ka hihna tawh kizui in, note laka om makaite (pastor-te) kong hanthot nop thu in note laka om Pasian tuuhonte vak unla cing un. Sep loh phamawh hi cihna tawh hilo zaw in sepnopna lungsim tawh sem un. A maanlo a sum ngahnopna tawh hilo in lawpnatak tawh sem un,” ci hi.

Tua hi-a, LST in pawlpi pastor-te thu a genna khempeuh ah pastor khat bek hi ngeilo-a, pastor-te kici den hi. Pawlpi neu mahmah ta leh pastor khat sangin tamzaw den uh a (gtn: Philippi pawlpi), pawlpi gol zawdeuhte ah zong pastor khat sangin tamzaw den uh hi (gtn: Jerusalem pawlpi). Nungzuipite ngiat in zong pawlpite hanthawnin lai a khak uh ciangin pastor khat bangin kigen lel uh a, pawlpi uk tuanlo-in amau bek pastor in zong kigen ngeilo uh hi. Tua ahih manin pawlpi neu le gol tawh kisailo-a, Khazih pawlpi ahih nak leh pastor khat sangin tamzaw hamtang ding hi. Pastor nih le thum i neih hangin khasum a kibang-a sang/pia ding, cih bang omlo hi. Citak tak-a Pasian thu hong hilhte hamphat ding, ci bek hi (1 Tim 5:17-18).

Piangthak ihih nak leh Khasiangtho letsong a ngahlo i om kei-a, ahi zongin i ngah zah a kibat loh banah i ngahte zong kibang khollo zaw hi. Thuhilh theihna, gupkhiatna thugen theihna letsong a ngah khat leh thuvaan siamna letsong a ngah khat in pastor hong sem uh hen la, mi hanthot theihna, thungetna, leh thu khentel theihna letsong a ngahte tawh hong kop lai le uh bangzahta-in pawlpi cidamin khangto ding ahi hiam! Khasiangtho letsong i ngahna tawh kizui-a pastor-te in amau mun ciatciat panin pan hong lak ding uh ahi hi.

Tua bang ahih leh i pawlpite ah pastor lakbeh pah ziahziah ding maw? Khat sanga a tamzaw nei pah ding maw? Pawlpi sungah pastor sem thei dinga a kicing (qualify) mi a om leh a manlang theithei-in la-a, na sepkhop theih ding thupi ding hi. Ahi zongin tua banga a kicing a om kei leh tu-a kipan pastor pa ngiat in a mite pantah-a, a kizat theih uh ciangin zat ding ahi hi (Eph 4:12).

Pastor-te Sep ding Bang:

Pastor-te pen pawlpi mite sawltak hilo uh a, Zeisu tuucingte ahi uh hi. Tua ahih manin amau aa ding nasep thupi pen in Laisiangtho hilh ding (1 Tim 3:2), pawlpi mite hoihtak-a kha-an vaak ding, vaan ding, uk gawplo ding (Acts 20:28; 1 Pet 5:2-3), leh pawlpi mite aa ding thungetsak ding ahi hi (Jas 5:17).

Jerusalem pawlpi mite hong tam semsem uh ciangin nasep ding, mizawngte huh ding, an piak/hawm ding, cihte hong kisam hi. Tua ciangin Nungzuipite kiangah pawlpi mite hong pai uh a, hih a kisamte hong hihsak un, ci-in ngen uh hi. Ahi zongin Nungzuipite in hihte hong hihsak dingin upa tel un. Ko ka hih uh leh thugenna, thungetna le Pasian thu hilhna tawh ka hun uh ka beisak zaw ding uh hi, ci uh hi (Acts 6:2, 4).

Tua hi-a, pastor-te in thungetna le thuhilhna tawh i hun i zat tawntung ding kisam hi. Thu i hilh theih na ding le Pasian thu maan tak-a i hilh/khentel theih na dingin lai i sim kul hi. Pasian thu i telkheh theih na dingin LST i theih kul-a, LST hilhcianna tuamtuamte zong i sim kul hi. LST thei lua kisa-a, a bubup phial-a a lotngahte na ngawn in thu khatvei a gen ding uh ciangin nai 10-20 kikal bang kiging ngiat uh ahih leh ei a dangte in banghangin hun tampi la-in kiginglo ding ihi hiam. Pasian thugen ding pipi kiginlohna, kiginnoplohna in Pasian zangkhai ngaihsutna hi-a, Ama thu awlmawhlohna ahi hi. Pasian i it takpi leh bangci bangin ama thu awlmawh lo-in om thei ding i hi hiam? Tua banah, pawlpi mi khempeuh ih kha nuntakna pastor-te tungah kinga ahih manin zangkhai ngaihsut ngam huai hetlo-a, tua tungtawn-a Pasian thukhenna a ngatzaw-a kithuak ding ahih lam zong phawkdet huai hi (Jas 3:1; Heb 13:17).

Upa Bangzah Teel Ding:

Upa bangzah tel ding, cih tawh kisai zong LST in hong genlo hi. Ahi zongin pastor-te a kigen mah bangin upate zong bang pawlpi bang pawlpi ah hita leh khat sangin tamzaw den uh ahihna kimu thei hi. Jerusalem pawlpi ah thu-um mi tulgiat val bang a om khit ciangin upa sagih tel uh a, Philippi pawlpi ah mi tam hetlo ding hi mah ta leh upa pawl khat tel veve uh hi. Pawlpi lian leh upa tam kisam ding a, pawlpi neu leh tam kisam khollo lel ding ahih manin pawlpi mite in a kisam banga i telsiam ding thupi hi.

I phawk gige ding thu khatah bel mipite in upa tel hamtang ding uh hi. Nungzuipite nangawn in upa tello uh a, mipite telsak zaw uh ahih leh i pawlpite ah zong mipi mah i telsak ding thupi ding hi (Acts 6:3). Pastor khatpeuh in a ma deihteng la ziauziau; thunei khatpeuh in ama deih teng guang ziauziau, cih bang om theilo ding hi.

Tua banah upa dingte in zong ‘me suai’ theilo ding hi. Pasian mai ah mipite in kicing hong sak uh leh hong tel bek ding uh a, ei le ei kipia tawm, siau/ngen tawm, cih bang zong om theilo ding hi. Tua ciangin i ngetloh pipi hong kitel ahih le zong nial mawkmawk ding hilo hi. Hih munah Pasian leh mipite ding khawm uh ahih lam phawk gige a, hong kitel leh Pasian deihna om hi, icih theih pah ding thupi hi. Ut masa ta kei leng Pasian in hong deih nak leh mipite tungtawnin hong kithei lel ding a, i ut keei pong hangin Pasian in hong deihkei nak leh zong mipite tungtawn mahin hong kithei pah lel ding hi (Upa ngahloh cianga kikhawmlo, pawltai, cih tuamtuamte a om leh tua upa ut pa sungah Pasian thu om hetlo, Khasiangtho makaihna om ngiatlo ahihna kilang pah hi. Tua bangte upa dinga a tel khate hamsia uh sa ing!)

Upate Sep ding Bang:

Upa (diakonos) cih pen ‘nasem,’ cihna hi-a, ei kamin ‘tanu’ ci le hang maan pen phial ding hi. Tua hi-a, upate pen pawlpi tanute ahi uh hi. ‘Upa’ cih kammal kizatcilnate ah sabuai ngak, cihna-in kizang a, LST sungah 29 vei kimu thei hi. Pastor-te in kha thu tawh kisai tavuan a lak mah bangun upate in zong pumpi/taksa thu tawh kisai tavuan la uh a, pawlpi sung thu le la vaan ding leh sum le paai a zeek dingte ahi uh hi (gtn: cimawh huh).

Upate pen pawlpi siate tunga thunei dingte hilo-in pawlpi siate nasep a huh dingte ahi uh hi. Pawlpi pastor-te khathu bek tawh hong buai theih na ding ua, thu dangdang teng a vaan dingte uh ahih manin pastor-te vangik a dawn dingte (suatbeh lo ding) ahi uh hi (Acts 6:2-4). Pawlpi uk dingte zong hilo uh a, tanu semin pawlpi min tawh citpiakna, mizawngte huhna, meigong tagahte donna, cina vehna, leh thu phamawh tuamtuamte a vaan dingte ahi uh hi (6:1-3). Pawlpi mite kisapna bangin vaan kawikawi-a, a kisam bangin a kom dingte ahi uh hi. Dinmun kician nei-in lungdamna thu zong a kisam bangin gen thei ding uh a, pawlpi toknawi lo-in kipumkhatna piangsak zaw ding uh hi (Acts 6:5; 8:5-7). Pawlpi kitamsak lo-in pawlpi mi kibehlapsak zaw ding uh hi (6:8).

Thukhupna:

Pastor-te i sawltak hilo uh hi. Khathu tawh kisai ah ei hong cingte ahih manun neihsa lamsa tawh ahi zongin ihihna khempeuh tawh zahtak siam ni. Topa a zahtak ihi pah hi. Citak tak-in kha-an hong vaak uh ahih manin amau ci le sa-a ding zong zahtakna tawh an i vaak ding haza kei ni (1 The 5:12, 13; 1 Tim 5:17, 18). Upate sep ding teng peuh tawh i pastor-te buai saksak nawn kei ni. Ei mah a sumhzaw ihi gige hi.

Pastor-te’n zong upate nasep tuh kei ni. Thu le la, sum le paai, an le tui vai ahi-a, pawlpi sung vai tuamtuamte ahi zongin upate mah semsak ni. Tua ding mah-a Pasian tel ahi uh hi. Pastor-te leh upate in pawlpi sungah ei sep ding tek sem peuh le hang pawlpi nuamin khangto dinga Zeisu pumpi ihihna taktak hong kilang ding hi.

By: Dr. Lian Muan Kim,PhD