Minam cihciang-in Zomi-pen tawm-in tam taleh "minam khat" ahihna kiplet masakding thumasa ahihi. Amaute' teenna leitang adiak-in tuma khang 10 laaipek pan-a ataangteenna leitang toii-in zaii taleh "minam khat" ahihi cih kiplet masakding ahihi.
Zomi-pen bumhtuak bang-in Chin-tawh kimelh khaden-a, "Chin State buppi Zogam" cih-tawh hongki mengcip zeel-in, "Zomi cihteh Chin State sung, Chittagong Hill Tracks, Assam, Manipur, Naga.... huam" cihthu-tawh hongki valhtum, hongki bumhaii-hi.
Pu Thual Zen hong kipan-in Chin Libration Army-mah, Capt. Maang Tung Nung hong kipan-in Chin National Organisation-mah, Rev. St. Hau Go hong kipan-in Zomi hong dinpih-a, Chin Statewide-mah (hun hong kikheel dungzuui-in ZBC - CBC-ah), Pu Pum Kaap - Pu Chin Sian Thang te-in political party Zomi National Congress min-tawh 1990 kum-a kipan hong dinpih tosuak uh-a, abeisa hunteng-ah amaute' ngiimna leitang huam leh minam huam kitel khollo-hi.
2009 - 2014 sungteng aninhuai phial dotna naakpi-in kei mimal mahmah-in ka' bawlna tungtawn-a hong dawnna-pen, "Kampheen kuulloteng" cihthu ahihi. Ahizong-in, Chin pan-in Zomi Self-Administered Zone ngaihsut-in neilo, "ZCD Policy-ah omlo" (Pa Mungseen' thusunna)" cihthu hongging leuleu-a, Zomi huamna le Zogam (leitang) huamna akicianlo dinmun-ah hongki paipih kiik-hi.
Atung-a khempeuh-pen minam kalsuan nading-a khephah khuambul kician khatzong omlo dinmun-ah Zomite ki-om laaitak-hi. Tua kawmkaal-ah hihbang bullet kician neihlohna hang leh mimal hamphatna khiatlahna ziak-hiam ahihkeileh kiphatsakna ziak hiam-a kampau gamtat ziak cbt' hang-in Zomi sung mahmah nangawn awsuah kidanna cianglel khawng-tawh kikhenthaangna khasiat-huai tak-in hongpiang mitmuh ahihi.
Political Party-tawh Zomi Minam Kalsuanna phungvuh theihluat tangtang omlo, aseem MP te-in lampi mulo, kuama' kiang-ah "pulaak ngamlo" (Pu GKLian-in Pa Mungseen' dotna adawnna) dinmun Zomite kitung ta-hi. Hih-pen thu sungsung talehang alemtaang vatvat nawn khollo ahihman-in political party-pen lungsim-ah koihkhiat masakding ahihi.
Tu-in Minam movement taktak ding-in kipawlna lo-in mimal khat' haanciamna-tawh piang kholloding muhsa ahihman-in kipawlna: Minam' ading maaitang singhawng belhngam, sup akuulleh asumngam, aphu-ngam, apulaak-ngam Zomi minam min paulam kipawlna a-omhiam? Ngaihsut hunta-hi.
Global Zomi Alliance-pen 2011 kum-a dotna cilgil khat Free Online Comm pan-in zunko eékko thuahlawh zeen-a ka' bawlna pan-in, "..... GZA-in recognition, registration cihte neilo, bawllo, sawmlo" cih official statement-in hongki khahkhia-a, minam maailam akhual mimal kim-in simkhin ciatding ka-lamenhi.
Zomi National Council of Myanmar hong kiphut leuleu-a, akipantuúng ahihman-hiam, thukhun, ngiimna, Statement of Purpose, Aims & Objectives, Political or National Schemes, Project & Planning,..... cihte bangmah kiza naailo-hi.
ZYA kiphut-a, khua ciat-ahzong Luseite' YMA kalsuanzia deihgawh-in kihaanciam ngeingai-a, Centralisation paizia daan-in kizom toto kawm-in akician Statement of Purpose, Long Term Policy, Aims & Objectives, .... cihte bangmah kiza naailo kawmkawm-in sihguui leh sisan hopna nasia tak-in panhla uhhi.
Ahihleh, Minam Kalsuanna (National Movement) taktak ding-in atung-a kipawlnate akizangh theiding/loding ngaihsut-huai mahmah-a, aki- privatised khin vive ahidiam-zongbel thei saamkhang-in, naakpi-a kisit-huai, kidotcian maiding zah-in minam dinmun critical condition akici anaak lauhuai mahmah dinmun-ah omkhin-hi.
Kal Masa (First Step)
*******************
- Political party ahilo minam minsel GZA, ZNCM, ZYA hih thumte-in khut kiletkhop theihding lunggulhna anei uhhiam?
- Aneihleh banghun ciang-in conference neihsawm uhhiam?
- Hihteng amau' kalsuanna masuan ciat-tawh kalsuan ciat-a, khatle-khat ki- support ciangbek ding-in geelna nei-maw or support bek hilo "be a part: to be taken part" theih ding-in lunggulhna leh geelna om-hiam?
-Ahihkeileh khatle-khat ki-elbawl ahikeiphial zong-in ki- support ding peuhmah ngaihsut-in neilo, policy neilo, geelna neilo uhhiam?
Hih thu akitelsiang loh-in minam minsel ahuamna alian mahmah kipawlna thak khat akiphut zong-in a-omsateng mah-tawh ki-el, positive competition ahilo, abhorrent competition mah-tawh minam kikhenthaangna zing-khat kibehlap suaklel dinghi.
Gentehna-lah ahi, ataktak-lah ahi: Malaysia-ah 2006 June Kha-a ZAM akiphuh ciil-in Ciimnuam omkhin, ZNC LA omkhin, Zomi Innkuan omkhin-hi. Hih a-omsa thumte kilem hetlo ahihman-in tua thumte-mah pan-in palaai vive helkim-in ZAM akiphut hi-a, aziak tuamtuam-tawh hong active a-om teei hang-in tuni ciangdong Minam Neipa-in thupha pia-in kipsak-hi.
Hih paizia zat akuulleh akuulloh-pen atung-a dotnate individual organisation te' dawnna tung-ah kinga liuleu-hi. Hih Kal Masa vaanveng lopi-in kipawlna athak khat/nih akiphut zong-in kikhenna leh ki-elna lociing kibehlap ciangbek-mah hilel dinghi.
Atung-a Kal Masa kisuan naailo ahihteh, minam movement paizia dingzong hiah dinkawl pakni. Lunggulhna-ah: Kal Masa akisuan theih nading-in; Altruism leh Non-nepotism bulphuh-a kalsuanna bekmah-tawh minam cidam theibek dinghi.
Zomi Pasian' Thupha!
Zokhai
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.