Zomi sung bek hilo kipawlna khempeuh ah makai khat in a zom a makai ding kua hiam cih a teel, a pattah kisam hi. Khantawn makai sem den cih dan a om leh a thakaih ding, makai thei ding mi pattah lo cihna hi hantang ding hi. Tua bang kimakaihna pawlpi leh kipawlna pen a mipite hampha mahmah tawh kibang thei napi a hamphat theihzah vua hamphalo hamtang zaw ding hi.
Tua ahih manin makai khat in makai dinmun a tun ciangin a ngaihsutna a om masa pen ding - kei zom ah kua? Ka nung hong thuap ding kua? Ka deihna a zomsuak ding kua? Ka khialhna hong hilh ding kua? Ka kicinlohna hong puahto ding kua, etc cih a gelpah hamtang ding ahi hi. Leadership succession (makai kinahvawh ditdiat) a om kei a, a dawldawl a kigual a om kei leh tua kipawlna leh pawlpi a khantheih ding zah in khang ngeiloding hi.
Tua i cih ciangin hih kipawlna pen a neituam omlo, makaite a bek hilo, makaite inntek deuh, mipi inntek lo deuh cihna hilo in a kipawlmi khempeuh a nei, a inntek, vekpi a hi cihna hi. Kipawlna sungah a neupen, a hai pen in zong 'kei a hi' cih lungsim a neih theih ding kisam hi. Makaite a inntek deuh, a nei deuh hi in kei pen a neu deuh hi ing cih lungsim a omkhak keh bel a sunghawm kipawlna hi gige cihna hi. Mi khempeuh in kei a hi cithei peuh leh kuakua in a makai zong tua kipawlna kip in kho dinga, to in puk ngeilo ding hi.
Sum tam piazote leh a pilzaw deuhte, a makai panmun ngahte leh a kamsiam mi zolsiamte a inntek deuh mawk leh tua kipawlna leh pawlpi a puk ding haksalo hi. Huihpi khat nung leh, tuu vun silh ngia khat hong kinel peuh leh, a kamsiamzaw dang khat in zol pak peuh leh a puk ding hipah hi.
A kum ham pen in makaih a kul hun om a, a tangzang zaw deuh in a sep ding hun om a, a khangmoi zawte thuzuih a kul hun om hi. Tua banga hunzui a kiciang to, kidawlto diudeute kip hamtang a, khangto den zaw lai hi.
Zomi sungah makai kikuahsuk dindiam ding kipattah tohtoh ding mangngilh kei ni.
- Hau Za Cin, Phuitong Liim
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.