Tutung Kawlgam makaite leh mualtung mi makai te’n 21st Pinlong Conference hong neihna uah Zomi Congress for Democracy President: Pu. Chin Sian Thang in ni 1/09/2016 ni-a, a thugente thupi mahmah kasa hi. A vapai pihto, a valento pen zong hampha kasa hi. Amel ka etteh Tg. Cin Lian Khai tawh kibang kasa hi. Thugen a patma in mipi leh makaite zahtak apiak dan zong, khangnolaite mah tawh kibang a, akhuak hoih mahmahlai ahih lam hong phawksak hi. A thugente kuata dingin thupi diak hiam cih leh:
1. Kawlgam Federal tawh ki ukding, a deihte a dingin thupi diak hi: Pu Thang thugente a tomin enkik pakleng, 1947 kum a, Pinlong Agreement thu tawm hong gen a, tua pen a mangcip ding, ZNC/ZCD in phallo in ni 24/10/2010 in Kalaymyo ah Second Pinlong Conference sapding phuangkhia uha, tua hun ah NLD President U Tin Oo leh adang mi thumte zong ki hel-in thukimpihna suaikai uh hi. Pinlong Conference masalai in ko Zomite sung pan Pu Thawng Za Khup zong makai khat in ki hel-in Pinlong Agreement bang hiam cih khat in agen leh Federal hi, ci-in na gen a, Tawnggyi khawmpi ah ka pailai in Pu Capt. Mang Tung Nung in zong tua dan mah in gen hi, cih dan khawng hong genteh Kawlgam a pianna dingin ko Zomite a kihel den hi ung, aci tawh zong ki bang pah a, Kawlgam Federal tawh ki ukding a deihte bek hilo in Zomi a kici mita ding mahmah in zong, Pu Chin Sian Thang thugen pen thupi mahmah hi. Bang hang hiam cih leh nidangteh Kawlgam tangthu kan kikna in ki neithei ding hi.
2. General Aungsan leh Pinlong agreement thupi a sata dingin zong thupi hi: Pinlong Conference masa leh agreement te pen General Aungsan mapat hi, cih bangdan thu tawm hong genteh General Aungsan amah a it peuhmah in Pinlong agreement itding uh hi,aci tawh kibang hi. Kawl galkapte leh pawlkhat in Kawlgam pen Federal tawh ki ukding nadeih kei uh leh General Aungsan a zahtaklo, amah leh Pinlong agreement a thusimlo hi uhteh aci tawh zong kibang hi. Lamkhat leuleu ah ko Zomite pen General Aungsan nasep nate thupi asa leh Kawlgam pen Federal ki ukna tawh ki ukding deih in tuni tan na asem tinten dente hi ung, aci tawh zong ki bang hi. Daw Aungan Sukyi bang Kawl galkapte tawh ki gulluk in Federal khawng adeih kei khak zenzen leh a pa leh Pinlong agreement a thusimlo suakpah lel hi. Tua bang lungsim a neikhate leh adip kisai litlit ding hi.
3. Kawl galkapte hong ukdan ahoih loh lam hong langhsak hi: Pinglong Agreement teng a mangthang ding ki phallo in Second Pinlong neihding ZNC/ZCD in ni 24/10/2010 ni-in phuangkhia a, ni 14/11/2010 ni-in a thuteng genin lai tawh Daw Aungsan Sukyi khutsungah hong sepkhiat dingin muanna lianpi tawh ka-ap uh hi. Tua hun a, amah pen house of arrest in aom laitak hi-a, bang hang, bang mawhna nei-in article number bang zahna tawh kituak in hici bang in kikoih hiam cih ka thei kei hi, cikiause hi. Angsan Sukyi tungah lungdam thu a ko tawh zong ki banga, a dang khat ah Aungsan Sukyi thong a khiatna uh, a bawldan uh diklo ahih manin mipi mai leh leitung buppi mai-ah kapnote gamtat a hoihloh na a pulak tawh zong ki banga, a gendan siam mahmah ahih lam kilangh hi. Tan Swe kumpi sep hunlai hi leh a thuneu penin CID te zong sak in thusitna neiteitei khamai ding hi.
4. Mipi in theihdinga kilawm kasak: Mikhat a sihteh a sihna thu kigen in, lungdam kohna khat I neihteh ahang kigen hamtang hi. Tua mah bangin hici bang thu Pu Thang in a genteh a phuahtawm hi mawklo a, a taktak mah ahih na leh ama sepnate Daw Aungsan Sukyi maitang bek hilo, Kawlgam bup uliante mai a kipan UNO makaipipa maitang nangawn ah hong genteh thupi diak hi. Pinlong Conference vai tawh kisai kum zalom 21 ading in a masa pen hi-a, tua hun ah gen kei leh bang hunteh genmawk ding hiam? Thupen a masa a gending leh a nunung a gending om hi. Dak nihvei kisat zenzen pen zumhuailo hi, Politics nasepna mun pawlkhat ate bang, kisel, kikawk, kilai gawp in kikho in ki lenketa leh khawlpaklolai uh hi. Dak a sat masak un minute 9 sat nailo a, a satte in satbaih lua kha uh hi. Nihvei a sat kikna uh ahun ding hipan zaw hi. Lam khat leuleu ah a satding uh amau mawkpuak hi-a, thugenten zong amau kiginteng a genkhit dinguh amau mawkpuak ahi hi. Mi dangte bangin khangnolai hi nawnlo in a kum zong tamta in a paiciang in zong letkul zel ahih manin mipil thungaih sunthei te’n theisiam mahmah ding uh hi. Mipi'n zong a thugente ngai mahmah uha, pawlkhat bangin lai tawh gelh ngiatngiat uh hi.
Shan State sunga om Myamyo khuapi pen Kawlgam thu ah aki genden ding khat suak hi. Bang hang hiam cih leh Mangkangte hong uklai in a phualpi khat uh hi-a, Pinlong Agreement zong mualtung mite tungah na thukim takpi mah uh hiam, ci-in Mangkang te’n a dotna mun zong ahi hi. Ahih hangin tu-in Kawl galkap te’n zawhthawh thu tawh Shan gam hisak nawnlo in Shan State sungah koih nawnlo mawk uh hi. Kawlgam thukhun Article number bang zah tawh kituak hiam, cih ki theilo ahih manin Kawlgam na utut un na ukgawp uh hi, I ki ukdan manlo hi, kapnote mai ah aci tawh ki bangpah hi. Gullu mual zong ni dangin Zogam sung hi-a, tu-in koi ah omta hiam, na khel uh hi, aci tawh zong ki bang pah hi.
Tutung khawmpi pen Kawlgam Federal tawh ki ukding ki pan nailo ahih manin ut bangbang ki ngettheih hun hi nailo hi. Tua ahih manin I paunak khat ah “mannailo tulsui” acih bangin mi pawlkhatte gendan in ei deihteng bangen gawp cih bang hun hinai deklo hi. Nagen zongin balteh tungah tuisun bangding hi. Mi inn ah I hawhteh inntekte lengla dosiam ahih uh leh lenglate suakta tak-in thugensak hithiat zaw uh hi. Tutung khawmpi pen a baihliai a hong piang hihetlo ahih lam hong kilang hi. Khawmpi bel ki bawlthei mah a, ahi zongin Pinlong min hong zatteh Zomite mapat ahih lam hong lakse hi.
Pu. Chin Sian Thang in a seppihte pawlkhat tutung khawmpi ah aki heltheih loh uh hangin amaute tungah a lungdam dan amin mahmah uh tawh agen ngiatngiat pen thupi mahmah a, a lawmte'n zong a zahtakna uh khangding hi. Bang hangin thau tawi in ei le ei ki su mawk I hi hiam, midang omlo hi hang, a cihteh Kawl galkapte ading bangin ngaihsut huai mahmah hi.
5.Kuata dingin hehhuai hiam? Federal a deihlota dingin hehhuai mawk mah hi. Zomi langpang denta dingin hehhuai mawk mah hi. Galkap ki ukna a deihta dingin hehhuai mawk mah hi. Zomi a mangthang saknuamta dingin hehhuai mawk mah hi.
6. Zomi bup adingin angtan huai hi: Bang hang hiam cih leh Zomi cih bang omlo hi, hong cite maitang leh 2014 kum Kawlgambup Census lai-a, Zomi leh Zomi Party Kawl kumpite tungah hong hekte maitang ah, Zomi Congress for Democracy President Pu Chin Sian Thang ci-in hong ki sapteh I koiteng hiam khat hong vutliang hi. Tua awging pen Kawlgam bup makaipite bek in a za, angai hilo in leitungah ki pawlna lianpenpen UNO makaipi Bankimoon nangawn in zong a mit mahmah tawh mu in a bil mahmah tawh za hi. Online panin a enkhempeuh in zong za uha, Zomi mudahte bang a hahdan uh, aom dan uh kilamdang liang hi. Lai Siangtho thugen pawlkhat bang phawkhuai liang hi.
Midang te'n bangbang a gen zong un, Pasian in Zomite hong zatdan, thupha hong ompih dan kilangh kasa hi. Pu. Chin Sian Thang leh Zomi Party makaite damsawt hen. Pu Chin Sian Thang Happy long live. Move on Zomi for God and His people.
Khaibawi Zomi
Australia
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.