0
Zomi sungah interview na te ka ngaih teh founder tam mahmah hi. Founder cihpen ki utciat ahih manin ki pawlna tam mahmah aitam aw cih ka lung ngai ngei khat hi.

Ki pawlna minpua founder te nuntak zia ka kan ciangin makai tampi in muhdah leh langbawl hi cih tampi mu ing. Bang hangin langbawl uh cih kan kikleng ahang bulpi na om takpi hi. Ki pawlna aom teh vote/mee tawh makai ki teel ciat aa, tua makai a sem masa penpen Founder min ki puasak hi. Min a ki puasak makai pa inzong kei Founder hi-ing ci ngam mawk uh ahih manin ama sep sungin bangmah sep khiatna aom loh hangin midangte makai sep sungin sepkhiatna ki cian a om sunsun Credit ahoih teng pen ki pawlna makai a sem masa penpen pa in ngah miau ahih manin ih sung thu hoihlam na nawh theilo hi.

Kipawlna khat peuhpeuh ah Credit hoih teng bangmah sep khiatna aneihlo makai sem masa penpen pa in minphatna teng a puak khak zenzenteh tua kipawlna makai semngei khempeuh in tua mipa pen thu manlo in mu uhhi. Mi sepsak teng ki sailo pi-in Credit a ngahpa inzong ama ngah dan khat in na pompahta lailai ahih manin ki lemlohna ki panto pah hi.

Tua ahih manin makai sem theih dingteng ki lemlo, ki thutuaklo cih hi tawntung hi. Ei sep sungin na hoih ih sep khiatleh tuapa pahtawi siamzaw in, a sempa credit hoihteng deih ngawh selo in om theileng ki pumkhatna omzaw in um ing. Tua bangin credit a ngahnuam vet ihihleh tua ki pawlna pen eibek in sum leh paai, vai khempeuh ah saingam, makai zong midang pia sese lo lel in sem ciatciat lelleng hoihzaw hi. Ei sep sungin phattuamna lah bawlzo keeilo, mi sep cianga ahoihteng ei tungah tungsak nuam ihih manin makai mipilte sungah ki lemna om theilo hi. Mipi tampi tak a kallak ah ki gen thei in ki lungneu tawntung hi.

Ei bek in a founder min puanuam tawntung ihihleh a tawntung mahin tua ki pawlna ah vaikhempeuh vanzo denleh hoih pah hi. Vai khempeuh ih vanzawh keileh kei a founder hi-ing, kei hang hi, kei sepsa hi cih kullo hi. Makai khat peuhpeuh sep sungin Thuhoih a sepleh ki pahtawi siamto semsemzaw in om zo leng tua ki pawlna makai a semtoto dingte thalawp in Zomi Zogam hong khamuang sak semsem zaw in ka mu hi. Kei mimal muhna hi. Lungdam.

ThawnTuang
Zomi Angvaan
Nashville TN USA
August 28, 2016

Post a Comment

Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.

 
Top