Zomi aiawh-a thusungpi or tamsii dingpen Pu CSThang bekmah hiding-in ka-lamen mahmah-hi. Adangte muanlohna hilo-in thupaizia-tawh saaituahna ahihi. Hihbang khawmpi limlim-ah democracy aliim avaang akimu, akiciam-kha pianpian dinmun ahih-tawh kituak-in Journalist te hongki taaklah mahmah dinghi.
Khawmpi siimte-in thei mahmah saamding hitaleh abeisa hun-a interview daan-a akibawl tepawl-ah Zomi minpua makaai or palaaite' dawnna kammalte-pen Kawlgam Politics Terminology baanlo-in mawkpau puakpuak geuh-uh ahihman-in tutung naakpi-in hong kidawmleh lunggulh mahmah hihang.
Zomi leh Chin mehpok, tokzau niloh-a kampau tepawl-zong kal-khat kisuankhial khaleh tuzawh khang tampi kithuak to leuleu dingpen naakpi-in laainat-huai lua mahmah-hi. Mah Sah Lah hunlaai-in Zomite niam peuhmah lo-in, Gen., Col., Lt. Col., Maj. Gen., .. om hiimhiam hihang, ahizong-in "Pusa' Luheek" acihbang-in hih gaalkaap bute-in minam-pen nana awlmawh hetlo uh-a, "Zomi" cih limlim Kawlgam thuneite' kiang-a pulaak khatzong nana omlo heemhaam leltak uhhi. Minam vaai-ah haii mahmah uhhi.
Amau' minam mit atawt man-in kum 69 sung I' kammal-ah a-omlo, khiatna neilo "Chin" cih minvawhtawm nuai-ah tangciak khinzo hang-a, tua Chin nangawn Pawite-in hong tuhkhia sawnsawn-hi. Zomi kingkeng Rev. Hau Go' patsa ZBC (Chin State represent ahihman-in minam vaai-mah ahihi) nangawn "CBC"-in laih niangniang lelmawk uh-a, tuapipi-mah Zomite-in "Zogam = Chin State" ci puakpuak niloh-hi.
Minam vaaileh taangthu tuanthu-tawh kop-a gamkeekding hilehang Chin State bek hilo-in Manipur State phellang, Sagaing Division tumhlamteng peuhmah Zogam ahihi, ahizong-in Contemporary akici tulaaitak-a aluang tuihual tung-ah tua Tuan Pupa' Leitang peuhmah genloh Tedim Tonzaang nangawn-ah thunei zolo I-hihlam thei masa photding hihang. Tedim Tonzaang, Tamu, Kawlpi huam-a STATE: ZOMI STATE - ZOGAM STATE neihding neu salua peuhmah loding hihang. Aneu om masaleh kikeek thei-a, bangmahlopi khat kikeek theilo-hi.
Tua ahihman-in, Pu CSThang-in ama' thusun nading-ah Chin State - pen Zogam State-a kheelding hongsung-in hongki saang (accept & pass) mahleh Zomite' lemlawhding om kilkello ahihlam mipi-inzong pressure piak kuul-hi. Chin State akicih I-nialloh hun-in bang lemlawh leltak I-hihiam? Chin hong kicih I-nialloh hun-in bang phattuamna I-ngah tuan-hiam? Zomi-in tua State leh amilip kikheel mahleh bang peuhmah kilamdang loding theihkim ciatding ahihi.
Journalist te-in interview hongbawl nop ciang-in lawp pappap-in dawn puakpuak kuullo-hi. Spokesperson om-a, tuate' kiang-ah puaksawn ciatciatding ahihi. Khatveivei interview TV Screen peuh Youtube peuh-a kidawkding lunggulh lel-a interview-ah I-mawkpau khaakleh minam min kipua ahihman-in naakpi-in minam buppi sukha hamtangding cih phawkding ahihi.
Gamsung-a interview dawnzia dingleh gampua-a Kawlgammite' movement-a interview dawnnate naakpi-a akikhaih kuul-a, athuukpi ahuam kuulding-hi. Media-pen naakpi-in mipi vaaihawmna leh gamuk thuneite-tawh kalsuanna-ah akhauh mahmah thautang nam-khat ahihman-in abeisa hun-a USA khawng-a interview dawn zualzual bangkhawng ahong om hetlohding mipi' bitna hidinghi.
Tua hi-in, Pu Chin Sian Thang-in
*Zomi-pen Zomi hi-a, Zogam-pen Zogam mah-hi
ci-in thu hongsung diam,,,,, ahihkeileh
*Zomi-pen Chin hi-a, Zogam-pen Chin State ahihi
ci-in thu hongsung diam.... diik humsa-in ngaak hihang.
Mimal uplehsaanna-ahbel
Zomi-pen Zomi hi-a, Zogam-pen Zogam hi-in, tutadih-in Tedim Township, Tonzaang Township, Cikha Township, Northern Falam Twonship, Northwest Sagaing Division ahihi, hongcih giapdingbek ka' suun zaalmang ahihi. Hih hongcih keileh khang bangzahhiam kinelhsiah to-in kiziakaai kiik leuleu dinghi.
Zokhai
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.