Zomi Aksipi Khat Hluttaw Sung Tung- (Part 2)

Tutung kiteelpi ah zawhna angah ZCD in 1990 kum a policy leh thubulphuhte mah lenkipin mainawt sawm hi, ci hi. Pu ChinSian Thang in Zomi kici minam min a dinpihna hangin pahtawina angah 20 val pha ta hi. Tua pahtawinate pen gampua a om Zomite’ piak2 tamzaw a, Norway gam leh leitung gambup piak pahtawinate zong kihel hi, ci hi. Zomi Salpha, Zomi Zuapa, Zomi Aksipi, Zomi Suahtakna Pa cih bang minphatna leh pahtawinate kipia ahi hi.

 

ZCD in Hluttaw sung gam vaite bek sem ding hi loin sawt veipi ana sepsep uh Hluttaw pua lam gam leh minam vaite zong aban zom to lai ding, ci hi. Gamsungah gal veng thei nai lo ahih manin kilemna a om ding thupi hi. Tua tawh kizomin tualsuak minamte tanvo leh hamphatnate zong kimangngilh bawl theih hi lo hi, ci hi. Tua bang i cih ciangin nidang a ka gengen uh mual mite State khat ciat, Kawlte State khat cih dante pawl bel amun leh ahun tawh kizui-in piang thei nawn lo ding hi, ci hi.

 

“2008 Thukhunpi pen Federal dan dektakin kigelh napi tualsuak minam leh gam leilupzia tawh kituak ciaptehna gina a om Federal dan hi lo hi. Tu dinmun ah State leh Division 14 bulphuhin thukhun puah kul ding hi. Tua khit ciangin gamlim zong suaih phat kul ding hi…” ci-in kum 77 aphata Pu Chin Sian Thang in gam leh minam vai ama sunmangte gen hi.

 

Gamsungah thautawi tam lua hi. Gamsungah gal kikapna a om lai teng democracy gam hoih piang thei lo ding hi, ci-in gen beh lai hi. Daw Aung San Suh Kyi in a khutletpih lawmlui mual mite pen mun apiakna-in Arakan minam sung pan Pu Chin Sian Thang mah a bang gam makai U Aye Tha Aung pen Hluttaw Chairman dinmun pia khin ta hi. Kiteelpi khit deuh lamin party pua lam mite zong nasep kiguan ding hi, cih khat Aung San Suh Kyi in na kamkhap ngei hi. NLD in hong zot nak leh nial lo ding a, azot kei leh zong a encik (Opposition) party khatin kikalsuan tuan lo ding hi, ci-in Pu Chin Sian Thang in gen hi. Ahi zongin mual mite vai ah NLD in kimangngilh bawl khawng hong neih zenzen leh kidai om mawk lo ding hi, ci hi.

 

Mual mite tawh kisai Daw Aung San Suh Kyi lungpuak leh makaih zia tawh kisai-in “Amah pen Bogyoke Aung San tanu hi ven. Tangthu in aliangko tungah a koih vaipuak tampi om hi. Aman zong kamciam nei hi. Amah ka muang hi. Loh theih lohin hong hanciam na ding hi…” ci-in Hluttaw ah kum upa pen palai khat ahi Zomi Aksipi Pu Chin Sian Thang in siang takin gen hi.

 

Ref: The Ladies News Journal, Feb. 5, 2016)