ZOMI TE KI PUM KHAT NI

Inn sung kong khah pan in mi nih in, inn pua lam daak khia uh hi. Khat in inn nuai a buan nawng te mu in, khat in vantung a om aksi taang silsial te mu hi. Mihing te khat leh khat i muh na, i ngaih sut zia te ki bang kim lo hi. 

Tua mah bangin ih kawl gam ah zong minam (153) bang ki om hi. Tua minam teng kam pau, ngei na, upna(biakna pawlpi) omna mun, ngaih sut zia te khat leh khat ki bang lo uh hi. Ahih hangin tua minam (153) te a ki bang sinh senh khat ii nuai ah pum khat in nungta khawm uh hi. Tua in kawlgam ki ukna thu khun (constitution) khut nuai ah ahi hi. 

Tua mah bangin ei ZOMI te zong i khua i tui, i beh i phung, i kam pau(aw suah), ih upna(biakna pawlpi) i muhna, i theih na leh i ngaihsut zia te, khat leh khat ki bang kim lo hi hang. Tua i ki bat loh nate khempeuh i ki batna mun khat ah gawm khawm in pum khatin i kal suan khawm ding hi. Tua mun in Nang leh kei in, i paih theih loh, i nu siat theih loh leh i sih pih ding i minam ZOMI ahi hi.

Tuu in ZOMI te i om na munmun panin, i hih theihna bangbang tawh khut khat tawi khe khat khai bangin, ma i pang khawm ding hi. ZOMI vaai khempeuh nang leh kei ii vai puak ahi hi. Kei tawh ki sai kei ci kha ken sanggam, hun khat ciang na ki sik kik ding a, va-ak ; utong suak nuam na bang kha ding hi.

Na pilna, na hauhna, na theihna, na muhna leh na hatna te ZOMI ading in zangin sanggam. ZOMI in nang hong ngak hi. ZOMI in nang hong lamen den hi. ZOMI in nang hong ki taang sam mahmah hi. I omna munmun panin, i minam ZOMI ading ma apang thei dingin, i biak PASIAN in ZOMI khempeuh thupha hong pian ta hen! 

ZOMI te-aw, 

Ki pah tawi siamni,

Ki huai siamni,

Ahoih lamin muh, lak theih na ding hanciam ni,

Itna tawh i khelh khak te, itna mah tawh ki maai sak ni.          Lungdam.

Mang Suan 

Nashville TN, USA