SYRIA GALKAP TEN HOMS PROVINCE AH IS-TE KHUT PANIN KHUAPI KHAT LAKSAK
April 3, 2016: Russia ten tung lam panin a huhna tawh Syria galkap ten ISte ukna al-Qaryatain khuapi kiim ni bangzah hiam sung a umcih khit nung un tuni in hih khuapi ISte khut sung panin laksak zo ta uh hi ci'n Syriate state news in suaksak hi. Syria khuapi ten nung Nipini in Palmyra khuapi ISte khut sung panin a laksak khit nungin Palmyra panin km. 200 a gamla mual tungin a kimkotna al-Qaryatain khuapi tuni in la zo ta uh hi ci'n gen beh hi.
Al-Qaryatain khuapi pen Palmyra nitumna lam-a om hi a, hih khuapi pen IS ten nung kum August kha-a a lak uh ahi hi. Syria President Bashar al-Assad in Syria nitumna lam leh Damascus ah ISte suakta takin a gamtat theih lohna dingun al-Qaryatain khuapi lak kik ding nakpi takin na hanciam hi. State news agency, SANA in a genna ah Syria galkapte leh a pawl ten al-Qaryatain khuapi la kik siang ta uh a, hih khuapi sunga IS om laite tampi ban gawh uh hi ci'n gen hi. Syria galkapte mun tampi panin hih khuapi lut uh a, IS ten al-Qaryatain leilu-nitumna (northwest) lamah a bomb phumte uh hah siang ding nasia takin kipan ta uh hi ci'n gen beh hi. Syria galkap ten Palmyra khuapi sungah IS ten mi a lom thahte uh a vuina hankhuk panin si luang 40 to khia ta uh a, tuate lakah numei leh naupang zong kihel hi. IS ten Palmyra khuapi sungah bomb tul tampi lei sungah phum uh a, khuamite a ciah kik theihna dingun hih bomb kiphumte hahsiangna nasia takin nei lai uh hi.
UK pansan Syrian Observatory for Human Rights (SOHR) in bel Syria galkap ten al-Qaryatain a kim khat val la khin ta uh a, ISte tawh khuapi leilu lam leh leitaw-nisuahna lamah kikaptuah lai uh a, tuni bekin Russia ten hih khuapi sung tung lam panin mun 40 val kap uh hi ci'n gen hi. IS ten a khuapi dinga a zat uh Raqqa sung leh Deir Ezzor province sung a tam zaw uk lai uh hi.
Syria kumpi lehdo (Syrian rebels) ten zong Aleppo ah zan in al-Nusra Front gamnuaimite leh Syria galkapte nasia takin nawk in, Aleppo leitaw lam-a Syria kumpi ukna mual tung mun poimawh mahmah a kigen khat laksak uh hi. Aleppo ah zan hal a kipanin Syria galkap ten a leitang khahsuahna munte uh lak kikna dingin nasia takin nawk uh hi.
-Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.