SYRIA AH AL-NUSRA FRONTGAMNUAIMITE' SPOKESMAN KITHAT
April 4, 2016: Al-Qaeda tawh kipawl al-Nusra Front kicite spokesman Abu Firas al-Suri leh a-Nusra Front galkapte al-Nusra Frontte ukna Kafar Jales khua-ah kimuhkhawmna a neih lai un tung lam panin zanin kikap a, Abu Firas al-Suri leh a tapa leh al-Nusra Front galkap 20 in sihna tuak hi ci'n UK pansan Syrian Observatory for Human Rights (SOHR) in pulak hi. Reuters news agency leh news pawlkhatin USte kap hi ding hi ci'n a upmawh thu gen uh hi. Ahih hangin SOHR in Syria galkapte ahih kei leh Russiate kap hi zaw hi ci'n gen hi.
US security ulian ten al-Nusra Front gamnuaimite spokesman Abu Firas al-Suri kithat hi cih kiza hi ci'n gen uh a, ahih hangin USte kap ahih leh hih loh gen beh tuan lo uh hi. US leh a kipawlpih ten a beisa in Syria ah al-Nusra Front makaite na kap zel uh hi.
Abu Firas al-Suri pen a min taktak Radwan Nammous Azzam hi a, al-Qaeda makaipipa Osama bin Laden leh ama lamhilhpa Abdullah tawh kimuh ngei a, Soviet (Russia) galkap ten Afghanistan 1979-1989 sung Afghanistan ah mujahideen kicite a do lai un Soviet galkapte na do ngei hi. Syria buai kipat 2011 in Syria ah galdo dingin kuan hi.
Syria kumpi lehdote (rebels) leh Syria kumpi in February 27 in kikaptuah nawn lohna ding thukimna suai na kai uh a, hih thukimna ah IS leh al-Nusra Front kihel lo hi. Analysts ten a genna ah hih thukimna hangin Russia leh US leh a kipawlpih ten ISte bomb a khit theihna ding hun lem guan hi ci'n gen uh hi. Nung Nilaini in kuate ahiam cih gen loh tuithe vanlengin ISte khuapi (capital) Raqqa a kapna ah ISte commander Tunisia gammi Abu al-Haija kaplum hi ci'n SOHR in gen a, Abu al-Haija' omna hilh dinga ummawh IS commander 15 IS ten that uh hi ci'n gen beh hi. US leh a kipawlpihte a pawl bawl mi 20 zong IS ten man uh a, tuate koi ah om uh hiam cih kithei lo hi ci'n gen beh hi.
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.