April 4, 2016: Al-Nusra Front ten US in galvan tawh a huh Syria kumpi lehdo (rebels) Free Syrian Army (FSA) kicite ukna Idlib province sung va buluh uh a, FSAte galvan tampi laksak in, pawlkhat hingmat uh hi.
FSAte' 13th Division galkap ten zanin Twitter tung panin a genna ah al-Nusra Front ten FSAte ukna Maarat al-Numan buluh uh a, inn khat pan inn khat ah FSAte ban zon' in, FSA rebels galkap pawlkhat hingmat uh a, al-Nusra Frontte tawh kikaptuahna hangin FSA Seven Division galkap 13 zan nitakin si hi ci hi.
Syrian Observatory for Human Rights (SOHR) in a genna ah al-Nusra Front ten US in galvan a piak FSAte galvan tuamtuam - tank kapsiatna dinga kizang (anti-tank missiles), kidona mawtaw (armoured vehicles), tank leh galvan tampi laksak uh hi ci'n gen hi. FSA kicite pen Syria kumpi lehdo pawl tuamtuamte kipawlna hi a, US kumpi in galvan leh sum tawh huhna a piak banah training nangawn pia uh hi. Al-Nusra Front leh IS ten FSAte galvan tampi vei a laksakna uh hita a, FSAte pawlkhat zong a galvante uh taikhia in IS leh al-Nusra Front a lut tam mahmah ta hi.
Al-Nusra Front leh a kipawlpih Jund al-Aqsa group ten FSA division galkap 40 kiman a, thongah kikhum hi ci'n pulak hi. Maarat al-Numan khua pen Syria buai kipat ma-in mi 60,000 kiim teenna khuapi hi a, Syria President Bashar al-Assad deih lote kihinna kipatna munte lakah kihel a, a khuami ten Syria kumpi deih lo uh a, al-Nusra Front ten uk uh hi. A beisa nipi kal nih in zong hih khuami ten Syria kumpi a deih lohna uh lahna in lungphona nei uh hi. Thau tawi ten kumpi deih lo a Idlid province sunga lungphona neite hangin Syria kumpi'n Syria leilu lam a lakna ding nawngkaisak ding hi ci uh ahih manin lungphona neite kho uh hi.
US leh Russia vaihawmna leh UN palai pan'na hangin Feb. 27 in kikaptuah khawlna ding thukimna om a, hih thukimna hangin kikaptuahna 80-90 % bang kiam zo hi ci'n nung kalin US Secretary of State John Kerry in gen hi. Hih thukimna palsat hi uh teh ci'n Syria kumpi leh rebelste khat leh khat kingawhtuah den uh hi.
-Agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.