IRAQ GALKAP TEN ANBAR PROVINCE IS-TE KHUT PANIN LAK KIK DING HANCIAM
April 9, 2016: IS ten Iraq gam-a a ukna uh Anbar province lak kikna dingin Iraq galkapte mainawt zel uh a, US makaih leh a pawl (US-led coalition) ten tung lam panin huhna pia uh hi. Zanin Iraq galkap ten buai kipat ma-in mi 100,000 kiim teenna Heet khuapi ISte khut panin laksak zo ta uh hi. Local commander khatin a genna ah Iraq galkapte leh a kipawlpih ten ISte khut sung panin Heet khua la zo ta uh a, ahih hangin mun tuamtuamah kikaptuahna om kawikawi lai a, ISte khempeuh hih khuapi panin hawlkhiat ding kihanciam lai a, IS ten a zi leh a tate uh nusia in taikeek gawp uh ahih manin Allah pasian in pha hong sakpih leh ni khat sungin Anbar province kila kik zo ta ding hi ci'n live broadcast ah pulak hi.
Heet khuapi lakna ah Iraq galkap 30 a sih banah galkap 50 liam ta hi ci'n Iraq galkap ten Al Jazeera newste kiangah gen hi. Iraq galkap ten nung kum Dec. kha in Anbar province sunga Ramadi khuapi ISte khut panin a laksak hangun tu-in IS ten hih khuapi lak kik sawm uh ahih manin khua mite lau in tampi tai khia ta uh hi.
Heet khuapi pen US galkap ten Iraq galkapte training a piakna uh Ain al-Asad vanleng phual kiang panin kigamla lo a, Euphrates Lui kianga om ahi hi. Hih khuapi Iraq galkap ten la zo le uh ISte Syria nitumna lam ciang dong hawl khia zo ding uh hi. Anbar province sunga khuapi lian mahmah a kigen Mosul Iraq galkapte leh US leh a pawl ten lak kik ding hanciam den uh a, tu dong la zo nai lo uh a, tu kum sungin la kik zo dingin ki-ummawh hi. Zan in upmawh lohpi in US Secretary of State John Kerry in Baghdad va pha (surprise visit) a, Mosul khuapi lak kikna ding pen ngimna masa pen kikoih hi ci'n gen hi. John Kerry in IS ten Iraq gam-a a leitang uh 40% bang suplawh ta uh ahih manin ISte bei hun ni ding kisim thawh ta a, tu-a i gualzawhna in ISte ni khat ni ciangin kizo ding hi cih kitel ta hi ci'n awng baba pong hi. John Kerry in ISte sum kholna mun leh a sumngahna mun uh (datsi/oil field) phualte uh bomb a kikhiatna hangin IS ten nidang bangin a galkapte sum pia zo nawn lo ahih manin IS galkap ten a uliante thupiakna mang nuam nawn lo hi ci'n gen beh hi.
US leh a pawlte ulian khatin Nipini in IS ten Heet khuapi cing dingin IS galkap 300 kiim koih uh hi ci'n gen hi. Anbar province sung lak kikna dingin galkapte a makaih Iraqi counter-terrorism forces ten Heet khuapi panin nautang 10,000 a beisa ni bangzah hiam sungin hem khia uh hi ci'n Iraqi counter-terrorism forces commanders ten gen uh hi. Amau gen bangin Iraqte State television in Heet khuapi panin pasal, numei leh naupang khuapi nusia ten lan/dial (flag) kang khai in hih khuapi a nusiatna limte suaksak hi. IS ten nautangte kidalna ding leh tung lam panin a kikap ding dalna dingin zang uh ahih manin a kihemkhia ahi hi.
-Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.