KAWLGAM AH POLITICAL PRISONERS 69 KIKHAH

KAWLGAM AH POLITICAL PRISONERS 69 KIKHAH

April 9, 2016: Aung San Suu Kyi in Kawlgam galkap ten a uk lai in gamvai hangin thonginn a kikhumte (activists leh political prisoners) khah ding pen kumpi thak NLD nasep masa pen ding hi ci'n a ciam bangin Myanmar court in activists leh political prisoners 69 khah hi.

Kawl galkap ten Kawlgam a uk lai un democracy deih a kiphinna neite tampi thongah na khum a, tuate lakah Aung San Suu Kyi zong house arrest in kum 15 sung na kikhumcip a, tu lian-a NLD MP tampi mah zong thongah na kikhum hi. Kawl galkapte gamtatna hangin leitungin Kawlgam nakpi takin mawhpaih hi.

Tu-in political prisoners 4,000 kiim bang thongah kikhum lai ding hi ci'n local media ten gen uh hi. Hih mi 69 kikhahte pen March 2015 a sangnaupang kiphinna nei policete matte ahi hi. Tharrawaddy court a township judge len Chit Myat in hih mi 69 kikhahkhiate kiangah, "Ngawhna bangmah baang nawn lo dingin hong kikhah ta hi," ci'n gen hi.

Suu Kyi pen Myanmar parliament upper house ah foreign affairs, education leh energy minister panmun a let banah "state adviser" za kipiak beh lai ahih manin a thuneihna nakpi takin lian tuam ding hi. Suu Kyi in state adviser a let khit nungin a thugenna masa penah politics tawh kisai-a political prisoners, political activists leh sangnaupang thong-a kikhum khempeuh a manlang thei pen-a khah ding na tangko pah hi. Assistance Association for Political Prisoners in a genna ah tu-in political prisoners 90 thongah kikhum lai a, February ciangin thukhenna ding a ngak political activists 400 om hi ci'n gen hi. A tamzawte pen November kiteel ma-a kiman hi ci'n gen beh hi. March 2015 in Letpadan ah sangnaupang ten education reform ding deih in a kiphin lai un pawlkhatte police ten ngongtatna gamtang hi ci'n man uh a, sangnaupang 40 tungah ngawhna (charge) kiciamteh a, sangnaupang 30 tungah ngawhna kibang a kiciamteh hangin bail in kikhah hi.

- Agencies