A thuneihna hangsan takin zang.

[ State Spesker Pu Hau Khen Kham(2011-2015)]

State Speaker Pu Hau Khen Kham in ama thuneihna zangin Union thuneite le State thuneite vaihawmna khat a thalnialna ka thei kha hi.

Tua pen 29 March 2013 ni hi a, Gullu vai ahi hi.

Company le Union thuneite

Tua hun laitakin Union thuneite in Gullu mual a to ding Sen Companyte tawh na kithu-min khin uh a, nasep akipan ding uh hi ta hi.

Mipite in hih thu ahemlam in a kitheih pen 2012 kum beikuan pawl ahi hi. Asia apha ding kua mah in siang takin gensiang thei tuanlo ahih manin mipi sungah lung hihmawhna a om pah thu ahi hi. 

Mipite thupomzia

Ahuampi in bel Mipite in Sen companyte le kumpite mahmah a kimuang zo lo hi zaw hi. Tua ahih manin kumpi thuneite tawh kinawkna ong om toto hi. Mipite khut kilen in ma kipang khawm hi. Gam sung gam pua, sak le khang, Kawl le Zo, Khangno le Siamsinte, numei naupang khutkhat tawi khekhat khai in kipangkhawm pah hi.

State thuneite thupomzia

Mipite thapiakna tawh khua tuamtuam kipawlna tuamtuam, mipi’muan le suan tuamtuam, MPte kiangleh kumpi thuneite kiang nangawn ah lut tantan in mipite lungsim ong la photphot dih un ci in kipai tantan hi. Pu Hung Ngai ( Chief Minister ) in “ Union thu vaihawmna hi. Ei cih theih bangmah om kei” ci in ong sianggen bilbel hi. Tua hun lai khawngin amau tawh kimuh khak ding hamsa lua mahmah hi. Kumpi thunial dan in ong mu lel uh hi.

Gambup thu omzia

Companyte in 21 Febuary 2013 ni in State thuneite tawh kimu in a nasepzia ding teng uh pulakna nei uh hi. Hih hun laitakin Kachin gam Mitsone le Letpaduang sumngo khuk vai nakpi takin a kibuai laitak ahi hi. Zogam ah zong Gullu Nickel vai so lihlih hi cih gambup theihpih dingin kihanciam mahmah hi. Tua bek tham loin Kachin, Shan, Kayin, Yanggon, Mandalay,…, mipi le kipawlna tuamtuamte tawh khat le khat kizopna bawlin  lampi om bangbang tawh ma kipang hi.

Pu Hau Khem in mipi' deihna thupi bawl

Gamsung thu omzia le mipi lunggulhnate amuh ciangin Pu Hau Khen in Pu Hung Ngai( Chief Minister ) kiangah” Union vaihawmna ahi phial zongin Zogam sunga Project lianpi kisem ding ahih manin State Hluttaw in a theihpih loh phamawh hi. Hluttaw ah hih Project vai gentelna le kikupna neihloh phamawh hi” na ci giap hi.

Mapan khopzia

Pu Hau Khen mah tawh thu kikum in, State Hluttaw ah Gullu Project vai dothuai thulelate in kaikhawm kholin Pu Zozam dong ding, Pu Hau Khen in tua dotnate a dawngkik dingin company le kumpi thuneite na gen khol ding cih dan in kigel khawm hi.

Hluttaw sungah Gullu vai kikup ding thu a om ciangin Pu Hung Ngai nak heh mahmah cih mun dangdang pan kiza kik hi.

Hulltaw sung thupaizia

State Hluttaw pen 29 March 2013 in kibawl a, tua lai ah Pu Zozam in Gullu vai dotna nei a, thuneite le companyte in nasepzia ding leh a met hawmzia ding, kithukimna tuamtuam thute gentelna nei uh hi.

Pu Hua Khen in a thuneihna pen tua ciang bekah zang loin “ Nickel Project vai hih lai ah nong gen bangun mipite kiangah gen ding kisam hi” cih thukhentatna neih pih hi.

Mipi bulphut kipanta

Tua thukhentat tungtawnin Pu Hung Ngai makai in Minister 3 le MP a om teng ban ah companyte in Tedim, Kam Hau hall ah 1 April 2013 ni in mipi tawh kimuhkhopna ong neihpih pah hi. Hih kimuhkhopna dan pen kawlgam ah Galkap kumpi le Kumpi thak hun sung tawntung ading amasa pen hi ding hi ci in kigen hi.

Tua zom ah 2 April 2013 ni in Zonuamzang Khua le Dimzang khua ah Minister 3, MP te le companyte pai ngiat in State Hluttaw sunga a gen thute genkikna ong nei uh hi. Khua 14 panin mipi a kikaikhawm ahi hi.

Tua zomah May 17 ni in Tedim, Kam Hau hall ah Pu Hung Ngai maikai in mipi tawh kimuhna om leuleu hi. Tua ni bel khat le khat a kinuaizan mang dektak a, thusia lasia om loin kikhen thei liamliam cih ding ahi hi.( Hih kimuh khopna pen Rev.Thang Van Lian in lai in gelh in Zingsol Journal ah zong kisuak sak hi)

Hih bangin galkap hun le kumpi thak sunga a om nailo Project khat peuhpeuh ading mipi tawh kimuh khopna ong pian theihna pen mipite kithutuahna le Pu Hau Khen Kham in ama thuneihnate hangsan takin ong zat man ahi hi cih ka tel pha sansan hi.
( zom zel ni ei.)

Lian Tuang

Kawlpi