Trump in ngah leh high school ciang free ding a, college kah nuamte in student loans lak kul ding ahi hi. Loan kila leh mihaute in a sum met nene in hau semsem dinguh cih pen high class te ngimna ahi hi.
Zomite diakdiak I NulePate in mikangte danin college kah na ding sum I suah cil panin hong khol sak het lo ahih manin, high school ciang tawh din khawl kitam kha thei ding ahi hi.
Security lam ah, Trump in illegal immigrants teng hawl khiat sawm hi. 11 millions bang om ahih manin tuateng hawl khiat man ding $ billion 6 kim bei ding ci hi. Hiteng hawl khia leh khasum tawmcik tawh a niam pen nasep asem ding USA ah mi muh hak dingin van man kahto hethet ding ahi hi.
Hillary in hite I hawl khiat sese sangin hoih takin sit pha in, work permit pia in tax hoih tak piak sak zawk ding hoih sa hi.
Trump in refugees teng ka huh niloh sangin USA galkapte hoih takin ka puahkik ding ci hi.
Tu hun ciangin kipawl kihuai siam leng gitlohna tawm zaw in, kinawl khin leng ngongtat na om thei zaw ahih manin gamsung security dingin a huai siamte hoih ka sa zaw hi.
Healthcare;
Obama in a ma hun sungin Obama care cih health plan khat hong nei a, income tamte health insurance tampi man sakin, income tawmte tawm man sak mahmah ban ah a mawkna in a ngah sak zong om hi.
Eimite diak damlo in emergency tung leng health insurance nei lo kitam thei den hi. Obama care pen sum nei ten a deih loh zah khat in, sum nei lote in noptuam pih mahmah hi.
Hillary kah leh phiat kei ningin puah phat huaite puah ning ci hi.
Trump in Obamacare pen disaster hi. Phiat mai ning ci hi.
Foreign policy & economy ;
Gamdang tawh kizopna ah Hillary in experience kician tak nei khin ahih manin a kikhel ding tam lua lo ding hi.
Trump in bel USA companies gamdang aom teng hong caihkik na ding ka bawl ding ci hi. Adiakin Sen gamah USA business tampi om hi ci hi. Hite koi ci sapkik ding na hiam? Cih a kidot sim in dawng thei mel lo hi. Tax ka khiam ding cih gen hi.
Company tampi Sengam a tai pen tax hang sangin, work force ol zaw, labor cost tawm zaw tham, infrastructure hoih factory hoih, building hoih dan kibang veve, ahih manin nitha cialna kiman lah hi, nasemte uknop zaw, law sue akipan tawm zaw, nasep hanciam zaw asia gamte panin USA hong caihkik ding uh bel mualmong et bang ahi hi.
Hillary tua thei gige ahih manin gamdang tung USA companies te i security om theih zawkna dingin tua gamte tawh kilem theihtheih ding hoih sa zaw hi.
Trump in illegal immigrants teng hawl khia lai ding, gam dang tungsa USA companies teng samkik ding a cih milmel pen nasem ding mi om kei semsem leh tua company te USA ah din khawl kul ding hi. Trump thu gen a nung a mai kituak lo in, practical lo ahi hi.
Tua zah cipak ni. Sau deuh zel.
Khat Thang
Florida USA
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.