A nu leh a pa a zawn’ mahmah hangin sepna bel nei tuak uh hi. A pa’n Hong Kong khuapi a French embassy ah an huan nasep sem a, a nu’n mi inn ah nasem in sum zong hi. A neu a kipanin a pa’n zingsang thohbaihpih in, kungfu sinsak den hi. A pa’n kungfu sin leh thuak zawhna, hangsanna leh gamtatna khuahei kilawm hong sin ding hi ci-in ngaihsut hi.
Jackie Chan kum 7 a phak 1960 kum in a pa, Charles Chan Australia a Americate embassy ah an huan nasep ngah ahih manin a nusiat loh phamawh hi. A pa’n Hong Kong ah nusia leng kungfu mah sin zom thei ding a, China Drama Academy ah khum leng kum 10 sung hih sanginn ah drama sin thei ding hi cih zong ngaihsut khawm ahih manin Hong Kong ah nusiat san hi.
Jackie Chan in a sangkah sungin kungfu, circus lahna ding a kisin gymnastic nam khat ahi acrobatic kici, lasak leh lim kineih (acting) cihte sin khawm hi. A sangkahna ah a sangkahte pen Peking Opera ah lasak, limcin, acrobatic leh martial arts kidemna a kihel ding utte kahna mun ahi hi. A sangkahna ah thumang lote daan khauh mahmah kipia den a, a haksat mahmah hangin a paina ding leh a omna ding mun dang om lo ahih manin Jackei Chan kahto suak hi. Hih sangah a kah sungin pai khiat ding kiphal lo ahih manin a nu leh a pa tawh tam vei kimu lo uh hi.
China Drama Academy ah sang a kah lai-in amasa pen dingin, kum 8 bek a phak in Catonese movie “Seven Little Villian Fighters: Big and Little Wong Tin Bar” kici ah kihel hi. Tua khit a sawt loin tua sanginn a opera lasa “The Seven Little Fortune” kici sungah hong kihel hi. Hih sungah film tampi a a piah khawmpih a lawm hoih mahmah Samo Hung leh Yuen Biao zong kihel uh ahih manin lawm hoih mahmah hong suak uh hi. A sawt loin a thum un hong kipawl uh a, “The Three Brothers” hong kici uh hi. Jackie Chan hong picin khit nungin film action stunman (film sunga kilaina, mawtaw hawl cihte lim a piah taktakte) in hong pang a, Hong Kong film industry ah a min hong kithei pian pah hi.
Kum 17 a phak in China Drama Academy panin graduate man hi. Graduate a man khit hangin tua hun in Chinese opera pen mi’n thupi sim nawn lo ahih manun hih sanginn panin graduate zo khia ten sepna ding mu zo lo uh hi. Laisim ding dan leh lai-at ding dan zong hilh lo uh ahih manin siamna leh pilna nei lote sep ding ahih kei leh stunman nasepna zon ding cih lo buang lampi dang nei lo sawnsawn uh hi. Film/movie pen tua hun in Hong Kong bek ah kibawl a, tua a kihel dingin khangno, mi hangsan leh stunman hat leh hangsaan mahmahte bek kideih hi. Jackie Chan pen a ngaihsutna manlangin, hih ding a kici khat peuhpeuh lauh nei loin hih suk ziauziau ngam ahih manin director ten deih mahmah uh hi.
Hong Kong ah hong pai in stunman dingin hong pang hi. Kum sawt lo khit nungin Hong Kong film industry in sum meet ngah zo lo ahih manin a nusiat loh hong phamawh kik hi. Australia ah a nu leh a pa kiangah hong pai suk in, restaurant leh in van bawlna mun cih khawng peuhah hong kilawh kawikawi hi. Australia ah a nasepna ah a min Kong-sang cih lawh haksa sa ahih manin ‘Jackie’ ci-in sam uh a, Australia ah a nasepna mun panin ‘Jackie’ cih min hong ngahin, Jackie ci-in a min kisam suak hi. Australia ah nasepna haksa lua ahih manin Australia gam cimtakhuai sa mahmah hi. Australia ah a om lai in Hong Kong film industry ah director/producer minthang mahmah Lo Wei kicipa tawh nasem khawm film Manager Willie Chan in film thak khat bawl sawm a, tua dingin mi kisam ahih manin Jackie Chan telegram tung panin hopih in sam hi. Hih pen Australia gam panin a pusuakna ding lampi om sun hong suak hi. Tua hun pen 1976 kum hi a, Jackei kum 21 bek hi pan hi. Willie Chan in “New Fist of Fury’’ cih film sungah kihel dingin cial ahih manin Australia nusiatsan pah hi.
Hong Kong a tun khit phet in Willie Chan in a kisapna khempeuh leh a maban ding khempeuh vaihawmsak pah a, lawm hoih mahmah hong suak pah uh hi. A lawhcin’na thu a gen khak peuhpeuh ciangin Willie Chan’ min lo khial ngei lo hi. Ahih hangin hih film ah a director ten Jackie siamna lamsang lim takin zangsak lo uh ahih manin hih film pen lawhcing lua lo hi. Amah pen kungfu leh ciamnuih piah khawm lamsang siam mahmah ahih manin a sawt loin ama’ siamna tawh kituak mahmah ding “Snake In Eagle’s Shadow” kici hong bawl a, hong minthang khia pah hi. Tua khit in “Drunken Master” kici hong bawl leuleu a, hih film in blockbuster hong ngah kik leuleu hi. Tua khitin “Fearless Hyena” kici hong bawl zom a, hih film zong film hit mahmah leh minthang hong suak leuleu hi. Bruce Lee a hun lo pi-in hong sih vat manin ama zaa laih ding Hong Kong film industry ah om lo ahih manin Jackie Chan in Bruce Lee zaa hong laih in film tuamtuam hong bawl zom zel a, Asia bup gen tak loh leitung mun tuamtuamah amin hong kizeel suak pah hi.
Asia sungah hong minthan’ khit nungin America ah hong pai hi. Ahih hangin deih bangin a min hong kilang zo lo ahih manin America nusia kik hi. Mangpau siam lo ahih manin tuitum zo lo suak hi. Jackei in Mangpau leh limcin khop pen haksa sa pen ing ci-in gen hi. US ah a bawl “Rumble In The Bronx” kici kum 10 khit nungin US ten hong khuanung muh nuam panpan ta uh hi. Tua khit in “Shanghai Noon” leh “Rush Hour 1,2 &3 “ hong bawl kik a, hih khui khempeuh Hollywood A list sungah hong kiciamteh in, leitung khempeuh in a min hong thei suak uh hi. Tua khit in “The Tuxedo”, “The Medallion” leh “Around The World In 60 Days” hong piah kik leuleu a, ahih hangin a masate bangin hong minthang khia zo lo hi.
Jakie Chan kum 61 val a phak khit hangin action film leh stunman mah in pang veve lai hi. Nung diak a kipanin action film tam bawl lua nawn loin a film bawlte pen fantasy, drama leh romance lamah hong laih hi. Tu lianin a hun tamzaw pen dongtuakte huhna leh huh ding kisam cimawh, tagah, beidongte huh in ‘charity work’ lamsang pi bawl mahmah hi. Tu in UNte Ambassador for UNICEF/UNAIDS in pang a, khanghamte, naupangte leh lam-et bei a natna tuamtuam neite leh AIDS natna neite huhna in a hunte zang zaw ta hi.
Jackie in December 1, 1982 in Lin Feng-Jiao kici a no tawh luak khawmin teenpih a, tapa khat, December 3, 1982 in Jaycee Chan kici nei uh hi. A tapa zong limcing mah in pang hi. Jackie Chan a lawm ten Y’uen Lo, Sing Lung, Pao Pao cih bangin zong sam uh hi. A tun sang lo a bat hangin pii 5 leh letmat 8½" (1.74 m) pha hi.
A film kihelna pawl khat:
Fist of Fury (1972), Enter the Dragon (1973), Shao Lin mu ren xiang (1976) ("Shaolin Wooden Men"), Jian hua yan yu jiang nan(1977) ("To Kill With Intrigue"), Yi zhao ban shi chuang jiang hu (1978) ("Half A Loaf of Kung Fu"), Fei du juan yun shan (1978) ("Magnificent Bodyguards"), Drunken Master (1978) ("Drunken Master"), The Young Master (1980), "Enter the Dragon" (US ah film sungah a piah masakna, producer Robert Clouse), Battle Creek Brawl (1980), The Cannonball Run (1981), , Winners & Sinners (1983), Project A (1983), Wheels on Meals (1984), Fuk sing go jiu (1985) ("Winners & Sinners 2"), My Lucky Stars 2: Twinkle Twinkle Lucky Stars (1985) ("My Lucky Stars 2", "Winners & Sinners 3, The Protector (1985), Police Story, Armour of God (1986), Project A 2 (1987), Police Story 2 (1988), Miracles - Mr. Canton and Lady Rose (1989), Armour of God 2: Operation Condor (1991), Supercop (1992) (aka "Police Story 3"), Rumble in the Bronx (1995), Jackie Chan's First Strike (1996) ("Police Story 4"), Mr. Nice Guy (1997), Who Am I? (1998, Rush Hour (1998), Shanghai Noon (2000), Shanghai Knights (2003), Rush Hour 2 (2001), The Tuxedo (2002), The Medallion(2003), Around the World in 80 Days (2004), New Police Story(2004), The Myth (2005)
Jakie Chan’ thugen pawl khat:
1.Jackie Chan hih ding hanciam kei un, Jakie Chan khat bek om ahih manin computer sin zaw un.
2 . Film/movie ka bawl simin liam ding kisam den hi. Ka lungsim bel veng khin lo hi. Ahih hangin a hai bel hi sam keng.
3. Action filmstarte nuntakna tom lua ahih manin action star ding ka ut kei hi. Sawtpi tak nungtak ding ka ut a, ka nasep sawtpi mah sem nuam ing.
4. Film bawl ciangin zuih ding tawm khat ka neihte ka managerpa' tungah ka gen hi. Tuate:- Lim kilawm lo kihelsak loh ding. Lupkhawmna lim kihel sak loh ding. Naupang hong mu nuam ten tua bang lim kilawm lote mu nuam lo uh hi.
5. Bruce Lee zaa laih ding ut in ka nei ngei kei hi. Jackie Chan masapen mah ut bel in nei den ing.
6. Ka film a mu kha ten lauh nei lo hi hong ci uh hi. Ka action stun hihte lau lo hi hong cite kei sangin hai zaw uh hi.
7. Hollywood ten action stun leh kilainate sangin ciamnuih leh nu leh pa kipolhnate thupisim zaw uh hi. Hong Kong ah action stun leh kilaina mah kithupisim zaw a, America ah hihte pen val lua in kingaihsun pahpah hi. Tu in film ka bawl ciangin Hollywood leh Asia panin a hoih teng ka gawm hi.
8. Action/kilaina leh kidona film ka bawl ut hangin thagum zatna leh ngongtatna ka deih kei hi
Jackei Chan in a film pawl khat a bawlna panin a ngah sum tang kiciamtehna:
Hung Fan Kui (1995) - $ 4,000,000
Shanghai Noon (2002) -$ 5,000,000
Rush Hour 2 (2001) - $ 15,000,000 +gross point
Around The World In 80 Days (2004) – $ 20, 000,000+
Rush Hour 3 (2007) - $ 15,000,000 + 15% gross
-- IMDb Mini Biography By: Murray Chapman/ Official Website of Jackei Chan- Biography
Zolai tawh a tei : Thang Khan Lian
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.