Zomi Party Thak Vai !

Tusawng teng in kawlgam ah Zomi min tawh Party thak khat phuatding vai thu
kikupna ah mi 50 val kah cih thu lengsawn kiza hiauhiau hi. Hih tawh kisai
in ka muhzia leh ka ngaihsut zia sutlo in ka omthei kei hi.

Zomi min tawh party akiphuat sawm pen tu tawm hilo in 2010 lai pek ahi hi.
2010 kum kitelna ah adem ding in Zomi min tawh party khat Kawlpi ah
phuatsawm uh hi. Hih thu kazak ciang in kalung nuamlo ahih man in Pu Cin
Sian Thang, Pu Gin Kam Lian, leh Sia Khen Za Sian te sam in Zangkong
khualai zang Bo Aung Kyaw lampi aa Power Restaurant Sai dawl tungnung ah ka
kikum uh hi. Pu Gin Kam Lian va paito in ava khoh ding in ka khensat uh hi.
Kikupna mankhit phet in agei lam 40 aa om Pu Sawmno (Laitui) kiang ah Ks
100,000/- leitawi in Pu Gin Kam Lian' khutsung ah alamsap ding in kapia hi.
Atom in gen leng party phuat ding vai hong mit hi. Hih thu Pu Go Sawm Khup
(USA) in hong theihpih mahmah ding hi.

2009 kum pek in "Hih Than Shwe' 2010 kitelna pen ut in ut ta kei leng nawk
kul ding aih teh bang cih ding?" cih thu kikupna kinei den hi. ZNC in bel
Zomi min him him zuaklo ding; Than Shwe' mai ah Zomi surrender lo ding; Hih
Than Shwe' bawl kitelna ah Chin min tawh lah lutlo ding Zomi min zong
lutsak lo ding cih thute kadinpih uh ciang un atawpna teh 2009 kum December
kha in Zangkong aa Pu No Than Kap' inn ah chin state bup phial pan alung
himawh teng in Democratic Alliance of Nationalities (DAN) kiphuan khia hi.
Tua ni in ZNC min tawh Pu Gin Kam Lian leh Pu Cin Suan Mang tawh ka thum un
ka kihel uh hi. Tua zawh asawtlo in Sakura Tower dawn aa Ansaipi pen ah
tulaitak aa Falam Ahmyothar Hluttaw MP Pu Zung Lei Thang in sponsor sem in
sun an hong vak uh aa bangbang hileh Chin min mah zangh ni hong cih
teiiteii ciang un tua ahih leh ko ZNC hong kihel dah nung cih tawh kikhen
in amau CPP tawh hong laih uh aa kitelna ah lut in MP zong pawl khat in
hong ngah uh hi

2015 kum kitelna leuleu ciang in ZCD in hong ngah kei zenzen leh (or) ZCD
pen azenzen in ZNC lai dan mah in Matpongtin (registration) hong kiphiat
khak zenzen leh amanlang thei pen in Zomi min pua party khat phuat kul cin
kei' dinpih thu hi aa tuni dong kilaih tuanlo hi

Ahi zong in mipi in kisam sa aa Zomi min tawh party thak khat hong phuat
sawm leh kakho nawn kei ding hi. Bang hang hiam cih leh:

1. Khua hun kilaih ta hi.
     Than Shwe' hun lai dan in galhangte bek ii septheih sepngam hun hi
nawnlo aa mipil misiam mihuaizote sep hun hita hi.

2. Khat sang nih hoih zaw
     Democracy ngeina tawh kidem ciatciat ding hita ahih man in khat kia a
om sang in nih om leh hunsawtpi aa ding in hoihzaw veve ding hi. Nih val
bel hoih lo ding hi.
     Eitawh kinai pen Mizoram ah zong MNF leh Congress omden lel hi. Khat
kia hi leh democracy ngeina te nungta zolo ding hi.

3. Minam picing baih zaw ding
     Ei tawh ih pawl akibat kei nak leh ih gal ih sak pahpahnate hong kiam
ding hi. Democracy zia tawh pawl zon dan ih siam pah ding aa ih migi tuam
ding hi. Abawngbawng akhilkhil aa ih painate zong hong kiam tuam in ka um
hi.
     Kitelna khawng hong om teh minam thusim aneih huai lam khawng zong ih
thei pah ding hi. ZCD bang Tedim leh Tonzang ah hat aih teh tu aa athak pen
Kawlpi leh Tamu khawng ah hong hat mahmah leh bel ih minam met mahmah ding
hi. Atom in gen leng Minam Lian minam picing suakbaih tuam ngelngel ding hi
hangh.

Tua hi in party phuatsawm te'n adang phuat akul nawnlo ding in ahuamkim
thei pen leh atangzai theipen in nong phuatna ding un hong thuum ing.

Khialhna a om leh ngaidam

Mung Laan Thang
Tawmvei USA