1
Singapore a Numei inntengte thuakna.
( a numei pen Clarkson Mawi ahihi)

Zawn leh ngauh luat manin 25.6.2013 in Singapore leitang ka na siik a, 7.7.2013 ni in ka nasepna ding pute tawh mel ka kimu uh hi. Tua ni akipan a inn vuah ka om pah hi.

Ni 5 zong a beima in, ka silh leh ten lui teng hong paih mang sak uh a, phal kei taleng nial theih hi lo ahihmanin ka puante hong paihsak laitak uh khitui tawh ka gaal et mai hi. Kha khat hong cin khit a kipan ka pi in kei tungah a khutlum ngak hong kipan ta hi. Tuani pen kha khat a cinni lian ahihi. Ciapteh baih kik bilbel! Khate hong bei toto in ka pi in hong vuak nawh semsem a, ka maivunte bang ka pi khutma thuaklah in hong bawk a, hong dup keei ta hi. Khatveivei na ka sak luat ciangin kum 3 a cingh pan naupangte kah bangin thuak zo lo in ka kap khia gawp zel hi. Tai khia ning ka ci zongin a inn uh Numbat meekte tawh a kikalh leh a kihong ahihmanin a dan ka thei zo kei hi.

Ka tun tungin ka pu sunghnu leh a naupang uh tawh room khat sungah a lum khawm himah hiveng, kha thum khit ciangin amau tawh lupkhop gen loh kei zat ding lukham leh muaiza naleng ka mu kha ngei nawn kei hi. Ka pi lah naupaai hi in, kha sagih bang pha khin liang mah taleh nisim hong vua den zo veve a, kei hong vuak pen ama tavuan hiam cihnop huai liang hi. Thanuam den zo zong ka sa mai hi!

November 16 ni hong cin petmah ciangin naungek kha khat cinna Birthday bawl uh a, tua hun awng sungin ka puaisate ka hopih leh ka puaisate in Palikte na sam in hong ci sawnsawn ta lailai, pauleham ka siam loh tawh Palikte ka hopih ngam kei hi. Tuani mah a zanin ka puaisate in ka pi na hopih bilbel uh a, tua tawh kaalkhat sung bang ka thuakna tawm hong pha tuam zo sam hi. A kaalkik a kipan bel ka pite hong bawl dan pen nasia semsem cih ding hi. Room awng sung khat ah hong sam in ka theih loh thu hong dong uh a, ka dawn theih loh ciangin tot cihtak mah in hong tawng uh hi. Hong totna kammal zah leh hong saat zah uh kikim phial in um ingh.

Nitaak sanggam melmak hun ciangin kipumsil dingin kisilna buukah ka lut hi. Ka ci ka sa khempeuh khoih khak ngam loh zah dongin pum nat ahihmanin kisil thei lo in ka tucip a, tua sungin ka lungsim sungah "Aw, tulaitak ka khua vuah Christmas nuam takin na kibawl mah ding a" cih dongin ka ngaihsun toto kha hi. Tua kawm in kisilbuuk kongkhak kip takin ka kalh pha kik a, lunglen leh ka pi hong saatna ma thuak lah khawm in tawmvei sung kah cihtakin ka kap hi.

Ka lupna zong lah anhuanna gei hi ziau a, ka neih sunsun niikten puansilh teng leh innlam phone numbat ka ciaptehna laibuneu dong takin ka pi in hong paih sak khin ahihmanin ka lungkham mahmah hi. Ka thuakna teng hong mu simsim numei Na No a kici khat om a, tua pen ka inntung vuah teeng hi. Amah pen innlam a ka u numei tawh a kigual lian ahihi. Hehpih huai ong sa mahmah hi. Amah zong kei mah bangin kepcipna sungah khuasa hi a, ahizong a pite in vel in vua ngei lo uh hi. Tua nu tungah ka puaisate phone numbat ka pia a, aman ong hopihsak thei bilbel hi.

Zingsang khat ka pite innkuan tawh innsungah ka om laitak un kongkhak hong kikiu a, ka pi in kongkhak a va hon leh ka u Hretea hong lut mawk hi. Ka u in hong lakhia ding hin teh maw cia ka lungnop mahmah laitakin ka ihmutna pan ka khanglo hi! Zingsang khua na vaak khin a, na ka sep kawmkawm in tuni bangzah vei saat ka thuak tam maw ci in ka lungngai niloh leuleu hi. Tua pen ka hun zat dan ahihi!

An hong piak uh ciangin ui an piak bangin hong pia uh a, kham khop ka ngah ngei kei hi. Nuntaak sangin sihna ka teelnop hun tam mahmah ta hi. Na sem in sem ta kei leng tut ding hong phal ngiat lo uh ahihmanin ka cipumpi a na hi ta mai hi.

 11.1.2014 ni hong tung ta a, Na No ka cihnu in Palikte hong na sapsak na hi gige hi. Palikte hong pai takpi in ka omna inn pan hong lakhia uh a, Palik zumah thu tampi hong dot khit uh ciangin ka puaisate khut sungah hong apkik uh hi. Ka puaisate in tulaitaka ka omna GSC ah hong puak uh hi.

15.1.2014- GSC ah lungnuam takin ka duh bangbang ka ne thei ta hi. Nuamna khitui nuul kawmin leitungah kei bek ha nei bangin ka kam sungah ante ka khai ziahziah ngam ta a, ka maitai ngam ta hi.

1.4.2014 ni in lamet lohpi in ka siapinu in ka nasepna vuah a zalian pen nihna in hong lamsangto hi. Ka thungetna Pasian in za a, ka khituite hong muhsak cih ka phawk hi. Topa aw nuam lua ingh...Ka thuak gimnate gelh khia gai leng tam lua ding ahihmanin tua zah tawh hong khawl bawl mai ning maw!

(Hih thu pen namdangte pau tawh group sunga kigelh hi in, Zomi te sim ding ka deihsakna tawh ei Zokam in a tomin hong letkhia kik ka hihi. A lim kong post zong amahmah hih tuak.)

Francis Lam Thang
Zomi Quavadis

Post a Comment

Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.

 
Top