Pa leh a tapa khitui luang khawm

Pa leh a tapa khitui luang khawm

 

Nupa kop khat in tapa khat nei uh hi. A ta leh a pa a din uh, a golna uh ki kim uh hi. Khat vei a nih un gamlak(gamsung) hong vak uhhi. Ni tak a ciah uh ciangin a khua uh a ki ngal muhna Tai khat ( Km 1) ding khawng panin a Pa in suang khat a khe tawh phalkha in a khena sa mahmah hi. Lampai thei nawnlo hi. A pa in a tapa kiangah khua ah na pai inla mel theih tengin hong pua uhleh hoih ding hi.  Ka khe na lua ahih manin a paizolo  hita hi-ing cihi. A khua pihte khat peuh vaiciah a ngak uh hangin kuamah om nawnlo hi.

 

A tapa in, " Pa aw bangbang hileh khua zong gamla luasamlo aiteh naupuak danin ka nungah hong ki luai-inla hong pua ning",ci hi.

 

 A pa in, " nong puak zawh ding hangin gimlua mahmah ding na hih manin khua ah melthei te na samin tua hileh tawldam huaizaw hi",ci leuleu hi.

 

A tapa in, " ka gim ding zongin phamawhlo hi Pa aw ka nungah hong ki luai hoh in cici hi".

 

A pa in, " hong ki sin leng aive", ci-in a Tapa nungah hong ki luai hi. Lampi ah a pai kawmkawm in,

 

A tapa in, " Pa aw ka neu lai-in nong puapua aa, ken nang khat vei beek kong pua kei hi", cihi.

 

A pa in, a Tapa aw a zak ciangin a aw-khum salua zungzung ahih manin a khitui hong luang kawmsa in a tapa lutungah a khut nga in Thupha piapia hi.

 

A tapa in, " Pa aw ka lutung nong koihkoihsak bang hiam", cihi.

 

A pa in, " tapa aw hih bangin na Pa nong itna telsemsem ka hih manin lungdamlua in Thupha hong pia ing ta aw", ci hi.

 

A tapa in, " Lungdam ei Pa",ci-in a khitui luang kawmsa in a pa a inndong tunpihzo hi.

 

Lungkimna cihpen kammal khat hang hi aa, a thupilua zong hilo hi. Pa thupha ngahna dingin neih leh lam hi masa lo, pilna siamna hi masa lo hi. Pate' lungtang a thuak Tapa hih ding thupi penpen hi. Thupha i ngahna ding hunhoih aom laitak hun om hi. Tua hun pen a dawhsiam a pomsiamte' bek in Thupha ngah hi. Tua hun icih pen Nu leh Pa te in hong dampih sungin Thupha dawhsiamte hi pah hi. Lungdam.

 

Note: Tangthu phuah tawm ding khat hong suak vatzel ei. Hong ngai dam vo.

 

Thawn Tuang
Nashville TN USA
June 22,2015
Ka laigelh tengteng>>>www.zomi-angvaan.blogspot.com