Christian Nuntakna ah Khangcin Ding A Kisapna

Thupatna

Mihing nuntakna ah zong khanna kisam hi. Khan theih lohna pen a lunghihmawh huai le a kidot huai thuphamawh khat hi ding hi. Humpi sanghang in zong ganhing a khangcing nai lo nawine laite le a zawngkhal a thanemte mat masak nek masakin nei ziauziau hi. Tua mah bangin Christian nuntakna ah zong a khangcing thei lote pen bawlsiatna tuak leh puk pahin thuhilhsya maan lote adingin mat nop mahmah uh hi.

 

Khangcin theihloh nadingin ih puk theihna ahangte

Hih puktheihnate pen Hebrews 5: 11 – 6:3 sung teng sim lehang kimu thei hi.

(a)   Theihna tualniam (Low Understanding): Kha lam ah tha zawngkhal mite in  Lai Siangtho sin ding sim ding hunte ah zia nei mahmah uh a, vai hamsa sa mahmah uh ahih manin a theihna uh tualniam mahmah hi. Theihna tual niam le picinna om thei lo hi.

(b)   Mangngilhbaihna (Forgetfulness): Mangngilh pahpah ih hih manin tatsat loin ih mangngilhloh nadingin Lai Siangtho ih simsim (reading), ih sinsin (bible study) kul hi. Ih Christian upna ih nuntakpih ding kimangngilh pahpah ahih manin ih mangngilh loh nadingin Lai Siangtho simin thu ih nget den kul hi.

(c)    Ankam lim lohna (Poor appetite): Ih kha ankam hong limlo sak thei thu pen Topa ih it zawh lohna le leitung nate ih it luatna thute hang ahi hi. Mihing nuntakna sungah zong lup hunin lum lo, thawh hun in tho lo, tui dawn hun, an nek hunte ih pelhpelh ciangin ankam limna kimansuahin damlohna piang thei hi.

(d)   Gamtat ngei lohna (Lack of exercise): Ih upna gamtang sak ngei kei lehang (ahkl) ih upna hong kisin ngei keileh thuakzawhna ih nei zo kei ding hi. Gamtang kei lehang kicidam lo zawa, kizang ngei kei lehang kithadah hi. Tem pen tat lehang hiam semsem hi. Kitaat loin a om thu-ummi pen kha lamah hiam thei lo, khangcing thei lo ding hi.

 

 

Khangcin theih nading (Remedy)

(a)   Thu-ummite ih khangcin ih picin theih nadingin bangmahin a kimang lo nasepnate nusiat ding le a naupangvai thute nusia-in a thuthuk zawte ngaihsutin neih kul hi. Thu-ummi khat ii a nisim nuntakna pen Khrih sungah khangcin ding picin ding a phamawh ahi hi (Eph. 4:13,15: 2 Pet.3:17-18; 1 John 3:2).

(b)   Khangcinna picinna pen mihing hoihna idea tuamtuam le thatang hanciam zawh thu tawh zong piang khin lo hi. Pasian kammal Lai Siangtho thalawp takin simna zakna tungtawnin Kha Siangtho in thu-ummite a hehpihna thupha tawh hong mainawtpihna hang hi zaw hi (Sawltak 2: 41-42). Sim kul, sin kul, zak kul, nget kul cihte hi zaw hi.

 

Thukhupna

Ih Christian nuntakna ah khangcin ding thu pen teel ding thu hi nawn lo hi. Thuhilhna pawlkhat ah pianthak zawh gupna tawh kisai ah kitan nawn lo ahih manin ih nisim Christian nuntakna ah ih gamtat siantho na zahzah leitung thupha tawh a kisai bek hita cih bangin hilh mawkmawk uh hi.  A taktakin ci lehang siantho loh, khangcin loh, picin loh a phamawh ahi hi (Spiritual maturity is not an option). Ih pianthak khit ih Christian nuntakna ah khangcinna, gamtat hoihna, hanciamna, picinna, nuntak siangthona cihte pen leitung thupha ngah nading cih bang bek hi loin thu-ummi taktak ih hihna a lak tetti ding hizaw hi. A upna ah a kho mite le upna sungah khamiitna tawh a khangcing mite bekin tawntung tawldamna mu ding uh hi. Lai Siangtho sungah “nuntak siangtho lo tawh kuamah in Topa mu zo lo ding ahih manin nuntak siangtho na nungta un” na ci hi (Heb. 12: 14). Pawlkhatte leuleu in pianthak khit a nuntak siantho zawhna pen gup ngah theih nadingin thalawh a kul bulpite bangin gen kilkel leuleu mawk uh hi. A taktakin ci lehang pianthakna maan tawh ih ngahsa gupna pen tua ih nisim Christian nuntak, gamtat, sianthona ah a kinga cih bang hizaw lo leuleu-in gup ngah taktak maw taktak lo singkung a gahin a kitheih nading tetti hi zaw hi (The evidences are not the cause). Kha Siangtho gah ahihkeileh Christian hihna taktak a lak tetti a nei lo mite pen a patcil pek panin a piangthak taktak ngei vet lo uh hi kha ding hi. Tua ahih manin Kha lam khangcin theihlohna pen leitung thupha taan nading ciang bek hilo zawin tua bang mipa a patcilin Pasian’ ta cihna a ngahtaktak lo ahihna a kilang sak tetti ding hi zaw hi (Lack of Spiritual growth may be proof that such a person was never a true child of God). Singkung a gahin kithei a cih mah bangin thu-ummite’ nuntakna ah khangcin loh a phamawh gah loh a phamawh ahi hi. Tua phatmawhna thu pen teel ding thu hi loin, taktak maw taktak lo a lakkhia dingin a kisam thu hi zaw hi. Khalam picinna ih cih pen Pasian’ hehpihna tung bekah a kinga hi a, tua pen Kha Siangtho tungtawnin ahong piang ahi hi. A hawmpi-in a om nuntakna ah picinna piang thei lo ahih manin thu-ummite khalam khangcin theih nadingin a kisam Kha Siangtho letsongte ih zat ding thupi mahmah hi. Ih nisim Christian nuntakna ah a kisam zuihna pen thalawhna tawh kisai thu hi nawn lo zawin a kipsak tetti tawh a kisai ahihna thu lianzaw ta hi.

 

Suang Dal