Bang hun in Pasian minthang hiam?

Thu masa: Zion tate aw khat vei Laisiangtho sunga om mi minthangte nuntakna tungtawn in Pasian min bang hun taktak in thang hiam, thupha a sanciang, haksatna tawh a kidim hun ciang, ahih kei leh Pasianin thupha a piakciang Pasian mangngilh zawsop cihte nuntakna LST tungtawn in kikum khawm leng cih a nuai a bangin a kihawmsawn hi hang:

A. A nopsak laitak, thupha a san laitak Pasian minthang semsem

1. Joseph: A haksat hun kum 1-35 sungphial Josef pen mi enhuailua hinai lo hi. A haksat pen hun laitakin zong a Pasian a dingin citakin, paubanna ama nuntakna ah kimulo hi. Hih kum 35 hunsung pen haksatna sungah Pasian a dingin a cihtak hunsung hiphot a, Pasian minthanna taktak a kilat hun tamvei lua nailo hi. Pasian in a sang penpen mun dong ah lamsang in thupha pia in, pahtawi a, mi khempeuh en penpen a nuntak hun hongsuak hi. Makaipi hong sem in, apa innkuan khempeuh a honkhiat hun hong suak in, Pasian a umlo minam leh gam a dingin nangawn in na lianpen sem hong suak a, gamdang ah Pasian tate adingin maipha a kingah penpen khang hun hong suak hi. A sih dong in ama innkuan in Pasian leh mite maipha ngah in, thupha tam sang semsem leh Pasian minthanna kilang tam semsem hi. Thupha a ngahna dingin mangman (dreamed) a, mang a mat hun pen thupha ngah hun hipah lo in, haksatna na nawkto phot a, tua haksatna nawk hun hong beiciangin thupha tawh a nuntak hun bei dongin a hampha nuntakna nei suaksak bek hilo in, Josef thupha ngah hun pan kipan in Pasian minthanna hong lian semsem hi. Thupha hangin Pasian maipha kisel zawlo in, Josef thupha ngahna pen Pasian minthanna lian mahmah hongsuak zaw hi (Pian 37-48 chs).

2. Caleb: Izipt gam ah saltang sungpan a suak (piang) khempeuh pan in Kanaan gam aluah mi nih bekbek pha a Joshua leh Caleb ahi uh hi, a dang khempeuh pen lamkal pan piang vive ahi uh hi. Moses nungzui in Izipt pan Topa in Israel mite a paikhiat pih laitak in Caleb kum 40 pha khinzo ta hi. Lamkal ah khatvei beek Topa leh makaite adingin paubang ngeilo hi. Moses a sihkhit ciangin zong makai thak Joshua tungah kam khatvei beek paukhial ngeilo hi. Joshua tawh khang kikim, kum kigual hi a, makai sepna vai ah a lungsim palang ngei hetlo mi khat ahi hi. Kanaan gam a tunciangin, kum 85 pha khinzo napi in, ama khuapi ding amah leh amah kizon in gal a dona ah makaipi ahi Joshua tungah thu na donga, a khangual khat ahih hangin itna leh zahtakna tak tawh hong kalsuan hi. A kum tam semsem mah ta leh Topa in hatna pia semsem in, muvanlai bangin thahat kikna pen Topa in apiak kik mite sungah khat hi a, a kum tam semsem leh ama nuntakna tawntung in Pasian minthanna kilang semsem hi. Kum 85 a phakciangin, ama mite tenna ding khuapi galte khut sungpan in la zo in, gualzo tot lai in, thupha ngah semsem a, Pasian min thang semsem hi. Efraim minam Joshua hi a, Kaleb pen Judah minam ahi hi, ahizongin, Kaleb pen ki nampi sak tuanlo in, Pasian sathau nilh Joshua zahtak siam in, Pasian maipha, mite maipha, makaite maipha na mu hi. Kanaan gam etna pan hong ciah uh ciangin Joshua tawh lung kituak takin thuman bangin Moses tungah thu a genna hangin Pasian a lungdam mahmah a, Pasian nung a zuihcil pan kipan in a sihdongin Pasian a nungngat san ngeilo, Pasian min a thangsak tawntung Kaleb ahi hi (Joshua 14).

3. David: aneu tung pan in kipan in Pasian maipha a mu mahmah mi khat hi a, a innkuan sungah a guallel khat hi mah leh a sanggamte a mawhsak ngeilo David nuntakna pan kimu thei hi. Kumpi dinmun a tun hunciang nangawn in aneu lai huna Topa minphat nop a sakna leh a phatzia a khiam ngeikei hi. Guallelh hun, gualzawh hun, bang hun bang hun ah Pasian minphat zo tawntung mi khat ahi hi. Mawhna a neih hunin ka mawh hi, ka kisikkik hi, ka khial hi Topa aw hong maisak in ci in, Topa maipha a zong tawntung ahi hi. 

4. Job: Hauhna tawh a kidim Pasian maipha a mu tawntung Job midik ahi hi. A zi leh tate pen Job in Satan ze-etna a thuakna tungtawn in sihna, innkuan sihna a thuak Job nuntakna ahi hi. Ahizongin, Pasian leh mite mai ah kamkhial ngei hetlo in, a nuntakna hun nunung lam ah Topa in thupha a zahnih in pia a, a kum tam semsem hun in Pasian min a thangsak semsem Job ahi hi.

A dang tampi zong omlai...

B.A Haksat hun ah Topa minthanna kilang phadiak

1. Sianthona leh upna hangin Pasian minthang: Shadrak, Meshak Abednago te in Pasian umlote bangin gamtalo in sianthona, pumpi kidekzawhna tungtawnin Pasian minthang sak uh a, Topa hoihna mi khempeuh in theihlawh uh hi. Mei lipi sungah khiat ding utzawkna tawh milim mai ah kun hetlo in, sinuam zawtham zahkhop in kumpipa thupiakna zuilo uh hi. Kumpipa heh mahmah takpi a, mei lipi sungah kikhia in, akhiate bangin sihlawh zawzen hi. Hih hun nangawn in sih ding or hong honkhia a om zenzen leh tua pen kote biak Pasian hi ding hi cih tawh kumpipa mai bek hilo in, a kimulo Pasian mai ah hangsan takin hong khensatna uh tungtawn in BabA ylon gam khempeuh ah Pasian minthang vangvang hi. Daniel zong humpi kikhawina sungah a kikhiat ding kiphal zahkhop in a upna ah citak in, haksatna khempeuh thuakngam ahina tungtawnin Pasian hotkhiatna hong om a, haksatna tungtawnin a mite cihna hangin Topa minthang in, leitung khempeuh in anungta Pasian khat bek om ahihna hong pulak thei uh hi.

2. Sawltakte: Haksatna tampi thuak semse, Pasian gamzai semsem, Pasian minthang semsem hi. Bawlsiat ding laulo tektek in, Jesu min hangin bawlsiat leh sih ding hong telzaw uh a, thu um mi khempeuh in bawlsiatna hong thuaklawh tektek mah ta leh Jesu thu hangsan takin hong tangko semsem uh a, gupngah mi kibehlap semsem hi. Thusuak in Jerusalem ah paikei in, na pai leh hong kiman dinga hong kithat ding hi ci in Paul tungah kigen mah ta leh, thusuak bangin gamtalo zaw in, va pai teitei a, kiman takpi in Rome khuapi ah thahna a thuak dong in Pasian min adingin ki pumpiak hi. Haksatna a thuakna tam semsem leh Pasian minthang semsem hi. James leh Jude (Jesu naute) nuntakna ih etciangin, Jesu a sihma peuhmah Jesu sanggam na hi uh hi cih ding zong utlo in, daipih ngamlo, innkuan khat hi ding utlo, khuakhat hi uh teh a kicih ding nangawn zong utlo uh hi. Ahizongin, Jesu  sih,kivui, thawhkik khit nung, Khasiangtho bangin hong kumsuk khit ciangin, Jesu innkuanpihte (leitung kampau) sungah khanlawhna in hong bantakpi in, nidangin a daipih ngamloh uh hong bang nawnlo in, Jesu pen ka sanggam bek uh hi kei in, Messiah hi, Pasian taktak ahi hi, ama silate ka hi uh hi ci in hong ki-ap sinsen uh hi (James 1:1; Jude 1:1). Sawltakte pen Jesu nungzui hi in, zong citak mah uh, ahizongin, James leh Jude pen Jesu sila taktak dingin a ki ap masa pente hongsuak uh hi. Jesu a tel khit uh ciangin, sanggam ciang bek in ki ngaihsun nawnlo in, Jesu sila ciang nangawn zong a ngah uh zong hampha kisa zah khop liangin, a lungdamna hong lian uh a, a lipkhap huai sih ding nangawn a thuak niciang nangawn un Jesu a dingin mi muanhuai penpen te sungah hong kihel kha uh hi.,

A dang tampi omlai...

C. Thupha san hun leh gentheihna a thuak hun a Pasian a taisante

1. Nebuchadnezzar: A kumpi gam leh a kumpi innte a muhciangin lian kisa lua in, thupha ngah kisa lua hi. Pasian sangin a lianzaw bangkek in ki tuat a, ahizongin, leitung mi khempeuh leh amahmah thu ahilhna in kum 7 sung ganhing bangin gamsungah Pasian in taimang sak hi. Thupha san hunin Pasian mangngilh huai hetlo hi. Na khempeuh ama hihtheihna bangbang in a piang sa tawntunga, tua pen Pasian lungsim tawh a kituak nawnloh hun ciangin zekai ta hi.

2. Siampi Eli: Siampi a sepna ah siahkai (tax) kai in, nuamsa mahmah a, a tate bangin kisaktheihlak in, a gamta innkuan ahi uh hi. A mawhna pan in kisik ngei hetlo in, Topa kiangah a thuum ngei peuhmah kei hi. Mipi tungah siampi sepna pen mipi ading leh Pasian a dingin a kimanna hong nawnlo ding dinmun a tun hun nangawn in a mawhnate pulak nuamtuamlo hi. A sang penpen ah a omlaitakin a niam penpen dongin a koih thei Pasian ahihlam pen Eli leh a innkuanpihte in a phawkkha ngeikei uh hi. Naupang mahmah lai Samuel zangin Topa in thu tangko khia a, a sawtlo in Siampi Eli leh a innkuan khanggui khempeuh Topa in leitung maitang pan in hemsiang hi.  Thupha a sanlaitakin Topa a mangngilh innkuante enhuai hetlo hi.

3. Lot innkuan: A pano Abraham nungzui in Ur khuapanin a paikhia mipa ahi hi. A kumcinma ciang, Abraham nung a zuih hunciang dong paubaanglo ama innkuan nuntakna ah siatna kimulo hi. Ahizongin, zi hoihlo hong neih a kipan, a ten nopna mun mahmah a sunghte tenna khuapi bek hong lunggulh in, apano Abraham tawh omkhawm thei nawnlo ding zah dong in thupha tampi hongsangta in, kuamah kisam nawnkeng a cih hunpan kipanin Topa tawh hong kigamla tektek hi. A zi tungtawn in ze-etna sungah hong awkcip ding in kithawi ahih laitak in, Abraham in Pasian maipha a muhna tungtawn in Topa in Lot honkhia a, ahizongin a zi in sihna hong ngah bek hilo in, Sodom pan hotkhiatna tawh Lot nuntakna bangmah Pasian lam ah panla tuanlo in, hong om hi. A tanute tawh suan le khak nei masa penpen hong suak a, Israel te gal lianpi ahi minam nih (Moab leh Ammon) te piankhiatna pupi hong suak hi. A zineih ma ciangciang, Pasian mite tawh hoihtakin hong kikholh theih ciangciang hun pen Pasian in zong angvan in, aman zong Pasian nung na zui hi. Thupha a ngah khit nungah Pasian a mangngilh kik Lot leh a innkuan tangthute pen a enhuai lo ahi uh hi.

Thu Khupna

Thupha ih san laitak, hatsatna ih tuah laitak, ih naupan laitak, ih khangno hunsung, ih teknung, bang hun bang hun ah Pasian deihna bangin kalsuan tawntunga, Pasian min a thangsak, a gam azaisak dingin Topa in nang leh kei hong deih hi. Mainawt ni, Jesu, ama min, ama gam adingin thasaan kik in, gamkuan ding hi hang. Ih sep theih nawnloh zan hun hong tung ding hi. Topa in a sim mimal khempeuh thupha hongpia ta hen. Amen.

Khazih sungah note sanggam,

Sia Suan Za Khup

Indianapolis, IN (tawmvei)