SYRIA BUAINA HANGIN A BEISA NIPI KAL NIH SUNGIN MI 250 SIH BEH TA
May 3, 2016: Tu ni-in Syria kumpi lehdo (rebels) ten Aleppo khuapi sunga zato inn khat rocket tawh kap uh a, mi thum kiim in sihna tuak hi. Zan in zong Syria kumpi ukna Aleppo sung mah rebels ten kap uh a, mi 19 in sihna tuak hi ci-in SOHR in gen hi. Syria ah mun tuamtuam ah Syria kumpi leh rebels ten tawl khat sung kikap lohna dingin ‘truce’ kici thukimna suai a kaih hangun Aleppo province sung hih ‘truce’ in huam kha lo ahih manin Syria kumpi leh rebelste kikaptuah niloh uh hi.
Nipi ni in zong rebels ten Syria galkapte rocket tawh kap uh a, a thukkikna dingin Syria galkap ten tung lam panin Aleppo province sunga rebelste ukna mun Sakkour kiim kap uh hi. Ikhbariya news in a genna ah galkap ten Muhafaza a kapna uh-ah zato inn kha in, numei 3 a sih banah mi 17 in liamna tuak hi ci-in gen hi. Syria rebels ten al-Dabbit zato inn rocket tawh kap uh a, mi 19 in sihna tuak hi ci-in Syrian state TV leh SOHR in gen hi. Al-Nusra Front, Ahrar al-Sham leh Jaish al-Islam ten nautang tamna mun leh zato inn ngim in nei uh a, kap mun mahmah uh hi ci-in Syria galkap ten gen uh hi.
Syria rebels sunga kihel Free Syrian Army kicite galkap Ahmad in a genna ah rebels ten kumpi ukna Muhanna leh Halab Jadaydeh khuate ah mun lianpi la ta a, hih khuate lakna dingin kikaptuahna nasia lai mahmah hi ci-in gen hi.
A beisa nipi kal nih sungin Syria galkapte leh rebelste kikaptuahna hangin mi 250 sih beh ta a, mi 1,500 kiim in liamna tuak ta hi.
Source: Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.