JIHADI JOHN ZA LAIH DINGIN INDIA MI SIDDHARTHA DHAR KISEH
May 3, 2016: India gam-a piang, London khuapi a teng Siddhartha Dhar pen IS ten ngawngtan dinga a zat uh ‘Jihadi John’ (Muhammad Emwazi) kici za laih dingin kiseh a, amah pen “Jihadi John Thak’ kici hi ci-in media ten suaksak uh hi.
Independent news in a genna ah Siddhartha Dhar in Yazadi minamte numei no Nihad Bakarat kici ISte luppih dingin man a, Nihad Bakarat in Siddhartha Dhar pen Jihadi John laih dingin IS seh uh a, tu-in amah ISte ukna Mosul khuapi (Iraq) ah om hi ci-in gen hi ci hi. Nihad Bakarat in IS ten gamdang mi galkap dingin a lakte sung panin amah mante lakah Siddhartha Dhar kihel hi ci-in British Muslim TV ten a interview na ah gen hi.
Siddhartha Dhar pen nidangin Hindu biakna zui hi a, Islam a suak ahi hi. Islam a suah zawh in a min Abu Rumayasah in laih hi. UK ah London police ten na man ngei uh a, sum tawh kitankhia in, 2014 in a zi leh a tatate tawh Syria ah tai in IS ah lut hi. Siddhartha Dhar pen UK police ten guk vein a man ngei uh a, sum tawh kitankhia zel a, a nunung penin UK panin Paris ah tai-in, Syria ah lut hi kici hi. Jihadi John pen Siddhartha Dhar mah bangin London khua mi ahi hi. Jihadi John pen tu kum bulin US ten Syria ah tuithei vanleng (drone) tawh a kaplup ding un ki-ummawh hi.
Nihad Barakat in Siddhartha Dhar pen Mosul khuapi ah ISte makai in pang a, a maante a kilak ciangin hih pa mah hi ci-in gen a, thu kician zaw a kidot hangin ISte maan a muh ciangin a thangpaih tha suakin bangmah gen beh nuam lo hi ci-in British Muslim TV presenter Joseph Hayat in gen hi.
-PTI
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.