IRAQ KHUAPI AH CAR BOMB MUN LI AH PUAK, MI 90 SI

IRAQ KHUAPI AH CAR BOMB MUN LI AH PUAK, MI 90 SI

May 12, 2016: Iraq khuapi Baghdad ah car bomb mun li a puak a, mi 90 kiim si hi ci-in police ten Al Jazeera newste kiangah gen uh hi. News pawlkhat in bel mi 93 si ta hi ci-in suaksak uh hi. Tu kum adingin mi gilote gamtatna hangin mi tam a sih penna hi lai hi.

Baghdad khuapi sunga om Sadar City kicihna mun ah 4WD mawtaw sunga bomb kikoih sammetna (salon) sumbuk kiangah puak a, mi 63 a sih banah mi 100 val in liamna tuak hi. IS ten hih mun-a bomb puak pen ko gamtatna hi ci-in social media panin pulak uh hi. Tua khit a sawt loin Baghdad khuapi sung mun tuamtuam ah car bomb thum kipuaksak leuleu a, mi 27 in sihna tuak hi. Police ten a genna ah a bomb puahna mun pen Shia Muslimte teenna Kadhimiya, Hurriyah leh Jamiyah district a policete checkpoint hi ci-in gen uh a, a si kibehlap lai dingin a upmawh thu gen beh uh hi. Tua loin ISte hatna Anbar province sunga om Al-Baghdadi khua nawlah IS ten Iraq galkapte suam uh a, galkap 15 a thah ban uh-ah galkap 40 in liamna tuak uh hi. Police ten a genna ah IS Sunni Muslim ngongtat ten galkapte car tampi sihpih bomb zangin amau ukna sungah na suam uh ci-in gen uh hi. Al-Baghdada khua pen IS ten 2014 kumin a lak uh hi a, hih khuapi lak kikna dingin Iraq galkap ten 'military operation' nung diak a kipanin pan ta uh hi.

A beisa nipi kal nih in zong Baghdad khuapi kianga om Shia Muslimte teenna Nahrawan khua ah IS ten car bomb sumbuk ah puaksak uh a, mi 23 a sih banah mi 38 in liamna tuak hi. Tua khit ni nih in kum zalom 8 hun lai-a Shia Muslimte biakna makai khat sihni phawkna ni a zat lai un IS ten car bomb puaksak uh a, mi 18 in sihna tuak lawh hi. February kha in zong IS ten Sadar City, Baghdad ah sihpih bomb mun nih a puaksak uh a, mi 70 in sihna na tuak ngei hi. UN in a ciamtehna ah April kha sungin Iraq buaina hangin mi 741 sih beh a,mi 1,374 in liamna tuak a, March kha sangin tawmzaw hi ci hi. March kha sungin mi 1,119 si a, mi 1,561 in sihna tuak hi. Iraq buaina hangin Baghdah khuapi in suamna tuak mun pen a, April kha bekin nautang 232 si a, 642 in liamna tuak hi.

Al Jazeera reporter Ghassan al-Attiyah in London khuapi panin a genna ah Iraq buaina hang pen gam mipite a kituahna loh banah mipi ten kumpi a muan' loh man uh ahi hi ci-in gen hi. US in 2003 in Iraq gam UN phalna om lopi in Saddam in Weapons of mass destruction (WOM) kici galvan lauhuai nei hi ci-in ngawh pong in sim uh a, tu dong WOD mu zo nai lo uh hi. USte sim khit nungin IS hong piangkhia, Iraq kumpi in ISte do hong kipat ciangin ISte pen Sunni Muslim vive pian ahih manin Iraq gam-a Sunni Muslim leh Shia Muslimte kikalah kihuatna lianpi hong piangkhiat lawh hi. USte geelna pen Sunni leh Shia kikalah buaina piang leh US ah galphual kibawl thei ding cih leh Iraq gam-a namgimtui/datsi a deihgawh man uh hi kici hi. US in Iraq a sim lai in US vice-president len Dick Cheney' thusim ciamtehna kipholak a, tua ah US in Iraq, Syria, Somalia, Sudan, Tunisia gamah buaina bawl a, kumpi laih khiat ding a geelna leh a hanciamna uh lim takin tuang hi ci uh hi.

Source: Al Jazeera and agencies