BRAZIL PRESIDENT PAIHKHIATNA DING SENATE TEN THUKIMNA PIA TA
May 13, 2016: Brazil senators ten zan in President Dilma Rousseff in 2014 in a vote zonna ah kumpi phalna om lopi in loan la in, fiscal deficit (sum cing lo) te seelna dingin budget kibawlna ah thuman loin sum a val in kizang hi ci-in budget bawlna ama' deih bangin laih hi cih ngawhna hangin a kipaihkhiatna ding (impeachment) vai a om theihna dingin zan in vote khiatna nei uh a, senator 81 lak panin senator 55 in paihkhiat ding deihin vote khia uh ahih manin ni 180 sung kipiakhia hi.
Dilma Rousseff in thuman loin loan la a, budget ama' deih bangin laih hi cih ngawhna ni 180 sung a thusitna (trial) kinei ding a, Vice President Michel Temer in kha guk sung President len ding hi. Brazil Senate in ni 180 sung Supreme Federal Tribunal' chief justice huhna tawh Dilma Rousseff tunga ngawhna thu kanna leh thusitna nei ding hi. Senator 81 lak panin seh thum suah seh nih in paihkhiat ding vote a khiat ua, simple majority (2/3 vote) a ngawh uh leh Dilma Rousseff pen President panin kipaikhia den thei ding a, kum 8 sung kumpi zum bangmah len thei nawn lo ding hi. Senate in ni 180 sungin Dilma Rousseff paihkhiatna dingin simple majority (vote 81 lak panin 2/3) vote a ngah zawh kei leh bel President len kik thei ding hi.
Dilma Rousseff pen nidang in zawhtawh thu tawh 1970 hun lai in Brazil gam dictator vaihawmna a om lai in kiphinna nei gamnuaimi (guerrilla) in na pang ngei a, zong na kiman ngei in, thongah kikhum a, bawlsiatna leh gawtna lianpi na thuak hi. 2010 in President dingin kiteel cing a, 2014 kiteelna ah cing kik in, Presidet term nihna a letna hita a, Brazil ten "Iron Lady'' cih min pia uh hi.
-Al Jazeera and Agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.