EGYPT AH POLICE 8 KIKAPLUM
May 9, 2016: Egypt gamte khuapi Cairo nawlah police 8 zan in kikaplum hi ci-in Egypt interior ministry Magdy Abdel-Ghaffar in gen hi. Automatic thau tawi mi 4 pick-up truck panin kum uh a, policete tuanna minibus a kap gawp khit ciangun kihem mang uh hi ci-in zan in a Facebook page ah post hi. Hih policete pen IS ten ko thah hi ci-in tangko uh hi.
Egypt interior ministry a site khat police lieutenant hi a, a dangte pen police mawkmawk vive hi ci-in gen hi. Egyptian official news agency MENA in hih policete pen zan zingsangin Cairo khuapi nawl-a om Helwan ah a pai lai un thau tawi ten na suam uh hi ci-in gen hi.
Nitumna gam leh US ten Arab gamah mipi kiphinna ding toksuah in 2010 kum in Tunisia gamah mipi lungphona leh kumpi deih lo a kiphinna 'Arab Spring'' kici nasia takin hong piang a, tua khitin Tunisia gam panin Egypt, Libya, Yemen, Syria leh Bahrain gam hong peh to hi. Hih Arab Spring in Egypt gam hong peh toh ciangin mipi kiphinna nasia takin hong piang a, galkap makaipipa Abdel Fatah Sisi in mipi deihna tawh a kiteelcing Mohamamad Morsi pai khia in 2013 in Egypt president hong len hi. Abdel Fatah Sisi in thuneihna hong let khit nungin IS tawh kipawl North Sinai kici gamnuaimi Sinai tuikulh ah hong piang khia a, tu dong hih North Sinai ten Egypt galkap 732 a thah banah 18,000 kap liam ta uh hi ci-in Interior Ministry in gen hi.
Source: Agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.