BANGLADESH AH MUSLIM MAKAI LIAN KHAT KIKHAILUM
May 11, 2016: Bangladesh in 1971 in Pakistan gam panin suahtakna ding a sual lai (1971 Liberation War) in Pakistan gam gum leh Jamaat-e-Islami party makaipipa Motiur Rahman Nizami in numei buan, mi bawlsia/gawt (tortured) leh lai siam tampi lom thah hi ci-in ‘war crimes, rape and genocide’ kici ngawhna tuak a, 2010 in thongah kikhum hi. 2014 in Supreme Court in thah dingin thukhenna pia a, zan in zan kim khit nung nai 12:o1 am in Dhaka Central jail ah kikhailum hi ci-in Bangladesh law minister in pulak hi.
Motiur Rahman Nizami kikhailupna hangin amah gum ten tu ni-in Dhaka khuapi ah lungphona nei uh a, amah a hua ten lungdam lahna in mihon kikhopkhawmna nei in pawi kham uh hi. University sangnaupang ten zong Dhaka University a Nizami kithahna hangin lungdamlahna leh lopna nei uh hi. “Hih ni hong tun’na ding kum kum 45 kingak a, tu-in thudik in vaihawmna hong om thei hi,” ci-in 1971 galdo a kihel Akram Hossain in gen hi. Jamaat-e-Islami party ten zing ciangin Bangladesh gambup ah lungphona neih ding sawm uh ahih manin buaina a pian’ khak ding dalna in police leh border guards galkap tul tampi Dhaka khuapi leh khuapi tuamtuam-ah kikoih dimdiam ta hi. A beisa hunin zong Jamaat-e-Islami party member kikhailupna hangin police leh Jamaat-e-Islami party gumte kinawktuahna hangin mi 200 na si ngei hi.
Al Jazeera reporter Tanvir Chowdhury in Dhaka khuapi panin a genna ah Jamaat-e-Islami member khat peuh a kithah ciangin gambup sung bandh bawl pahpah uh a, ahih hangin tu-in hih partyte nidang bangin hat nawn lo uh ahih manin zing ciangin lungphona a neihna uh-ah a kihel tam lo ding hi ci-in gen hi.
Jamaat-e-Islami party ten Nizami tungah ngawhnate nial uh a, Nizami pen "martyr" a si hi ci uh hi. 2013 panin opposition politicians nga kithat ta a, tuate lakah Jamaat-e-Islami makai lian li kihel hi. 2010 in Prime Minister Sheikh Hasina in ‘war crimes tribunal’ kici na phuankhia a, 1971 kum-a gal buai lai-a ‘war crimes’ gamtatna nei pawlkhat kithat ahih manin opposition party politicians leh Jamaat-e-Islami ten hih in ‘war crimes tribunal’ pen Sheikh Hasina in amah langpangte thahna dinga a van zat hi ci-in nakpi takin gensia uh hi.
Bangladesh government in a ciamtehna ah 1971 Liberation War hun sungin million 3 kithat a, Pakistan tawh gam khat a om ding deih Jamaat-e-Islami ten numei tul tampi buan hi ci-in ciamteh hi. Bangladesh in suahtakna 1971 in a ngah ma-in West Pakistan kici a, 1971 in India galkapte huhna hangin Bangladesh in Pakistan panin suahtakna na ngah hi.
-Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.