YEMEN GALKAPTE LEH AQAP-TE KIKAPTUAH
April 24, 2016: Yemen buaina tawh kisai zan halin Kuwait ah Yemen kumpi leh Houthi rebels ten Peace Talks a neih uh a neih zom zel hangin Yemen kumpi'n a do ding nei veve hi.
Zan in Yemen galkapte leh al-Qaeda tawh kipawl Al-Qaeda in the Arabian Peninsula (AQAP) kicite Yemen leitaw lamah nasia takin kikaptuah uh hi. Hih kikaptuahna ah AQAPte tampi kithat a, tuithei vanleng in zong mi nih kaplum hi ci'n a mun a tengte leh galkap ten gen uh hi.
AQAPte pen Yemen pansan hi a, Europe gam tuamtuamah buaina bawlin, mun tuamtuam va suam kawikawi uh hi. Yemen buaina hun lem la-in nung kum a kipanin Yemen leitaw lam leh nisuahna lam gam lianpi la in amau ukna munte ah local government phuanin a galkap ding uh zong la ziahziah uh hi.
Yemen buaina pen president lui Ali Abdullah Saleh gum pawl leh Houthite pangkhawmin a lang khatah President Hadi' galkapte Arab coalition kici - Saudi, Kuwait, Qatar, UAE, Jordan, Egypt, Morocco, Senegal, Sudan leh Malaysia gam ten galkap, galvan leh tung lam panin huhna pia uh hi. Hih Arab gam kipawlkhawmte US, Belgium, France, UK leh Turkey in galkap tawh a huh lian loh hangin gum in huh sim uh a, Iran, China leh Russia in galkap thahatna tawh Houthite do ding deih lo uh hi. Iran in Houthi rebelste political support bek kipia hi a cih hangin nung lamin Iran ten Houthite galvan a piak sawm uh tampi kimatsak hi ci'n US navy ten ngawh hi.
-Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.