YEMEN BUAINA TAWH KISAI KILEMNA DING GENNA KUWAIT AH KINEI
April 23, 2016: Yemen buaina a kigolh Saudi leh a kipawlpihte leh Houthi rebel ten April 11 in ceasefire thukimna a neih khit un ceasefire 70 - 80 % bang lawhcing thei ahih manin zanin Kuwait ah kilemna ding vai genkhoppna (peace talks) nei uh hi. UN envoy Ismail Ould Cheikh Ahmed in hih kilemna gen masakkhawn ni masa pen in kihona hoih takin kinei thei a, lawhcing mahmah hi ci'n gen hi. Ahih hangin kilemna taktak a om theihna dingin April 11 ceasefire thukimna kua peuhin a zahtak a, Saudi leh a kipawlpih ten tung lam panin Yemen kap a khawlsanna ding leh Houthi rebels ten missile kap a khawlsanna dingun kunh hi.
Ismail Ould Cheikh Ahmed in hih kilemna thu gen khawmna ni masa ni in buaina a kigolh ten ceasefire pen hoih takin a om thei zelna ding a deihna thu uh gen uh a, kilemna taktak a om theihna dingin hih kimuhkhawmna hun pen a hun hoih nunung pen hi thei ding hi cih sang thei tuak uh hi ci'n gen hi.
United Nations in hih kilemna ding genkhawmna hunah kilemna taktak hong pian' theih ding a lamet thu gen hi. Yemen buaina hangin mi 6,800 in sih lawh khin ta a, million 2.5 val inn leh lo nusia khin zo uh hi. Yemen buaina pen Houthi rebels ten Yemente khuapi Sanaa Sept. 2014 in a lak khit ciangun President Abd-Rabbu Mansour Hadi Saudi gamah va galtai a, Saudi leh a kipawlpih ten President Abd-Rabbu Mansour Hadi gumin nung kum March kha in tung lam panin Houthite hong kap manin buaina hong kipan hi.
Source: Agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.