US IN RUSSIA GAM KIIM-A NATO-TE' EASTERN BORDER AH GALKAP KOIH SAWM TA
April 2, 2016: US ten Russia pen khauhpai mahmah (aggressive) hi ci'n NATO gamte nisuahna lam gamgi ah galkap 4,500, tank 250, kidona mawtaw - Bradley Fighting Vehicles kicite, thaupi -Paladin self-propelled howitzers kicite leh mawtaw 1,700 koih sawm uh hi. Hih bangin galkap koih leh Russia kiimah Cold War bei khit nung galkap tam a kikoih penna hi lai ding hi.
Vice News in a genna hih galkapte pen Estonia, Latvia, Lithuania, Poland, Romania, Bulgaria leh Hungary gamte ah galdo ding dan kisinna (military exercises) nei kawikawi ding uh hi ci'n US European Command in pulak hi ci'n pulak hi. US in hih gamte ah galkap sawl beh lai leh Europe continent sungah USte galkap 'fully manned brigades' a kici contingent thum a koih suak ding hi. US in Europe continent sungah galkap phual 21 ah galkap 62,000 koih khin zo a, nung diakin zong brigades hun khop sawl behbeh lai hi. US Deputy Secretary of Defense Robert Work in Wall Street Journalte kiangah a genna ah hih galkap kisawl beh dingte a om khinsate kipawlin galdo ding dan sin khopna nei ding uh a, gal hong om vat leh unit khatah kituak takin galvan zat kibangin a pan'khawm theihna ding uh geelna tawh kikoih a, a om khinsate sangin hoih zaw lai ding hi ci'n gen hi. Hih bang geelna hangin US leh a kipawlpih Europe gam sunga om gam ten US galkap leh galvan hoih nono a tun beh uh mu ding uh a, a gamte uh a cing dingin galkap leh galvan hoih nono muh beh ding cihna suak hi ci'n US European Command commander General Philip Breedlove in gen hi.
Nung kha-in Pentagon in Russiate lauhuai semsem uh ahih manin US in Russiate hatna dalna dingin European defense dinga sum kizang a leh li (quadrupled budget) in kikhangsak ding hi ci'n na pulak khin zo hi. Ukraine gam sunga om Crimea state in Russia beel nuam zaw in 2014 in vote khiatna (referendum) na nei uh a, a tam zaw in Russia beel nuam ahih manin Russia beel hi. Hih thu hangin US leh NATO in Russia in aana tawh Crimea la hi ci'n ngawh pong a, US in Europe gamte ah galdo ding dan sinna leh a sum zat nakpi takin khangsak hi. Russia in zong Crimea ah bomb khiatna dinga kizang vanleng (strategic bomber flights) a koihna hangin NATO gamte patausak mahmah a, ui mei khup bang likliak uh hi.
Europe gam sunga om - Belgium, Netherlands leh Germany gamte ah zong galkap a kisap bangin kikoihbeh zel ding hi ci'n NATO ulian ten gen hi. Russiate hatna bangin liangko a kikim theihna dingin 'strong and balanced approach to deter Russian aggression' kici pan nakpi takin kila hi ci'n US Defense Secretary Ash Carter nung kha in Washington ah Economic Club of Washington khawmpi ah awng baba hi.
-Your News Wire
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.