CARIBBEAN GAM TEN THUKHENNA ZUM AH BRITAIN, FRANCE LEH NETHERLANDS KUMPI HEK
April 2, 2016: Central leh South America gam-a Caribbean Tuipi leh Caribbean Tuikulh kiim-a om gam 14 ten Britain, France leh Netherlands gam ten a gamkeek hun lai (colonial era) in sila dingin a gam mite uh zang in, a bawlsiat manun thukhen zum ah puak uh a, a bawlsiatna hangun huhna leh sum liausak (reparation) sawm uh hi.
Hih Caribbean gam 14 ten regional consortium kici puankhia uh a, 10-points plan kici thukimna nei in, a gamte uh a uk khum ngei (colonizers) Britain, France leh Netherlands kumpi in maisakna a ngetna ding (official apology), a sum batte uh a maisakna ding (cancelation of debts) leh ngeina leh simsinna lamsang ah huhna (assistance for cultural and educational institutions) a piakna dingin thu bawl khum hi ci'n AP news in suaksak hi.
Hih Caribbean gam 14 kipawlkhawm 'regional consortium' in a thukhen dingin British human rights firm Leigh Day guai uh hi. Leigh Day in Kenya mite na huh ngei a, Britain in gam keek hun lai in Kenya mite a bawlsiatna hangin $21.5 million a piakna dingin thukhen zum ah na hek a, Britian kumpi in Kenya mite $ 21.5 million tawh a hih khialhna hangin na siatbat hi.
Ei Zomite zong kipan leng ai ve mate? Britian kumpi hangin Zogal ah tampi i sih banah gam khat-a om kim lai gam thum in hong khen uh hi. Thukhensiam leh thusutsiamte hong kipan dih ve ua le guai.
-AP/Time Magazine
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.