UKRAINE AH UKRAINE GALKAP NIH REBELS TEN KAPLUM
May 1, 2016: Zan in Ukraine kumpi leh Russia gum-a Ukraine kumpi lehdo (pro-Russian rebels) ten tawl khat sung kikaptuah lohna ding thukimna (truce) suai a kaih hangun kikaptuahna om veve a, rebels ten Ukraine galkap nih kaplum uh hi ci-in Ukraine ulian ten pulak uh hi. Hih tawl khat sung kikaptuah loh ding thukimna pen zan nitak lam a kipanin zuih ding ci-in thukimna Belrussiate khuapi Minsk ah a neih uh ahi hi.
February 2015 in zong Ukraine kumpi leh rebels ten France leh Germany palai pan'na tawh kikaptuah lohna dingin thukimna (ceasefire agreement) suai Minsk khuapi mah ah na kai uh a, ahih hangin tua thukimna a lang tuakun palsat mun mahmah uh ahih manin kikaptuahna a venna ding ngaihsutna tawh zan in Minsk khuapi a thukimna suai na kai kik leuleu uh hi. Organisation for Security and Cooperation in Europe (OSCE) ten Minsk ah kikaptuah nawn lohna ding thukimna palsatna a beisa kha bang zah hiam a kipanin om mun mahmah a, sisan naisan kisuahna nakpi takin khang hi ci-in gen hi.
Zan a Minsk khuapi-a kikaptuah nawn lohna ding thukimna suai kikai pen Orthodox Easter Sunday, Labour Day (May 1) leh Soviet ten Galpi Nihna in Nazi Germanyte May 9 ni-a a zawh ni ciamtehna a tun ma phawna dingin thukimna danin a neih uh ahi hi.
Ukraine President Petro Poroshenko in OSCE ah palai dingin a zat Leonid Kuchma in a beisa hunin zong rebels ten thukimna palsat mun mahmah uh a, thukimna suai a kikaih kik khit nungin zong rebels ten Shyrokyne, Avdiivka leh Mariinka khuate ah thukimna palsat uh hi. Ahih hangin hih galkapte kithahna pen tuahsiatna (accident) hi a, rebels ten thukimna zahtakin a zuih ding uh lametna lianpi kinei lai hi ci-in gen hi. Petro Poroshenko' in zong Ukraine in hih thukimna kizahtak veve dinga, Russia leh rebels ten zong a zahtakna dingin ngetna nei hi.
Ukraine nisuahna lam Donesk leh Lugansk state sunga tengte pen Russia pau in pau uh a, amau teenna sung teng amau leh amau kivaihawmna (autonomy) deih in a beisa kum nih a kipanin kiphinna na nei uh hi. Hih buaina hangin mi 9,300 sih lawh in, mi 21,000 val in liamna tuak khin zo hi. Nung kumin Minsk khuapi a ceasefire thukimna suai a kaih khit nung uh hih buaina hong dai deuh hi.
-APF
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.