SYRIA KUMPI'N ALEPPO TUNG LAM PANIN KAP
April 23, 2016: Syria kumpi lehdote (rebels) palaite Geneva, Switzerland khuapi panin Peace Talks kineih lai-in nuak ciah uh ahih manin Syria kumpi'n zong lungkim zo nai lo na hih uh leh ci'n zanin Syria rebelste ukna Aleppo khuapi tung lam panin nuaisuk leuleu kipan uh a, mi 20 a sih banah a hun khopin liamna tuak hi. Local journalist Zouhir Al Shimale in a genna ah Syria kumpi in a kapna mun pen nautang tamna mun ahih manin a si leh liamte lakah nautang tampi kihel hi ci'n gen hi. Bustan al-Qasr kiim bekah nautang 30 in liamna tuak uh a, al-Mashhad vengah Muslim ten Laithai ni thungetna (Friday prayers) a neih lai-un tung lam panin hong kikap hi ci'n gen beh hi.
UK pansan Syrian Observatory for Human Rights (SOHR) in zong Syria kumpi in Idlib province zong tung lam panin kap a, nautang 3 in sihna tuak hi ci'n gen hi. IS ten zong Damascus ah Syria galkapte vanleng khat kikapkhiatsak a, a vanleng hawlpa kihingmat hi ci'n gen uh hi. Ahih hangin Syria galkap ten Syrian Air Forcete Mig-23 vanleng technical failure hangin kia a, lei lam panin a kikap manin a kia hi lo a, a hawlpa zong tuak khia man hi ci'n gen hi.
US in president Assad laihna ding gamnuaimite a thahat theihna dingin Syria rebelste leh gamnuaimi tuamtuamte (IS, al-Qaeda leh al-Nusra Front ngongtatte kihel in) tank kapsiatna (anti-tank missiles) piak sawm lai ahih manin buaina pen hong nasia tektek ding bang hi. Bomb leh thautang ten mit nei lo ahih manin a thuak ding pen nautangte mah ahih manin vai sah mahmah hi. Zan halin zong Syria galkap ten tung lam panin a kapna hangin mi 44 si lawh hi.
Source: Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.