MEXICO AH PETROCHEMICAL PUAKKHAM, MI 24 SI
April 22, 2016: Zan hal nitakin Mexico state oil company Petroleos Mexicanos (Pemex) kicite petrochemical plant Coatzacoalcos khua-ah puakkham a, mi 24 in sihna a tuak banah mi 19 zato inn ah kipuak a, mi 13 nak liam mahmah hi ci'n Pemex in gen hi.
A site lakah mi 12 a hihna kician ta a, luang 8 a innkuanpihte kiangah kipiakhia ta hi ci'n Pemex in pulak hi. President Enrique Pena Nieto in tua petrochemical plant puaktapna mun Coatzacoalcos khua zanin va delh pah a, sihna tuak innkuanpihte kiangah a thuakpihna thu pulak a, sihna leh liamna tuakte kisiatbat ding hi ci'n gen hi.
Tuahsiatna tuakte huh dingin marines leh galkap ten va delh pah uh a, mipi lungkim lo pawlkhatin kumpi mawtaw zat SUVte suang tawh na deng gawp uh hi. Volunteer tuamtuam ten dongtuakte innkuanpihte nek ding leh dawn ding va puak uh hi.
Pemex director Jose Antonio Gonzalez Anaya in hih tuahsiatna pen petrol chemical a keh man hi dingin a upmawh thu gen a, thucian kithei nai lo hi ci'n Radio Formulate kiangah gen hi. Hih petrochemical puakkhapna mun lian pen Petroquimica Mexicana de Vinilo kicihna mun hi a, hih munah Clorados plant 3 om a, hih thupiang hangin industrial chemical vinyl chloride kici nakpi takin keh gawp hi. February kha-in zong hih mun mahah tuahsiatna na piangin, mei na kang ngei a, nasem mi khatin sihna na tuak hi.
-The Hindu
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.