SYRIA GALKAP TEN ALEPPO TUNG LAM PANIN KAP NAWN

SYRIA GALKAP TEN ALEPPO TUNG LAM PANIN KAP NAWN

April 28, 2016: Syria galkap ten zan in Aleppo khuapi a rebelste ukna mun Sukkary veng tung lam panin a kapna hangin mi 20 in sihna tuak hi ci-in local sources in gen hi. Hih tung lam panin a kikapna in Al Quds hospital kha a, zato inn-a semte leh nautang zong pawlkhat si a, tuate lakah rebelte ukna sunga naupangte siavuan (pediatricians) a om sunsun Dr. Wasem Maaz zong si kha hi ci'n gen beh hi.

Rescue workers ten a site luang leh a liamte hutkhiatna nei uh a, mit tawh mu ten a si kiheklap lai dingin a upmawh thu uh Al Jazeera newste kiangah gen uh hi. A site luang pen si leh nai tawh kidim ahih manin saphuklai in tuam uh a, a limte suahkhiat dingin mulkimhuai lua hi kici hi.

Nung kalin Genava, Switzerland ah kilemna ding vai tawh kisai 'Syrian Peace Talks' kici Syria kumpi leh rebels palai ten nei uh a, kihothei loin ki-akgual khen uh a, tua khit nung rebelste leh Syria galkapte kikap kik in, a kithuktuahna hangun mi 100 kiim in sih beh ta hi. Zanhal bekin Aleppo province sungah galkapte leh rebelste kikaptuahna hangin mi 35 sih beh a, a site lakah naupang 8 kihel hi. Syria kumpi langpang party (opposition bloc) kipawlkhawmte - High Negotiations Committee (HNC) kici ten zan in Geneva ah kilemna thu gen kikna ding vai pen Syria galkap ten bomb khiat a sutzom uh leh kihel lo ding hi ung ci'n vauna bawl uh hi. HNC in Aleppo province sungah kikaptuahna a kipatkik manin mi 40,000 kiim Aleppo panin taikhia ta uh hi ci'n gen beh hi.

Syria gam-a UN envoy De Mistura in Syria buaina vensakna ding genna ah Syria kumpi sunga panmun lente kihel thei ding hi ci'n laidak pek sagih (seven-page document) suaksak a, ahih hangin Syria kumpi langpang ten President Assad a kihel loh ding hi ci'n pang uh hi. Syria galkapte leh rebelste a kithukkik tuah lohna dingin US leh Russia in nakpi takin pan a lakna dingin De Mistura in kun hi.

-Al Jazeera and agencies