IRAQ GAM MUN TUAMTUAM SUICIDE BOMB TAWH KISUAM, MI 62 KIIM SI
April 5, 2016: Zan in Iraq gam sung mun tuamtuam nautang omna mun leh galkapte omna mun sihpih bomb tawh kisuam a, mi 62 kiim in sihna tuak hi ci'n Iraq ulian ten pulak uh hi.
Anbar province nitumna lam-a om Ain al-Asad vanleng phual kianga om Baghdadi ah sihpih car bomb kipuaksak a, galkap 26 si hi. Baghdad khuapi leilu lam-a om Salahuddin province ah IS ten Iraq galkapte tawh a kipawl galdo dinga kipiakhiate (pro-government militia fighters) a suamna uh-ah militia 6 a thah banah 18 in liamna tuak uh hi. Fallujah nisuahna lam-a Iraq galkapte phual a kisuamna ah galkap 13 si hi.
Iraqi prime ministerpa leh a cingte mawtaw tawh Baghdad khuapi sunga om Meshahda kiim ah a tai lai takun sihpih bomb tawh na kisuam a, Iraq galkapte tawh a kipawl pro-government militia fighters kicite thum a sih banah 10 in liamna tuak uh hi. Baghdad leilu lam-a om Al-Muthana lei kianga om security checkpoint ah sihpih bomb puaksak khatin a bomb puaksak a, mi thum a sih banah mi 12 in liamna tuak hi. Al-Muthana lei (bridge) pen Baghdad khuapi leh Baghdad leilu lam-a om Samara leh Tikritkhuapi zuatna ahi hi.
Nassiriyah khuapi leilu lam-a om Tel Al-Laham kicihna ah restaurant sungah bomb kipuaksak a, nautang 5 a sih banah 23 in liamna tuak hi. Basra khuapi laizang ah car kikoih sunga bomb puak a, nautang 5 a sih banah 11 in liamna tuak hi. Abu Ghraib khuapi sunga om Al-Nassar vengah siktum (motar) nih kikap a, nautang 2 si in, 7 in liamna tuak hi.
Iraq galkap ten zong IS ten 2014 kum-a a khuapi lak uh Mosul lak kik ding tawlkhat a khawl khit nungun zanin kipan kik nawn ta uh hi. Iraq galkapte Mosul khuapi leitaw lam-a om Makhmor ciang dong mainawt zo ta uh a, US leh a kipawlpih ten tung lam panin huh uh hi.
-Al Jazeera
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.