ZUSA LEH HUMPINELKAI' TANGTHU
Ni khat Zusa khat gamlakah a vial tai kawikawina lamah Humpinelkai ihmut suak leh gim mahmah ihmu lai khat va phawng kha hi. Tua Humpinelkai a heh tha suak lua ahih manin tua Zusa man in, thah dingin ngik khum lualua hi.
Zusa in zong lau leh liing kawmin, "Pu aw, na hehpihna tawh hong that kei ta peuh in la hong khah in. Ni khat ni ciangin na hoihna hong thuk kik peelmawh ding hi'ng," ci'n thum ngaungau keei hi. Tua Humpinelkai in, "Nang Zusa leltak in ka migitna hong lak leng hong bangci thuk kik theih peuhmah ding na hiam?" ci'n zahko hi. Ahih hangin Zusa in ka neu mahmah hangin na migitna hong thuk kik hamtang ding hi'ng ci'n thum ngaungau den ahih manin Humpi'n zong hehpihhuaisa-in nuihsan kawmin khah hi.
Tua khit a sawt loin sabengte leenthang kam sungah tua Humpi hong awk hi. A kitomtom hangin suakta zo lo a, a thaneih khempeuh bei in tang zo nawn lo hi. Tua Humpinelkai cimawh leh beidongin a om lai-in Zusa hong vak khialkhial a, hong tuak kha kik hi.
Zusa in Humpinelkai awkna leen a ha tawh pet in, khat khit khat a banbanin pet tan mengmeng hi. Sabengte hong pai kik ma-in tua Humpinelkai hunkhia a, suaktasak ziau hi.
I nuntakna ah midangte i neu muh pahpah loh ding leh i simmawh bawl pahpah loh ding phawk huai hi. I simmawh pen leh i neu et pente nangawnin cihmawhna leh beidon'na i tuah hun ciangin hong huh ding muan tak pen leh a belh tak pen na suak zawsop thei hi. Tu-ni a mi cimawh leh zawngkhal mahmahpa pen ni khat ni ciangin mi thupi mahmah leh midangte a hunkhiapa leh huhpa zong suak thei hi.
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.