Rev. Kam Khaw Thang Tangthu tommno leh Kammal Hoih

Zokam Lai Siangtho tei khiapa Sia Rev. Kam Khaw Thang in hong nusiatsan hi cih kiza hi. Hong nusiatsan dah leh kap a man khempeuh hehnem siam Kha Siangtho in mi kim hong hehnem ta hen.

ZUNs in zong Siapa hong nusiat vat mawk pen kidahpih mahmah hi. Siapa hanciamna leh a sep khiatsate hangin lungdamhuai mahmah in, a nasepsa leh a hanciamna angtangpih huai mahmah hi.

Rev. Dr. Kam Khaw Thang' Kammalte:

• I mawhnate im lo ding, mi tawh thu i neih leh maizum seelna peuhin pang tentan loin thumbawl zaw ding. I mawhnate im loin pulak zaw ding.

• I zawh ngap lohte langbawl se loin om hithiat ding.

• Sum leh paai, annek tuidawnte ah thang gamtat lo ding.

• Kineih khem se lo ding, a zawng i hih leh i zawn'na im lo ding, a hai i hih leh i haina im lo ding. A zawngpi kihausak, a haipi kipilsak, cih bangte hoih lo hi.

• Mi gensia se lo ding, midang khat peuh thu i gen leh zong tua i gente pen i gen mite' zakin i gen ngam dingte bek gen ding.

• I siam lohnate ah a siam kineih se lo ding.

• Kamciamna khat peuh i neih leh tangtungsak ding, i tangtungsak zawh loh dingte kamciamna nei vet lo ding.

• Mi simmawhbawl in neu ngaihsut se lo ding. Tu hun-a a neute ni dang ciangin a lian suak thei a, tu hun-a a liante ni dang teh a neu suak thei zel hi. I simmawhbawlte i mai-et hun hong tun ciangin zumhuai mahmah hi.

• Innkuan sum zeekna ah ngeina kip nei ding, sumpi, sumkhol, zattawm ding a nam tuamtuam ciatin sehkhenin, ama sansan-ah a val in zat loh ding.

• Leiba nei dingin sum zang lo ding, i ngahna tawh kituakin zang bek ding.

• I tungsiahte langpanhuai lo hi. I paunak ah ''Lamsak leh pute kizo ngei lo'' na ci hi. I tungsiahte langpan lehang eima gimna hi lel hi.

• Zuau gen se lo ding, ahi bangbangin gen den ding. Mi khat kiangah thu khat gen, a dang khat kiangah a tuampi khat in gen zel cihte pawl hoih lo hi. Lungsim nam nih nei se lo ding cihna hi.

• Hun-awng omsak loin manlah den ding, na tampi septheih ding hanciam ding, a awng khong luate siatna tawh kizom thei hi.

• I hat laitak, i liat laitak, vang i neih laitakin midangte' na sak dingin gamta in na sem lo ding, a thuakte in a khantawnin mangngilh lo hi.

• Thulian khensat ding a om leh khensat pah loin, "Hong kikum phot nung, ci-in a hun sotin limtakin ngaihsun ding.

• Midangte ngaihsutna zui-in na semin gamta lo ding, ei mahmah in man i sak bang bekin na sem ding. Midangte' ngaihsutna zui-in i gamtat ciangin thu haksa khat hong om leh e'n siansakna ding siamna nei lo i hih manin zumhuai hi.

• Ei leh ei kiphattawm se lo ding, midangte phat dingin i om leh lungdamhuai hi. Ei leh ei kiphatna pen zumhuai mahmah hi.

• Khangno lai a siamna leh theihnate kip ahih manin khangno lai-in pilna leh siamna tampi i sin ding kisam hi. Khangham khit a sinte kimangngilh kik pahpah hi. Hih pen khangnote in a hun lai-in a phawk ding thupi hi.

REV. DR. KAM KHAW THANG' TANGTHU TOM
• October 17, 1927 Tuithang ah suak (Pu Sim Tung Nung + Pi Ciin Za Dim)
• October 18, 1936
Apa in Khristian suahpih.
• May 18, 1972
Apa'n sihsan (kumkhat phakma a Nu si)
• June 1937 - March 1941
Tonzang ah Zolai tan 4 dong kah
• September 11, 1938
Rev. Vial Nang in tuiphum
• June 1941 - March 1942
Tedim Manglai sangah Tan 4 dong kah
• June 1945 - March 1947
Tedim Manglai sangah Tan 6 dong kah
• June 1947 - December 1950
Nelson Lai Siangtho sangah kah
• June 1952 - March 1956
Insein Lai Siangtho sangah kah
• June 1956 -December 1956
Hakha Lai Siangtho sangah sem
• May 4, 1957
Sister Niang' Khan Ciin tawh kiteeng.
• February 1957 - February 1960
TBA Secretary sem.
• 1960 - 1982
Tedim Lai Siangtho tei
• April 1984 - 2006
ZCLS laitei.

Theih ding: Hih a tunga Sia Thang' kammalte leh a tangthu tomno pen Rev. Job Thawngno gelh, ''Tedim Lai Siangtho hong bawlsak Rev. Dr. Kam Khaw Thang' Pianzia leh Sepzia'' cih laibu pan ahi hi. Adang tampitak om.

Sia Thang'zat kammal Jesu hilo Jesuh, Khris hilo Khrih, Khasiangtho hilo, Kha Siangtho, Laisiangtho hilo, Lai Siangtho, leh hilo leh, Kam Khua Thang hilo, Kam Khaw Thang... cihte ama' zat ahi hi.

By. Job Thawngno