Tuangpi pen M.A degree a sin lai-in zong Graduate Program in Economic Development ah Most Outstanding Thesis Award (2010) hong ngah hi. Amah pen Kawlgam ah Ngal Bual khua ah suak a,a mah i siamsinna leh matutnate a tom in hih a nuai ah kong gelh suk hi.
Sangkahna: Lai tan
Basic Education Primary School (B.E.P.S) Tungzang - Tanlang-Tan IV Basic Education Middle School (B.E M. S) Tuithang - Tan V
Basic Education High Scholl (B.E.H.S ) Tedim - Tan VI
No. 6. B.E.H.S Botatawng Township ,Yangon,: - Tan VII-Tan X
Kawlgam ah Tan sawm a sim lai tak in USA pai theihna ding lampi kihong a hih manin Kawlgam pan Tan sawm lai vuan manlo in USA ah pai hi. USA a tun ciangin Tan sawm kum khat sin kik hi
Hillsboro High School, Nashville, Tennessee : Tan X-Tan XII
Tuangpi Kawlgam pan pai a hih hangin Mikang lai zo mahmah a hih manin USA a tun khit High School a kah sung mah in hih a nuai a bang in pahtawina leh kihelna nei hi.
1. Vanderbilt Summer Science Collaboration ah ah kha khat sung kihel in khapi tung ah a kah, Rick Chapel tung pan Science thu tampi sinna nei hi.
2. Pahtawina (Award): Physics Award
Spreadshee/Microsoft Excel Award
ESL Keyboard award
Tuangpi pen lai kiva mahmah leh lai pilna thupi a sa mi a hih bangin USA gamah zong High School hoih tak in zo hi. Tua bek hilo in, a mah in a hong piangsak Pa Pasian zong mang ngilh lo a hih manin High School a zawh ciangin College zopna ding pen Christian sang mah zong pah hi. Tua bangin sang a zon ciangin Nashville a Christian University min thang khat ahi, Lipscomb University ah lut theihna (entrance) hamsa hetlo in ngah pah hi. Tua university pan in Bachelor of Science in Computer Engineering pen 2008 in sang tak tawh hong zo hi.
Nashville aom Vanderbilt University pan Master of Arts (M.A) pen Economics major sin ding in 2008 mah in lut kik theih pah hi. Amah pen sangnau pang a hihna theih den mi khat a hih manin a sin lai pilna leh siamnate nusia in gualnopna ah hun a mawk bei sak mi hilo hi.
Tua a hih manin a mah Tuangpi in May 14, 2010 in Vanderbilt University (www.vanderbilt.edu ) pan in Master of Arts (M.A) –Economics pen sang pi tak in hong zo hi.
Tuangpi i Master of Arts (M.A) –Economics a thesis pen:
"Maternal Education and Children's Educational and Health Outcomes" hi.
(Theih huai: Thesis sungah kigelh te khempeuh pen Kawlgam sung pan a thute (data) hi'n Kawlgam mite adingin ethuai thu a hihi.
Pahtawina (Award): Graduate Program in Economics Development (GPED) ah Most Outstanding Thesis Award (2010)
Tuangpi pen Pilna sinna lam ah Zomite sungah etteh tak mahmah khat a hihi. A mah in Master of Arts(M.A) a ngah khit teh, a sang zaw pilna sin beh ding gelna nei lai hi. Master sanga a sang zaw pilna a hi, Doctor of Philosophy (Ph.D ) sin na ding sang a zon teh USA gam sunga sang minthang thum a hi, George Washington University, Washington D.C, North Carolina State University, Raleigh, North Carolina leh American University, Washington D.C te in sin theihna dingin lut theihna ngah hi. Tua sung pan American University,Washington D.C ah kum khat US $ 430000.00 bei ding pen full funding ngah lai a hih manin tua sang ah kah ding khensatna nei hi.
Hih sum bei ding pen sang pan in lai zuizawhna leh kum thum sung pen amahkhan (guarantee) a hihi. Tua kum thum sung in Ph.D program course khempeuh pen a kisin zo thei ding hi a, dissertation pen man lang leh zekia tawh kisai in kum khat pan kum nih bang sawt theih lai hi. Tuangpi pen 1984 kum in suak hi.
Tuangpi pen Thalmual khua pan Buansing beh Pu Thang Khua Tual leh Pi Ngai Ciang te tupa a hihi. A pa Sia Awn Sian Pau pen Zomi sungah USA a tung masa lampawl ahih ban-ah Nashville Tennessee zong a tung masa khat ahihi. Tuangpi te unau pen aneu tung a ki pan tuni dongin apawlpi uh ahi UPC leh a omom na Zomi sungah a ki zangh thei mahmah mikhat uhzong ahihi. Hih bangin Zomi sungah Ph.D ngah hong ki behlapsak Pasian tungleh amau tungah lungdampihna iko hi.
Note ; Pu Tual Khan Suan in Tuangpi MA Degree a ngah tung tanga a gelh thu tampi tawh kop in kong suahsak ahihi.
Note ; Pu Tual Khan Suan in Tuangpi MA Degree a ngah tung tanga a gelh thu tampi tawh kop in kong suahsak ahihi.
Lungdampihna Thupuak
Thawn Tuang
Zomi Angvaan
Nashville TN USA
Dec 10, 2016
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.