Thukhun pen lau kei ni

Kawlgam pan a khangkhia mikhat in, “thukhun ( laws), paizia leh sepzia ( rules and regulations) i muhdan pen uniform silh, thau tawi mite tawh kimu khawm pah a, kigap cipna leh lau huaina bangin kimu in, siatna kipatna lam in” ki mu hi. A hizongin gam khangto sa ahi, USA, UK gam pan a khangkhia mikhat in, tuate pen ” zuih ding, mihingte a ding hoihna ding” in mu uh a, “hih pen paidan hi” ci thei pah uhhi. Midang tawh kikal a thu lai gen leh thu hoih ngahna dan in mu thei uhhi.

Zuihding thukhun (laws), paizia le sepzia ( rules and regulations) pen i muh dang kibang hetlo mawk hi. Thukhun, paizia le sepzia i bawl tak ciangin mikhat bek in vaihawmna hi thei nawnlo leh midangte tawh lungkihual (harmony) a nuntak khop theihna ding ngimna hi a, a tamzaw pen mihingte a dingin a hoihzaw ding ngimna hi pen hi. Mikhat leh khat kikal a kithu tuahlohna a om ciang a hi zongin, na sepna ah midangte zong gup tuam paih tuam neih lohna ding a hi zongin “thu laikim” thei pen ding a ngimna hi zaw hi.

A khangto gamte pan a khangkhia i mipihte naupangnote in, vai khat peuhpeuh ah paizia (rules) cih bang om leh, “aw, zuih ding hi ei” ci pah thei uh a, Kawlgam lam pan khangkhia zaw deuh laite in i lungsim sungah “zuih ding hi ei” ci ziau theilo in, ” ki gim neih” zaw mawk hi. Tua bang mikim i zuih paizia khat zuihna pen i lungsim sungah ” kigakna” dan in kituat mawk hi. Zomi tampi takte, gamdang tungin na a kiseptak ciangin zong, na sepna tawh kisai Company te thukhun, paizia leh sepzia te pen zuih hamsa kisa pha diak hi. ” Tua bang om thei kei” cih bangin ki lehpan ut sese hi.

Tua bek hilo in, mawtaw hawl ciangin ngawn in zuih ding a kibawl thute zuih hamsa kisa deuh sese hi. Mawtaw nung a tuang i tate bangin lam kianga kisuang limm (signs) ” khawlna ding mun, pai hun ding” te zui a mawtaw hawl ding bang hong gen zawthei uhhi. Mawtaw hawlte i zuih ding a kibawl ” lam mei ( traffic light), khawl mun limm ( stop sign), leh hatna zah ( speed limits)” kibawl te khempeuh bang zong, lam pai mite a ding a, a hoih pen ding a kigel leh kibawl hi in, mi khempeuh i zuih kimlai pen ” ei te’n” zuih hamsa kisa deuh sese hi. A taktak in tua bang a thukhun, paizia leh sepziate a kizuih tek cianga, ei a ding leh midangte a ding zong bitna a om zaw a hih man pen kithei utlo sese hi. A diak in mawtaw hawl bang, ” kham theih nesa in hawllo ding, kawng gak ding, a limm ( signs) kilah bangbang in zui in hawl leng” i nuntakna luahuai lo zaw thamtham hi. Zuih ding thukhunte pen a zui mite a ding a siatna ding hi lo zaw hi.

Nasepna mun, sangkahna mun leh mipi zat khop mun tuamtuam te ah zong zuih ding thukhun a kibawlna bangin i zuih theih tek ciang bek-in, mi dangte in zong nuam a sa thei pan suak hi. Tua bang munte ah “mimal khat kawktuam neih man a”, thu khun kibawl na hi zenzenlo a, mi tuamtuamte in lung kihual a nasem khawm, sangkah khawm leh zang khawm thei ding cih deihna hi zaw hi.

Tua mah bangin kipawlna khatpeuh (Pawlpi leh khotang kipawlna) te in zong zuih ding thukhun a neih pen mipi tawh nasem i hih manin a kithu hual thei pen ding ngimna hi zaw hi. ” A neng a tawng” cin paidan zui in mun khempeuh na sep ding, ” hih thu tawh kisai paidan zuih ding om kei in, ken thei keng” ci a, lehpan ding hilo a, thukhun, paizia leh sepzia zui a i sep loh manin mun tampi a kikekna piangcih phawk ding hizaw hi. Thukhun, paizia leh sepzia zui a i sep manin mite lampi man a puak i hih zawk lam zong kiphawk ding a hihi. A taktak in thukhun, paizia leh sepzia a omlo cih om hetlo hi. Kikum khawm a gelna leh kikumlo a gelna paizia, sepzia bek hi kilam dang zaw hi. Zuih ding thukhun omlo a nasep zong ” lamlahna omlo paizia, or lungphut paizia” cih tawh a kizui mah hi veve hi.

Mi pawlkhat in thu le la khatpeuh a om ciangin ” kikup luailuai den keii pen kial lap keilua” a ci bang kiza kiaukiau thei hi. Thu pawlkhat, thukin ( emergency) te pen i nawh vaihawm a kul hi cih pen kinial theilo hi. A hizongin thu khempeuh pen thukin hi khinvek lo  ahih manin a thu tawh kizui a gelsiam ding kisam pen hi. Thukin lo pi thukin dan a gen niloh na in thukhun, paizia leh sepziate nealhsiah detkei ding zong hi khinlo zel hi. Thu pen kibang sitset den ngeilo a hih manin “pawl khat kikup ngiatngiat ding om a, pawlkhat leuleu ciangin a hun lap a sep ding om hi”. Tua hi a, thu a tamzaw ah thukhun leh paizia te mah zui in thu gel pen hoih zaw thei pen hi. Thukin pawlkhatte ah bel mihingte a ding a hoih pen ding tawh vaihawmna pen a hoih pen mah hi thei veve hi.

Biakna sung bang ah khat veivei mi pawlkhat in, “pawlpi sung pen bylaws sangin by love tam zaw leh hoih hi” ci’n thu gen kiza thei zel hi. Hih thupen a hoih lua, man lua hi. Mi khempeuh in itna kikim vive nei tek leng kizang thei mahmah ding hi. A hizongin mihing pen i si leh sa, mel le puam a kipan i ngaihsutnate kikim hetlo mawk a hih manin itna zong mi khempeuh a kikim a neih dingin ” sa hawm banga tawi kikim a hawm theih hilo” a hih manin zat theih taktak (practical ) hetlo tawh kibang hi. A thu in ( in theory) hoih mahmah cih ding lo ngal, zat taktak theih pah hetlo hi. A tunga i cih dan hi leh ” Kiallap hetlo” mawk hi.

Mihingte pen a pian limlim in a phengphi leh angsung khual nam ngiat a hih manin mi nih sanga tamzaw a om khop nak leh zuih ding thukhun, paizia leh sepzia ding tawh na kibawl pah hi. Laisiangtho sungah Pasian in mihing bawl kipatna Eden huan sung pan-in mihingte zuih ding thukhun, paizia leh sepding ding na bawl sak pah hi. Tuabangin thukhun kibawlte pen mihingte a dingin a hoihzaw ding ngimna vive ahihi. Pasian tawh kilawmtatna a zopsuak theihna ding leh mihingte nopsak zawk na ding ngimna hi zaw hi. Mi pawlkhat in biakna Pawlpi, kipawlna tuamtuamte ah zuih ding thukhun, paizia leh sepzia om dimdiamna mun pen Pasian tawh kituak kei, leitung vai leh siatna vai bangin mu in gen mawkmawk thei uhhi. Zuih ding thukhun pen mihing te pat hi hetlo a, i biak Pasian pan na hizaw hi. Zuih ding a kikhung thute zuihna, paizia leh sepzia kician neihna pen Pasian dan taktak na hi zaw hi.

Veng leh pam,lawm leh gual tawh hita leh, kipawlna khat sung a om mimalte hita leh, kipawlna khat le khat kikal ah hita leh, lung kihual (harmony) a nuntakna theihna ding leh mimal sim a hoih zawkna dingin ngimna tawh kibawl zuih ding thukhun, paizia leh sepzia te hoih tak a zuihna in khantohna lam hong mainawt sakzaw ding hi. Tua bang a zuih ding kibawl thute zuihna pen a bawlte sangin a zuite hamphatna ding hiden zaw hi. A taktak in zuih ding a kibawl thute a zui utlo mite pen, mi phengphi leh thu neihna deih hi zaw hi. Mi kuppih sese lo in, a ma thu tawh vai kihawm leh cih a deih mite in, mikim i zuih ding a kibawl thukhun, paizia leh sepzia te deihlo uhhi. Zuih ding thu kibawlna pen dawi leh kau vai zah phial in gen thei uh a, Pasian zia leh tong a hih zawklam tel hetlo mawk uhhi. Mi khempeuh in itna a kikim sitset in a kineih theih mateng, midangte tawh kilunghual (harmony) a nuntak theihna dingin zuih ding thukhun, paizia le sepzia hoih khat a kikhun detna in kilemna piangsak zawding hi.

Tual Khan Suan

Dated: 11/21/2016